മേഘാലയയിലെ ഖനിയില്‍ കുടുങ്ങിയ 15 പേരെ രക്ഷിക്കാനുള്ള ശ്രമങ്ങള്‍ 18ാം ദിവസവും തുടരുന്നു. നാവിക സേനയുടെ മുങ്ങല്‍ വിദഗ്ധര്‍ ഖനിയിലെ വെള്ളപ്പൊക്കത്തെ മറികടന്ന് തെരച്ചില്‍ നടത്തിയെങ്കിലും ആരെയും കണ്ടെത്താനായില്ല. ദേശീയ ദുരന്ത നിവാരണ സേന, നാവിക സേന, ഒഡിഷ അഗ്‌നിശമന സേന എന്നിവരുടെ സംയുക്ത സംഘമാണ് തെരച്ചില്‍ നടത്തുന്നത്.
വെള്ളത്തില്‍ 40 അടി താഴെ വരെ തങ്ങളുടെ മുങ്ങല്‍ വിദഗ്ധര്‍ക്ക് എത്താനാകുമെന്ന് ദുരന്ത നിവാരണ സേന അറയിച്ചു. ഒഡിഷ രക്ഷാ സംഘം വെള്ളം പമ്പ് ചെയ്ത് ഒഴിവാക്കുന്നതിനുവേണ്ട നടപടികള്‍ ആരംഭിച്ചിട്ടുണ്ട്. ഖനി തകര്‍ന്ന് വീണതോടെ സമീപത്തെ നദിയില്‍ നിന്ന് വെള്ളം ഖനിയിലേക്ക് കുത്തി ഒഴുകുകയായിരുന്നു. കൂടാതെ നദിയില്‍ വെള്ളപ്പൊക്കവുമുണ്ടായി.
എന്നാല്‍ ഖനിയിലേക്ക് വെള്ളം വരുന്ന വഴി ഇതുവരെ കണ്ടെത്താനായിട്ടില്ല. ഡിസംബര്‍ 13നാണ് അപകടമുണ്ടായത്. ആ സമയം ഖനിക്കുള്ളില്‍ ജോലി ചെയ്യുകയായിരുന്ന 15 തൊഴിലാളികളാണ് അപകടത്തില്‍ പെട്ടത്.
ഇന്നലെ വെള്ളത്തിലിറങ്ങിയ മുങ്ങല്‍ വിദഗ്ധരുടെ അഭിപ്രായത്തില്‍ ഖനിയില്‍ 150 അടി വെള്ളമുണ്ട്. 90 അടി വരെ ആഴത്തില്‍ മാത്രമേ വിദഗ്ധര്‍ക്ക് മുങ്ങാനാകൂ. ബാക്കിയിടങ്ങളില്‍ കല്‍ക്കരിയുമായി ചേര്‍ന്ന് കറുത്ത നിറത്തിലാണ് വെള്ളമെന്നും അവര്‍ അറിയിച്ചു.