2014 -ൽ പ്രധാനമന്ത്രി നരേന്ദ്രമോദി അധികാരത്തിലെത്തിയ ശേഷം വിദേശയാത്രകൾക്കായി ചെലവഴിച്ചത് 2,021 കോടി രൂപയെന്ന് റിപ്പോർട്ട് . വിദേശകാര്യ മന്ത്രാലയമാണ് ഇക്കാര്യം വെളിപ്പെടുത്തിയത്. 2014 ജൂൺ മുതലുള്ള കണക്കുകളാണ്​ മന്ത്രാലയം പുറത്ത്​ വിട്ടത്​.

വിദേശകാര്യ സഹമന്ത്രി വി.കെ സിങ്ങാണ്​ 2014 മുതൽ 2018 വരെയുള്ള മോദിയുടെ വിദേശയാത്രയുടെ വിവരങ്ങൾ പുറത്ത്​ വിട്ടത്​. മോദി സന്ദർശിച്ച 10 രാജ്യങ്ങളിൽ നിന്നാണ്​ ഇന്ത്യക്ക്​ ഏറ്റവും കൂടുതൽ വിദേശനിക്ഷേപം ഉണ്ടായതെന്നും വി.കെ സിങ്​ റിപ്പോർട്ടിൽ വ്യക്​തമാക്കുന്നു.

മോദിയുടെ യാത്രക്ക്​ ഉപയോഗിച്ച ചാർട്ടർ വിമാനങ്ങളുടെ അറ്റകുറ്റപണിക്കാണ്​ ഏറ്റവും കൂടുതൽ തുക ചെലവഴിച്ചതെന്ന്​ റിപ്പോർട്ടിൽ വ്യക്​തമാക്കുന്നു. 1,583.18 കോടിയാണ്​ വിമാനങ്ങളുടെ അറ്റകുറ്റപണിക്കായി ചെലവഴിച്ചത്​. യാത്രകൾക്കായി429.25 കോടിയും ഹോട്ട്​ലൈൻ സേവനത്തിനായി 9.11 കോടിയും ചെലവാക്കി. ഇതെല്ലാം ചേർത്താണ്​ മോദിയുടെ വിദേശയാത്രക്ക്​ ചെലവായ തുക കണക്കാക്കിയത്​.