പ്രതിപക്ഷ ബഹളത്തെ തുടര്‍ന്ന് മുത്തലാഖ് വിരുദ്ധ ബില്‍ രാജ്യസഭയില്‍ അവതരിപ്പിക്കാനായില്ല. ബഹളംമൂലം രാജ്യസഭ ഇന്നത്തേക്ക് പിരിഞ്ഞു. സഭ ബുധനാഴ്ച വീണ്ടും ചേരും. മുത്തലാഖ് ബില്‍ സെലക്ട് കമ്മിറ്റിക്കു വിടണമെന്ന് ആവശ്യപ്പെട്ടായിരുന്നു രാജ്യസഭയില്‍ കോണ്‍ഗ്രസ് ഉള്‍പ്പെടെ പ്രതിപക്ഷ പാര്‍ട്ടികള്‍ ബഹളമുണ്ടാക്കിയത്. എന്നാല്‍ സര്‍ക്കാര്‍ ഇതിനു തയ്യാറാകാതെ വന്നതോടെ എഡിഎംകെ അംഗങ്ങള്‍ നടുത്തളത്തില്‍ ഇറങ്ങി പ്രതിഷേധിച്ചു. ഇതോടെ സഭ ഇന്നത്തേക്ക് പിരിയുകയാണെന്ന് രാജ്യസഭാ അധ്യക്ഷന്‍ വെങ്കയ്യ നായിഡു അറിയിച്ചു.ബില്‍ സംബന്ധിച്ച ചര്‍ച്ചയില്‍ ഇരുപക്ഷവും രൂക്ഷമായ വാക്‌പോരാണ് നടത്തിയത്. പലവട്ടം സഭ നിര്‍ത്തിവയ്‌ക്കേണ്ടിവന്നു.
കോണ്‍ഗ്രസ്, തൃണമൂല്‍ കോണ്‍ഗ്രസ്, എഡിഎംകെ, ഡിഎംകെ, ഇടതു പാര്‍ട്ടികള്‍, സമാജ്‌വാദി പാര്‍ട്ടി, ബിഎസ്പി എന്നിവരാണ് ബില്ലിനെതിരെ ശക്തമായി രംഗത്തുവന്നത്. പ്രതിഷേധ മുയരുമെന്ന വിലയിരുത്തലില്‍ കോണ്‍ഗ്രസും ബിജെപിയും വിപ്പ് പുറപ്പെടുവിച്ചിരുന്നു. മുത്തലാക്ക് ക്രിമിനല്‍ കുറ്റമാക്കുന്നതിനായി കേന്ദ്ര സര്‍ക്കാര്‍ കൊണ്ടുവന്ന ഒരു ബില്‍ നിലവില്‍ രാജ്യസഭ പരിഗണിക്കുന്നുണ്ട്. ബില്ല് സെലക്ട് കമ്മിറ്റിക്കു വിടണമെന്നു കോണ്‍ഗ്രസ് ഭേദഗതി നിര്‍ദേശം അവതരിപ്പിച്ചതോടെ ബില്‍ പരിഗണിക്കുന്നത് നേരത്തെ സര്‍ക്കാര്‍ മാറ്റിവയ്ക്കുകയായിരുന്നു.
അതിനു പിന്നാലെയാണ് ഇതേ വിഷയത്തില്‍ പുതിയ ബില്‍ ലോക്‌സഭയില്‍ അവതരിപ്പിച്ച് പാസാക്കിയെടുത്തത്. ഈ ബില്ലാണ് ഇന്നു രാജ്യസഭയില്‍ അവതരി പ്പിക്കാന്‍ ഒരുങ്ങിയത്.