പകല്‍ നൃത്തവും സ്‌റ്റേജ് പരിപാടികളും യുട്യൂബ് വിഡിയോയുമായി അരങ്ങു തകര്‍ക്കുന്ന അരുണ്‍ അതി പ്രശസ്തനാണ്. ത്രസിപ്പിക്കുന്ന നൃത്തചുവടുകളിലൂടെ അനേകായിരങ്ങളുടെ ഹൃദയത്തില്‍ സ്ഥിര പ്രതിഷ്ഠ നേടാന്‍ അരുണിനായി.

എന്നാല്‍ ആരാധകരുടെ ഹൃദയം തകര്‍ക്കുന്ന വെളിപ്പെടുത്തലുമായി രംഗത്തു വന്നിരിക്കുകയാണ് ഡല്‍ഹി പൊലീസ്. സൂര്യന്‍ അസ്തമിച്ചാല്‍ ഡല്‍ഹിയെ വിറപ്പിക്കുന്ന വിദഗ്ദരായ എട്ടംഗ മോഷണ സംഘത്തിന്റെ തലവനാണ് അരുണ്‍കുമാര്‍ എന്നാണ് പോലീസിന്റെ വെളിപ്പെടുത്തല്‍.

യു ട്യൂബിലെ അതിപ്രശസ്തനായ നര്‍ത്തകന്റെ മറ്റൊരു മുഖം തിരിച്ചറിയാന്‍ പൊലീസിനെ സഹായിച്ചത് ജാംഗ്പുരയിലെ ഒരു വീട്ടില്‍ അടുത്തിടെ നടത്തിയ മോഷണമാണ്. അമര്‍ജീത് മാര്‍വ്വ എന്നയാളുടെ പരാതിയിന്മേലാണ് കുരുക്ക്. ഡിസംബര്‍ 23-ന് മോഷ്ടാക്കള്‍ തന്റെ വീട്ടില്‍ കയറി വാതില്‍ തകര്‍ത്ത് 4.5 ലക്ഷം രൂപയും വിലപിടിപ്പുള്ള ആഭരണങ്ങളും മോഷ്ടിച്ചതായി അമര്‍ജീത് മാര്‍വ്വ പരാതി നല്‍കി. തുടര്‍ന്ന് സിസിടിവി ദൃശ്യങ്ങള്‍ പരിശോധിച്ചതോടെയാണ് അരുണ്‍ പിടിയിലായത്.

മോഷണം നടത്താനുളള വീടുകള്‍, പകല്‍ സന്ദര്‍ശിച്ച് ഉറപ്പു വരുത്തി രാത്രികളില്‍ മോഷ്ടിക്കുന്നതായിരുന്നു ഇവരുടെ രീതി. അതിവിദഗ്ദ്ധനായ ഒരു ഡ്രൈവര്‍, അഞ്ചുമിനിട്ടുളളില്‍ ഏതും പൂട്ടു തുറക്കുന്ന കൊല്ലപ്പണിക്കാരന്‍ തുടങ്ങിയവര്‍ ഇവരുടെ സംഘത്തിലുണ്ട്. കൊല്ലപ്പണിക്കാരന്‍ പൂട്ടു തുറക്കുന്നതോടെ മൂന്ന് പേര്‍ മോഷ്ടിക്കാനായി അകത്തു കടക്കും. മറ്റുളളവര്‍ പുറത്ത് നിരീക്ഷിക്കുകയും ചെയ്യുന്നതാണ് ഇവരുടെ രീതി. സംഘത്തിലെ എട്ടു പേര്‍ക്കും കൃത്യമായ റോളുകള്‍ ഉണ്ടായിരുന്നു. എല്ലാവരുടേയും കയ്യില്‍ വോക്കിടോക്കിയുടെ കൂടെ ഫലം ചെയ്യുന്ന പ്രത്യേക ചൈനീസ് ഫോണുണ്ടെന്ന് പൊലീസ് പറയുന്നു.

ഇവരില്‍ നിന്നും ഒരു എസ്‌യുവിയും 10 ലക്ഷത്തോളം രുപ വിലവരുന്ന സ്വര്‍ണ്ണ-വജ്രാഭരണങ്ങളും പിടിച്ചെടുത്തു. സിസിടിവിയില്‍ പതിഞ്ഞ ദൃശ്യങ്ങളില്‍ നിന്ന് വീടിന് സമീപത്ത് ബൈക്കിനടുത്ത് നില്‍ക്കുന്ന ചില വ്യക്തികളുടെ ദൃശ്യങ്ങള്‍ കിട്ടിയിരുന്നു. തുടര്‍ന്ന് നടത്തിയ അന്വേഷണമാണ് അരുണില്‍ എത്തിയത്. ഡല്‍ഹിയില്‍ വിവാഹങ്ങളിലും പാര്‍ട്ടികളിലും സ്‌റ്റേജ് പ്രോഗ്രാം നടത്തുന്ന പ്രൊഫഷണല്‍ നൃത്തസംഘത്തിലുളളയാളാണ് അരുണ്‍.