രാജസ്ഥാന്‍ മുഖ്യമന്ത്രി അശോക് ഗെഹ് ലോട്ടും ഉപമുഖ്യമന്ത്രിയായി സചിന്‍ പൈലറ്റും സത്യപ്രതിജ്ഞ ചെയ്ത് അധികാരമേറ്റു. ജയ്പുരിലെ ചരിത്ര പ്രസിദ്ധമായ ആല്‍ബര്‍ട്ട് ഹാളില്‍ നടന്ന സത്യപ്രതിജ്ഞാ ചടങ്ങില്‍ ഗവര്‍ണര്‍ ഇരുവര്‍ക്കും സത്യവാചകം ചൊല്ലി കൊടുത്തു. 67കാരനായ അശോക് ഗെഹ് ലോട്ട് മൂന്നാം തവണയാണ് രാജസ്ഥാന്‍ മുഖ്യമന്ത്രി പദത്തില്‍ എത്തുന്നത്.
ജോധ്പുര്‍ മണ്ഡലത്തില്‍ നിന്ന് അഞ്ച് തവണ വിജയിച്ച് ഗെഹ് ലോട്ട് ലോക്‌സഭയിലെത്തിയിട്ടുണ്ട്. ഇത്തവണ സര്‍ദാര്‍പുര നിയമസഭാ മണ്ഡലത്തില്‍ നിന്നാണ് തെരഞ്ഞെടുക്കപ്പെട്ടത്. 41കാരനായ സചിന്‍ പൈലറ്റ് നിലവില്‍ രാജസ്ഥാന്‍ പി.സി.സി അധ്യക്ഷനാണ്. 2004, 2009 കാലങ്ങളില്‍ ദൗസ, അജ്മീര്‍ എന്നീ സീറ്റുകളില്‍ നിന്ന് വിജയിച്ച് ലോകസഭാംഗമായിട്ടുണ്ട്. നിലവില്‍ ടോങ്കില്‍ നിന്നാണ് സചിന്‍ നിയമസഭയിലെത്തിയത്.

കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി, രാജസ്ഥാന്‍ മുന്‍ മുഖ്യമന്ത്രി വസുന്ധരാ രാജെ, കോണ്‍ഗ്രസ് നേതാക്കളായ ജിതിന്‍ പ്രസാദ് അടക്കമുള്ളവര്‍ പങ്കെടുത്തു. എന്നാല്‍, ബി.എസ്.പി നേതാവ് മായാവതിയും എസ്.പി നേതാവ് അഖിലേഷ് യാദവും ചടങ്ങില്‍ പങ്കെടുത്തില്ല.'