അഞ്ച് സംസ്ഥാനങ്ങളിൽ ബിജെപിയ്ക്ക് നേരിട്ട തിരിച്ചടിയുടെ ചൂടാറും മുൻപേ ജനങ്ങളെ കയ്യിലെടുക്കാൻ പുതിയൊരു പദ്ധതിയുമായാണ് മോദി സർക്കാർ രംഗത്തെത്തിയിരിക്കുന്നത്. രാജ്യ​ത്തെ എല്ലാ ജനങ്ങൾക്കും നിശ്​ചിത വരുമാനം ഉറപ്പാക്കാൻ ലക്ഷ്യമിട്ടുള്ള പദ്ധതി കേന്ദ്ര സർക്കാർ പ്രഖ്യാപിക്കാനൊരുങ്ങുന്നതായാണ് റിപ്പോർട്ടുകൾ.

രാജ്യത്തിലുള്ള എല്ലാവർ‌ക്കും സാർവത്രിക അടിസ്ഥാന വരുമാനം ഉറപ്പാക്കുന്നതാണ്​ പദ്ധതി. നിശ്ചിത അടിസ്ഥാന വരുമാനമില്ലാത്തവർക്ക്​ ആ തുക അവരുടെ അക്കൗണ്ടുകളിലേക്ക്​ നൽകുന്നതാണ്​ മോദി സർക്കാർ പുതിയ പദ്ധതിയിലൂടെ ഉദ്ദേശിക്കുന്നത്.

2014 ലോക്​സഭ തെരഞ്ഞെടുപ്പിൽ​ മോദി സർക്കാറി​ന്റെ പ്രധാന വാഗ്​ദാനങ്ങളിലൊന്ന്​ കള്ളപ്പണം പിടിച്ചെടുത്ത് എല്ലാവരുടെയും ബാങ്ക്​ അക്കൗണ്ടുകളിൽ 15 ലക്ഷം രൂപ നൽകുമെന്നായിരുന്നു. എന്നാൽ, അഞ്ച്​ വർഷങ്ങൾക്കപ്പുറവും ഈ വാഗ്​ദാനം നടപ്പിലായിട്ടില്ല. ഈ അവസരം നിലം നിൽക്കെയാണ് പുതിയ പ്രഖ്യാപനവുമായി മോദി രംഗത്തെത്തിയത്. അതേസമയം പഴയ പദ്ധതിയ്ക്ക് പകരമായാണ് പുതിയ പദ്ധതിയെന്നും സൂചനയുണ്ട്.

കാർഷിക കടങ്ങൾ എഴുതി തള്ളുന്നതിനുള്ള പുതിയ പദ്ധതി മോദി സർക്കാർ പ്രഖ്യാപിക്കുമെന്ന്​ നേരത്തെ റിപ്പോർട്ടുകളുണ്ടായിരുന്നു. ഇതിന്​ പിന്നാലെയാണ്​ അടിസ്ഥാന വരുമാനം ഉറപ്പാക്കുന്നതിനുള്ള പദ്ധതിയും സർക്കാർ പ്രഖ്യാപിക്കാൻ ഒരുങ്ങുന്നത്​​​. അതേസമയം അഞ്ച് സംസ്ഥാനങ്ങളിൽ നടന്ന നിയമസഭാ തിരഞ്ഞെടുപ്പിൽ നേരിട്ട തിരിച്ചടിയുടെ പശ്ചാത്തലത്തിൽ കേന്ദ്രസർക്കാർ നിർണായക പ്രഖ്യാപനങ്ങൾ നടത്തുമെന്നും റിപ്പോർട്ടുണ്ടായിരുന്നു.