ബംഗ്ലാദേശില്‍ ഷേക് ഹസീന വീണ്ടും അധികാരത്തിലേക്ക്. ഇന്നലെ നടന്ന പൊതുതെരഞ്ഞെടുപ്പില്‍ അവരുടെ അവാമി ലീഗ് പാര്‍ട്ടിയുടെ വിജയം ഏറെക്കുറെ ഉറപ്പിക്കപ്പെട്ടു. കൊലപാതകങ്ങളും സംഘര്‍ഷങ്ങളും ബൂത്തുപിടിത്തവും വ്യാപകമായി റിപ്പോര്‍ട്ട് ചെയ്യപ്പെട്ടു. ഒരു സുരക്ഷാഭടന്‍ അടക്കം 17 പേര്‍ മരിച്ചു. നിരവധിപ്പേര്‍ക്കു പരിക്കേറ്റു. പ്രതിപക്ഷമായ ബംഗ്ലാദേശ് നാഷണലിസ്റ്റ് പാര്‍ട്ടി(ബിഎന്‍പി)യുടെ നേതാവും മുന്‍ പ്രധാനമന്ത്രിയുമായ ഖാലിദ സിയ ജയിലില്‍ അടയ്ക്കപ്പെട്ടതും അവരുടെ മകന്‍ താരിഖ് റഹ്മാന്‍ അറസ്റ്റ് ഭയന്ന് വിദേശത്തു കഴിയുന്നതും ഹസീനയ്ക്കു ജയിക്കാന്‍ അവസരമൊരുക്കി.

ഗോപാല്‍ഗഞ്ച് മണ്ഡലത്തില്‍ മത്സരിച്ച ഹസീന 2,29,539 വോട്ടിന്റെ മൃഗീയഭൂരിപക്ഷത്തിനു ജയിച്ചു. എതിരാളിക്ക് 123 വോട്ടാണു കിട്ടിയത്. 1996 മുതല്‍ 2001 വരെ പ്രധാനമന്ത്രിയായിരുന്നു ഹസീന. 2009 ല്‍ വീണ്ടും പ്രധാനമന്ത്രിയായ അവര്‍ തുടര്‍ച്ചയായ മൂന്നാം വട്ടവും അധികാരം നിലനിര്‍ത്തുകയാണ്. ബിഎന്‍പി കഴിഞ്ഞ തവണത്തെ പൊതുതെരഞ്ഞെടുപ്പു ബഹിഷ്‌കരിച്ചത് ഹസീനയുടെ ജയം അനായാസമാക്കിയിരുന്നു.