രാഹുലിന് അമ്മയുടെ തട്ടകത്തില് മറുപടി... റാഫോലില് ക്വട്ടറോച്ചി അമ്മാവനില്ല കോണ്ഗ്രസിന് ശക്തമായ മറുപടിയുമായി മോഡി; ബോഫോഴ്സിലെ ഇടനിലക്കാരന് ക്വട്ടറോച്ചിയെ കോണ്ഗ്രസ് രക്ഷപ്പെടുത്തി; ഇപ്പോള് ഇന്ത്യയ്ക്കു കൈമാറി കിട്ടിയ മിഷേലിനെ രക്ഷപ്പെടുത്താന് അഭിഭാഷകനെ അയയ്ക്കുന്നു
റാഫേല് വിമാന ഇടപാട് കേസില് സുപ്രീം കോടതി വിധി ബിജെപിക്ക് നല്കിയ ഊര്ജം ചെറുതല്ല. റാഫേല് വിമാന ഇടപാടില് സിബിഐ അന്വേഷണം ആവശ്യപ്പെട്ടുള്ള ഹര്ജികള് സുപ്രീംകോടതി തള്ളിയതിനു പിന്നാലെ ബോഫോഴ്സ് കോഴക്കേസ് ഓര്മ്മിപ്പിച്ച് പ്രധാനമന്ത്രി നരേന്ദ്ര മോഡി യുപിഎ അധ്യക്ഷ സോണിയാ ഗാന്ധിയുടെ തട്ടകത്തില് ആഞ്ഞടിച്ചു.
ബിജെപിയുടെ ഭരണത്തില് ക്വട്ടറോച്ചി അമ്മാവന്മാരോ ക്രിസ്ത്യന് മിഷേലുമാരോ ഇല്ലെന്ന് അഹസ്റ്റ് വെസ്റ്റാലാന്ഡ് അഴിമതിയാരോപണം കൂടി പരാമര്ശിച്ച് മോഡി പറഞ്ഞു. അസ്വസ്ഥരായ കോണ്ഗ്രസ് നുണ പ്രചരിപ്പിക്കുന്നു. കോടതിയ്ക്കെതിരെ അവിശ്വാസം സൃഷ്ടിക്കാനുള്ള ശ്രമമാണ് ഇപ്പോള് നടത്തുന്നത്.
ബോഫോഴ്സിലെ ഇടനിലക്കാരന്, ഇറ്റലി സ്വദേശിയായ ക്വട്ടറോക്കിയെ കോണ്ഗ്രസ് രക്ഷപ്പെടുത്തി. ഇപ്പോള് ഇന്ത്യയ്ക്കു കൈമാറി കിട്ടിയ മിഷേലിനെ രക്ഷപ്പെടുത്താന് അഭിഭാഷകനെ അയയ്ക്കുന്നു. ഒരുഭാഗത്ത് സര്ക്കാര് സൈനികശക്തി വര്ദ്ധിപ്പിക്കാന് കഴിയുന്നതെല്ലാം ചെയ്യുന്നു, മറു ഭാഗത്തു ചിലര് എന്തു വില കൊടുത്തും രാജ്യത്തെ ദുര്ബലപ്പെടുത്താനാണു ശ്രമിക്കുന്നതെന്നു മോഡി പറഞ്ഞു.
മുന് സര്ക്കാരുകളെല്ലാം റായബറേലിയെ അവഗണിക്കുകയാണു ചെയ്തത്. സര്ക്കാര് അങ്ങനെയല്ലെന്നു സോണിയയുടെ മണ്ഡലമായ റായ്ബറേലിയില്1,100 കോടി രൂപയുടെ വികസന പദ്ധതികള് ഉദ്ഘാടനം ചെയ്ത് മോഡി പറഞ്ഞു. റായ്ബറേലിയയിലെ റെയില്വേ കോച്ച് ഫാക്ടറിയില് നിര്മ്മിച്ച തൊള്ളായിരാമത്തെ കോച്ച് അദ്ദേഹം ഫ്ളാഗ് ഓഫ് ചെയ്യുകയും ചെയ്തു.
അതേസമയം മോഡിയുടെ ഈ വെളിപ്പെടുത്തല് കോണ്ഗ്രസിനേറ്റ പ്രഹരമാണ്. അതിനാല് തന്നെ റാഫേല് ഇടപാട് വീണ്ടും കത്തിക്കാനൊരുങ്ങുയാണ് കോണ്ഗ്രസ്. പാര്ളമെന്റില് ആഞ്ഞടിക്കാനാണ് കോണ്ഗ്രസ് നീക്കം. ഇതിന്റെയടിസ്ഥാനത്തില് റാഫേല് ഇടപാടുമായി ബന്ധപ്പെട്ട സുപ്രീംകോടതി വിധി റദ്ദാക്കണമെന്നു കോണ്ഗ്രസ് വ്യക്തമാക്കിയിട്ടുണ്ട്. കേസില് തെറ്റായ വിവരങ്ങള് നല്കി കേന്ദ്രസര്ക്കാര് കോടതിയെ തെറ്റിദ്ധരിപ്പിച്ചെന്നും, ഇതില് കേന്ദ്രത്തിനെതിരേ കോടതിയലക്ഷ്യത്തിനു നടപടിയെടുക്കണമെന്നും മുതിര്ന്ന കോണ്ഗ്രസ് നേതാവ് ആനന്ദ് ശര്മ്മ പറഞ്ഞു.
