ആളൊഴിഞ്ഞ വയലില്‍ 14 വയസ്സുകാരന്റെ മൃതദേഹം കണ്ടെത്തിയതിനു പിന്നാലെ തെളിഞ്ഞത് വന്‍ ചതിയുടെയും ക്രൂരതയുടെയും കഥ. ബംഗാളിലെ പര്‍ബ ബര്‍ദുമാന്‍ ജില്ലയിലാണ് രാജ്യത്തെ ഞെട്ടിച്ച ക്രൂരകൃത്യം. അര്‍ഷാദ് ഷേഖ് എന്ന 14കാരനെയാണ് അയല്‍വാസി ജമാല്‍ ഷേഖ് കൊന്നത്. കുട്ടിയുടെ അച്ഛനെ ഇയാള്‍ വര്‍ഷങ്ങളായി കബളിപ്പിക്കുകയുമായിരുന്നു.

ബര്‍ദുമാനില്‍ അമ്മയുടെ അച്ഛനും അമ്മയ്ക്കുമൊപ്പമാണ് കൊല്ലപ്പെട്ട അര്‍ഷാദ് താമസിച്ചിരുന്നത്. കുട്ടിയുടെ അച്ഛന്‍ വര്‍ഷങ്ങള്‍ക്കു മുന്‍പ് ഭാര്യയെയും മകനെയും ഉപേക്ഷിച്ച് കേരളത്തിലേയ്ക്ക് പോന്നതായിരുന്നു. അതിനാല്‍ സ്വന്തം മകനെ കണ്ടിട്ടില്ലായിരുന്നു. ഇതറിയാമായിരുന്ന ജമാല്‍ ഷേഖ് ഇവരെ കബളിപ്പിക്കുകയായിരുന്നു. അര്‍ഷാദിന്റെ അച്ഛനെ വിളിച്ച് താനാണ് മകനെന്ന് പറഞ്ഞ് വര്‍ഷങ്ങളായി കബളിപ്പിച്ച് ഓരോ ആവശ്യങ്ങള്‍ പറഞ്ഞ് പണം വാങ്ങി. എന്നാല്‍ ഏതാനും മാസം മുന്‍പ് നേരില്‍ കാണണമെന്ന ആവശ്യം അച്ഛന്‍ പറഞ്ഞു തുടങ്ങി. ഇതോടെ തട്ടിപ്പു പുറത്താകുമെന്ന് ഭയന്ന് യഥാര്‍ത്ഥ മകനായ അര്‍ഷാദിനെ കൊലപ്പെടുത്താന്‍ തീരുമാനിക്കുകയായിരുന്നു.

ഡിസംബര്‍ മൂന്നിന് അര്‍ഷാദിനെ കാണാതാവുകയായിരുന്നു. അടുത്ത ദിവസം സമീപത്തെ വയലില്‍ കൊല്ലപ്പെട്ട നിലയില്‍ കണ്ടെത്തി. പിന്നാലെ പോലീസ് അന്വേഷണത്തില്‍ ജമാല്‍ ഷേഖ് പിടിയിലാവുകയും ചോദ്യം ചെയ്യലില്‍ കുറ്റസമ്മതം നടത്തുകയുമായിരുന്നു.