മേഘാലയയില്‍ ഖനിയില്‍ കുടുങ്ങിയവരെ രക്ഷിക്കാനുള്ള നീക്കങ്ങള്‍ മന്ദഗതിയില്‍. ഖനിക്കുള്ളിലെ വെള്ളം പുറത്തേക്ക് തള്ളാന്‍ കൊണ്ടുവന്ന ശക്തിയേറിയ പമ്പുകളില്‍ ഭൂരിഭാഗവും വെള്ളിയാഴ്ചയും സ്ഥാപിച്ചില്ല. വിവിധ സര്‍ക്കാര്‍, സ്വകാര്യ സ്ഥാപനങ്ങളില്‍നിന്ന് എത്തിച്ച 13 പമ്പുകളില്‍ മൂന്നെണ്ണം മാത്രമാണ് ഇപ്പോള്‍ പ്രവര്‍ത്തിപ്പിക്കുന്നതെന്ന് രക്ഷാപ്രവര്‍ത്തന സംഘത്തിന്റെ വക്താവ് ആര്‍. സുസ്ങി പറഞ്ഞു. ബാക്കി പമ്പുകള്‍ സ്ഥാപിക്കാനുള്ള ശ്രമം പുരോഗമിക്കുകയാണ്. 15 തൊഴിലാളികളാണ് മൂന്ന് ആഴ്ചയിലേറെയായി കല്‍ക്കരി ഖനിയില്‍ കുടുങ്ങിക്കിടക്കുന്നത്. കോള്‍ ഇന്ത്യയുടെ പ്രത്യേക മോട്ടോര്‍ പമ്പ് സ്ഥാപിക്കുന്നതിനുള്ള പ്രതലത്തിന്റെ നിര്‍മാണം കഴിഞ്ഞു.
കിര്‍ലോസ്‌കര്‍ കമ്പനിയുടെ പമ്പുകളും സ്ഥാപിച്ചുകൊണ്ടിരിക്കുകയാണ്. ഒരുക്കം പൂര്‍ത്തിയായാലുടന്‍ പമ്പ് പ്രവര്‍ത്തനം ആരംഭിക്കുമെന്ന് വക്താവ് കൂട്ടിച്ചേര്‍ത്തു. പ്രധാന തുരങ്കത്തിലെ ജലനിരപ്പ് നിലവിലെ 160 അടിയില്‍നിന്ന് 100 അടിയിലെത്തിയാലേ രക്ഷാപ്രവര്‍ത്തനം പുനരാരംഭിക്കാനാകൂവെന്നാണ് നാവികസേനയിലെയും ദേശീയ ദുരന്തനിവാരണ സേനയിലെയും വിദഗ്ധരുടെ പക്ഷം.