കോണ്‍ഗ്രസിന്റെ തെരഞ്ഞെടുപ്പ് പ്രവര്‍ത്തനങ്ങള്‍ക്ക് തുടക്കം കുറിക്കാന്‍ എ.ഐ.സി.സി അധ്യക്ഷന്‍ രാഹുല്‍ ഗാന്ധി 24ന് കേരളത്തിലെത്തും. എറണാകുളത്ത് ബൂത്ത് പ്രസിഡന്റുമാരുടെയും വൈസ് പ്രസിഡന്റുമാരുടെയും യോഗത്തില്‍ അദ്ദേഹം പങ്കെടുക്കുമെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ അറിയിച്ചു.രാഹുലിന്റെ സന്ദര്‍ശനത്തിന് മുന്നോടിയായി കേരളത്തിന്റെ ചുമതലയുള്ള ജന.സെക്രട്ടറി മുകുള്‍ വാസ്‌നിക് നാളെ മുതല്‍ 16വരെ കാസര്‍കോട് മുതല്‍ തിരുവനന്തപുരം വരെ പര്യടനം നടത്തി പ്രവര്‍ത്തകരുമായി നേരിട്ട് സംവദിക്കും.

ജനുവരി ഒമ്പതിന് കെ.പി.സി.സി ജനറല്‍ ബോഡി യോഗം ചേരും. ജനുവരി 16 മുതല്‍ 18 വരെ ഡി.സി.സി ഭാരവാഹികളുടെയും ബ്ലോക്ക് പ്രസിഡന്റുമാരുടെയും മേഖലതല യോഗം. 16ന് തിരുവനന്തപുരത്തും 17ന് തൃശൂരും 18ന് കണ്ണൂരിലുമായാണ് യോഗം. ബ്ലോക്ക്, മണ്ഡലം കണ്‍വെന്‍ഷനുകള്‍ ഈ മാസത്തോടെ പൂര്‍ത്തിയാകും. 22, 23 തീയതികളില്‍ നെയ്യാര്‍ഡാമിലെ രാജീവ് ഗാന്ധി ഇന്‍സ്റ്റിറ്റിയൂട്ടില്‍ നേതൃത്വ ശില്‍പശാല. ഫെബ്രുവരി ഒന്ന് മുതല്‍ 25വരെ കെ.പി.സി.സി അധ്യക്ഷന്‍ 140 നിയമസഭാ മണ്ഡലങ്ങളിലും പര്യടനം നടത്തും. 22ന് രാഷ്ട്രീയകാര്യ സമിതി യോഗം വീണ്ടും ചേരും.