ഉത്തര്പ്രദേശിലെ ബുലന്ദ്ശഹറില് ആള്ക്കൂട്ട ആക്രമണത്തില് പോലീസ് ഉദ്യോഗസ്ഥന് ഉള്പ്പെടെ രണ്ടുപേര് കൊല്ലപ്പെട്ട കേസിലെ പ്രധാന പ്രതി അറസ്റ്റില്
ഉത്തര്പ്രദേശിലെ ബുലന്ദ്ശഹറില് ആള്ക്കൂട്ട ആക്രമണത്തില് പോലീസ് ഉദ്യോഗസ്ഥന് ഉള്പ്പെടെ രണ്ടുപേര് കൊല്ലപ്പെട്ട കേസിലെ പ്രധാന പ്രതിയായ ബജ്റങ്ദള് നേതാവ് അറസ്റ്റില്. സംഘടനയുടെ പ്രാദേശിക കണ്വീനര് യോഗേഷ് രാജാണു പിടിയിലായത്. കഴിഞ്ഞമാസം മൂന്നിനു നടന്ന സംഭവശേഷം ഒളിവിലായിരുന്ന രാജ് ബുധനാഴ്ച രാത്രി പതിനൊന്നരയോടെ ദേശീയപാത 91ലെ ഖുര്ജാ ടിപോയിന്റില്നിന്നാണു വലയിലായതെന്നു പോലീസ് അറിയിച്ചു. ഇതോടെ ബുലന്ദ്ശഹര് അക്രമസംഭവത്തില് പിടിയിലായവരുടെ എണ്ണം 31 ആയി. കേസില് പ്രതികളായ മൂന്നുപേര് ബുധനാഴ്ച ബുലന്ദ്ശഹറിലെ പ്രാദേശിക കോടതിയില് കീഴടങ്ങിയിരുന്നു.
അതേസമയം രാജിനു നിയമസഹായം നല്കുമെന്നു ബജ്റങ്ദളിന്റെ പടിഞ്ഞാറന് ഉത്തര്പ്രദേശ് യൂണിറ്റ് ഭാരവാഹികള് അറിയിച്ചു. പ്രവര്ത്തകര്ക്കെതിരായ കേസുകള് കൈകാര്യം ചെയ്യാന് പത്തോളം അഭിഭാഷകര് അടങ്ങിയ പാനല് രൂപീകരിച്ചിട്ടുണ്ടെന്നും അവര് പറഞ്ഞു. ചത്ത പശുക്കളുടെ അവശിഷ്ടങ്ങള് കണ്ടെത്തിയെന്നാരോപിച്ച് ബുലന്ദ്ശഹറിലെ സിയാനാ പ്രദേശത്ത് ഡിസംബര് മൂന്നിനാണു സംഘര്ഷം പൊട്ടിപ്പുറപ്പെട്ടത്. സ്ഥിതിഗതികള് നിയന്ത്രിക്കാനെത്തിയ പോലീസ് ഇന്സ്പെക്ടര് സുബോധ് കുമാര് സിങ്ങും സാധാരണക്കാരനായ സുമിത് കുമാറും ആള്ക്കൂട്ട ആക്രമണത്തില് കൊല്ലപ്പെട്ടു. വീട്ടില്നിന്നു പശുവിറച്ചി കണ്ടെത്തിയെന്നാരോപിച്ച് ആള്ക്കൂട്ടം തല്ലിക്കൊന്ന അഖ്ലാഖിന്റെ കേസ് അന്വേഷിച്ചത് സുബോധ് കുമാര് ഉള്പ്പെട്ട പോലീസ് സംഘമായിരുന്നു. ഇതോടെ സുബോധ് കുമാറിനെ കരുതിക്കൂട്ടി കൊലപ്പെടുത്തുകയാണെന്ന ആക്ഷേപം ശക്തമായി.
https://www.facebook.com/Malayalivartha
