ലോക് സഭാതെരെഞ്ഞെടുപ്പ് ആസന്നമായ വേളയില്‍ വോട്ടര്‍മാരെ ആവേശം കൊള്ളിക്കുന്ന പ്രഖ്യാപനവുമായി എത്തിയിരിക്കുകയാണ് കേന്ദ്ര സാമൂഹ്യ ശാക്തീകരണ വകുപ്പ് സഹമന്ത്രി രാംദാസ് അത്താവാലെ. 15 ലക്ഷം രൂപ ഓരോ ഇന്ത്യാക്കാരന്റെയും അക്കൌണ്ടിലേക്ക് എത്തുമെന്ന കാര്യത്തില്‍ ഒരു സംശയവുമില്ല എന്നാണ് മന്ത്രി ഉറപ്പ് തന്നിരിക്കുന്നത്.

15 ലക്ഷം രൂപ വീതം ഇട്ടുതരാമെന്ന പ്രഖ്യാപനം മുമ്പ് നടത്തിയത് സാക്ഷാല്‍ നരേന്ദ്ര മോദിയാണ്. കഴിഞ്ഞ ലോക് സഭാ തെരഞ്ഞെടുപ്പ് കാലത്തായിരുന്നു അത്. മറുനാടുകളില്‍ ഒളിപ്പിച്ചുവച്ചിരിക്കുന്ന മുഴുവന്‍ കള്ളപ്പണവും പിടിച്ചെടുത്ത് പാവപ്പെട്ടവന്റെ ബാങ്ക് അക്കൌണ്ടിലേക്കു നിക്ഷേപിക്കുന്ന ആ സ്വപ്നനിമിഷം എപ്പോള്‍ വരും എന്ന് കാതോര്‍ത്തിരിക്കുകയായിരുന്നു അന്നു മുതല്‍ ഇന്ന് അന്തി വരെ ഈ രാജ്യത്തെ ജനകോടികള്‍ ആകമാനം. അതേസമയം, വോട്ടര്‍മാരെ പറ്റിക്കാനായിരുന്നു ആ പ്രഖ്യാപനം എന്ന് പ്രതിപക്ഷം പറഞ്ഞു നടക്കുകയും ചെയ്തു. എന്നാല്‍, വിമര്‍ശകരുടെ വായടപ്പിച്ചുകൊണ്ട് ഇപ്പോള്‍ രാംദാസ് അത്താവാലെയുടെ പ്രഖ്യാപനം വന്നിരിക്കുകയാണ്. വാര്‍ത്താ ഏജന്‍സിയായ എഎന്‍ഐ ആണ് ഈ വിവരം റിപ്പോര്‍ട്ട് ചെയ്തിരിക്കുന്നത്.

15 ലക്ഷം രൂപ ഓരോരുത്തരുടെ അക്കൌണ്ടിലും എത്തും മന്ത്രി ഉറപ്പ് പറയുന്നു. പക്ഷേ, ഒറ്റയടിക്കല്ല. ഘട്ടംഘട്ടമായാണ് വരിക. ചില സാങ്കേതിക പ്രശ്നങ്ങളുള്ളതുകൊണ്ടാണ് ഇത്രനാള്‍ പണം വരാന്‍ താമസിച്ചതെന്നാണ് മന്ത്രിയുടെ വിശദീകരണം. ഇതിനായി ആവശ്യമുള്ള പണം തരണമെന്ന് റിസര്‍വ് ബാങ്കിനോട് ആവശ്യപ്പെട്ടിരുന്നുവത്രേ. ദുഷ്ടന്മാര്‍. അവര്‍ പണം തന്നില്ല. അതാണ് ഇതുവരെ ഇടാന്‍ ആകാതെ പോയതിനു കാരണം. ഇപ്പോള്‍ റിസര്‍വ് ബാങ്ക് ഗവണര്‍ മാറിയല്ലോ. സാക്ഷാല്‍ ആര്‍.എസ്.എസ് അനുയായി തന്നെ ഗവര്‍ണറായി എത്തിയതു കൊണ്ടാകും, ഇനി തീര്‍ച്ചയായും പണമിടാന്‍ കഴിയുമെന്ന് മന്ത്രി ആത്മവിശ്വാസം പ്രകടിപ്പിക്കുന്നത്.

ജയിച്ച് പ്രധാനമന്ത്രിയായി നാലര വര്‍ഷമായിട്ടും അഞ്ചു പൈസ ഒരിന്ത്യാക്കാരന്റെയും അക്കൌണ്ടിലേക്കു വരാത്തതുകൊണ്ട് അതു വിശ്വസിച്ച് വോട്ടു ചെയ്തവര്‍ വഞ്ചിതരായെന്നു കരുതിയിരിക്കുമ്പോഴാണ് കേന്ദ്രമന്ത്രി ഉറപ്പുമായി വന്നിരിക്കുന്നത്. ഈ അസാധരമായ നെഞ്ചളവ് സമ്മതിച്ചുകൊടുക്കണം എന്നാണ് നിരീക്ഷകര്‍ പറയുന്നത്.

തങ്ങളെ അധികാരത്തിലേറ്റിയാല്‍ കള്ളപ്പണം പിടികൂടി രാജ്യത്തെ എല്ലാവരുടെയും ബാങ്ക് അക്കൗണ്ടുകളിലേക്ക് പതിനഞ്ച് ലക്ഷംരൂപ വീതം നല്‍കും എന്നായിരുന്നു ബിജെപിയുടെ തെരഞ്ഞെടുപ്പ് വാഗ്ദാനം. എന്നാല്‍ വാഗ്ദാനം നിറവേറ്റിയില്ല എന്ന് മാത്രമല്ല, ഇന്ത്യയിലെ ബാങ്കുകളില്‍ ഉണ്ടായിരുന്ന കോടാനുകോടി രൂപ വായ്പയെടുത്ത് അതുമായി നിരവധി കോടീശ്വരന്മാര്‍ ഇന്ത്യയില്‍നിന്നു മുങ്ങുകയും ചെയ്തു. കള്ളപ്പണം തടയാനെന്ന പേരില്‍ നടപ്പിലാക്കിയ നോട്ട്‌നിരോധനമാകട്ടെ, വന്‍ദുരന്തമായി മാറി. ഇതിനിടയില്‍, 15 ലക്ഷം അക്കൌണ്ടിലിടുമെന്ന പഴയ പ്രഖ്യാപനത്തെക്കുറിച്ച് ചോദിച്ചപ്പോള്‍ ഒരു അഭിമുഖത്തില്‍ ബിജെപി അദ്ധ്യക്ഷന്‍ അമിത് ഷാ പറഞ്ഞത്അതു വെറും ഒരു ഇലക്ഷന്‍ സ്റ്റണ്ടായിരുന്നു എന്നാണ്.

പുതിയ തെരെഞ്ഞെടുപ്പ് കാലമായപ്പോള്‍ വീണ്ടും സ്റ്റണ്ട് മാസ്റ്റര്‍മാര്‍ രംഗത്തിറങ്ങുന്ന കാഴ്ചയാണ് കാണുന്നത്. അടുത്ത ആറു മാസം കൂടി റിസര്‍വ്വ് ബാങ്ക് ജീവനോടെ ഉണ്ടായിരിക്കണേ ദൈവമേ എന്നാണ് ഓരോ ഇന്ത്യാക്കാരനും ഇപ്പോള്‍ പ്രാര്‍ത്ഥിക്കേണ്ടത്.