ബംഗ്ലാദേശ് പൊതുതെരഞ്ഞെടുപ്പിന്റെ വോട്ടെടുപ്പ് പുരോഗമിക്കുന്നു. രാവിലെ എട്ടിന് ആരംഭിച്ച വോട്ടെടുപ്പ് വൈകുന്നേരം നാല് വരെയാണ്. കനത്ത സുരക്ഷയിലാണ് വോട്ടെടുപ്പ് പുരോഗമിക്കുന്നത്. നാലാംവട്ടവും അധികാരത്തിലെത്താമെന്ന പ്രതീക്ഷയിലാണ് അവാമി ലീഗ് നേതാവും പ്രധാനമന്ത്രിയുമായ ഷേക്ക് ഹസീന.

ബംഗ്ലാദേശ് നാഷനലിസ്റ്റ് പാര്‍ട്ടിയുടെ നേതൃത്വത്തിലുള്ള പ്രതിപക്ഷ സഖ്യത്തിന്റെ കമാല്‍ ഹുസൈനാണ് ഹസീനയുടെ മുഖ്യ എതിരാളി. 300 പാര്‍ലമെന്റ് സീറ്റുകളില്‍ 1,848 സ്ഥാനാര്‍ഥികളാണു മത്സരിക്കുന്നത്. വോട്ടര്‍മാരുടെ എണ്ണം പത്തരക്കോടിയോളം വരും. ഇവര്‍ക്കായി 40,183 പോളിംഗ് ബൂത്തുകള്‍ സജ്ജീകരിച്ചു.തെരഞ്ഞെടുപ്പ് സംഘട്ടനങ്ങളില്‍ ഇതിനകം 13 പേര്‍ കൊല്ലപ്പെടുകയും നിരവധി പേര്‍ക്കു പരിക്കേല്‍ക്കുകയും ചെയ്തു. അതിനാല്‍ സുരക്ഷയ്ക്കായി പോലീസ്, സൈനിക, അര്‍ധസൈനിക വിഭാഗങ്ങളില്‍പ്പെട്ട ആറുലക്ഷം ഭടന്മാരെയാണ് നിയോഗിച്ചിരിക്കുന്നത്.