റാഫേല് ഇടപാടില് അഴിമതി നടന്നുവെന്ന് ആവര്ത്തിച്ച ശര്മ്മ, പ്രായശ്ചിത്തമായി ബി.ജെ.പി. നേതാക്കള് ഗംഗാസ്നാനം നടത്തേണ്ടിവരുമെന്നും മുന്നറിയിപ്പു നല്കി. റാഫേല് ഇടപാടില് അന്വേഷണം ആവശ്യമില്ലെന്നും ഇടപാടില് സംശയമില്ലെന്നുമുള്ള സുപ്രീംകോടതി വിധിയോടു പ്രതികരിക്കുകയായിരുന്നു അദ്ദേഹം.
സുപ്രീംകോടതിയെ തെറ്റിദ്ധരിപ്പിക്കാനായി റാഫേല് ഇടപാടുമായി ബന്ധപ്പെട്ട തെറ്റായ വിവരങ്ങള് കേന്ദ്രം കോടതിയില് സമര്പ്പിച്ചെന്നാണ് കോണ്ഗ്രസിന്റെ പ്രധാന ആരോപണം. ഇക്കാര്യം ചൂണ്ടിക്കാട്ടി കോണ്ഗ്രസ് വീണ്ടും കോടതിയെ സമീപിച്ചേക്കുമെന്നും സൂചനയുണ്ട്.
റാഫേല് ഇടപാടിലെ സുപ്രീംകോടതി വിധിയില് നിറയെ വസ്തുതാപരമായ പിശകുകളുണ്ടെന്നു കോണ്ഗ്രസ് നേതാവ് കപില് സിബല് കഴിഞ്ഞദിവസം ആരോപിച്ചിരുന്നു. വിമാനത്തിന്റെ വിലയെക്കുറിച്ചുള്ള വിവരങ്ങള് സി.എ.ജി. പരിശോധിച്ചതാണെന്നും അദ്ദേഹത്തിന്റെ റിപ്പോര്ട്ട് പാര്ലമെന്റിന്റെ പി.എ.സി.യുടെ പരിഗണനയില് വന്നതാണെന്നുമാണ് വിധിയില് പറയുന്നത്. എന്നാല്, റാഫേല് ഇടപാടില് അങ്ങനെയൊരു റിപ്പോര്ട്ട് കണ്ടിട്ടില്ലെന്ന് പി.എ.സി. ചെയര്മാനും പറയുന്നു. കോടതിയെ തെറ്റിദ്ധരിപ്പിച്ചതാരാണെന്നും എ.ജി. എങ്ങനെയാണ് കോടതിക്ക് തെറ്റായ വിവരങ്ങള് നല്കിയതെന്നും സിബല് ചോദിച്ചിരുന്നു.
അതേസമയം റാഫേല് ഇടപാടില് ജെ.പി.സി. അന്വേഷണമില്ലെന്നു കേന്ദ്ര ധനമന്ത്രി അരുണ് ജയ്റ്റ്ലി വ്യക്തമാക്കിയിട്ടുണ്ട്. വിഷയത്തില് കോണ്ഗ്രസിനെ നിശിതമായി വിമര്ശിച്ച ധനമന്ത്രി, സുപ്രീം കോടതിയുടെ ക്ലീന് ചിറ്റ് ലഭിച്ച സാഹചര്യത്തില് സി.എ.ജി. റിപ്പോര്ട്ടിനു പ്രസക്തിയില്ലെന്നും അദ്ദേഹം വ്യക്തമാക്കി. പാര്ലമെന്റിന്റെ ശീതകാല സമ്മേളനത്തിലെ ആദ്യ നാലു ദിനങ്ങള് മറ്റു പല വിഷയങ്ങളെച്ചൊല്ലി അലങ്കോലമായി. ബാക്കി ദിവസങ്ങളില് റാഫേല് വിഷയം ചര്ച്ച ചെയ്യാനല്ല ബഹളമുണ്ടാക്കാനാണു കോണ്ഗ്രസിനു താല്പര്യമെന്നും അദ്ദേഹം കുറ്റപ്പെടുത്തി.
https://www.facebook.com/Malayalivartha