ഉത്തര്‍പ്രദേശ് സര്‍ക്കാര്‍ പ്രൈമറി ഫിസിക്കല്‍ എഡ്യൂക്കേഷന്‍ ടീച്ചേഴ്‌സ് നിയമത്തിനുള്ള പരീക്ഷയില്‍ മാര്‍ക്ക് ഷീറ്റില്‍ 88% മാര്‍ക്ക് നേടി എത്തിയ ഉദ്യോഗാര്‍ത്ഥിയുടെ പൊതുവിജ്ഞാനം കണ്ട് വിദ്യാഭ്യാസ വകുപ്പ് ഞെട്ടി. അധ്യാപക നിയമത്തില്‍ വ്യാജന്മാര്‍ കടന്നുകൂടിയെന്ന് വിവരം ലഭിച്ചതിനെ തുടര്‍ന്ന് വിദ്യാഭ്യാസ വകുപ്പ് നടത്തിയ പരീക്ഷയില്‍, എത്തിയ ആള്‍ വ്യാജനാണെന്ന് കണ്ടെത്തുകയായിരുന്നു.

വ്യാജന്മാര്‍ നിയമനം നേടിയെന്ന് വിവരം ലഭിച്ചതിനാല്‍,നിയമനം ലഭിച്ചവര്‍ക്കായി ഉദ്യോഗസ്ഥര്‍ പരീക്ഷ നടത്തി. മനുഷ്യ ശരീരത്തിലെ അസ്ഥികളുടെ എണ്ണം 256 ആണെന്ന് എഴുതിയ ഒന്നാം റാങ്കുകാരന്‍ അഷിഷ് കുമാര്‍ (28) തനിക്ക് നാലാം ക്ലാസിലെ കണക്ക് പോലും നിശ്ചയമില്ലെന്ന് തെളിയിക്കുകയും ചെയ്തു. ഭണ്ഡാരി സ്വദേശിയാണ് ആഷിഷ് കുമാര്‍.

പ്രൈമറി സ്‌കൂള്‍ തലത്തില്‍ 12,460 അധ്യാപകരുടെ ഒഴിവുകളിലേക്കാണ് 2015-ല്‍ സര്‍ക്കാര്‍ വിജ്ഞാപനം ഇറക്കിയത്. ഉദ്യോഗാര്‍ത്ഥികളെ അവര്‍ സമര്‍പ്പിച്ച മാര്‍ക്ക് ഷീറ്റിന്റെ അടിസ്ഥാനത്തില്‍ നിയമിക്കുകയും ചെയ്തു. 2018 മേയ് മൂന്നിനാണ് ആഷിഷ് കുമാറിന് നിയമനം നല്‍കിയത്. കോളജില്‍ എത്തിയ മാര്‍ക്ക് ഷീറ്റ് ഒത്തുനോക്കാതെയായിരുന്നു നിയമനം.

എന്നാല്‍ പലരുടെയും മാര്‍ക്ക് ഷീറ്റ് വ്യാജമാണെന്നും പലരും കോളജിന്റെ പടിപോലും കണ്ടിട്ടില്ലെന്നും അധികൃതര്‍ക്ക് രഹസ്യ വിവരം കിട്ടിയതോടെയാണ് പരിശോധന തുടങ്ങിയത്. വിദ്യാഭ്യാസ വകുപ്പ് മേധാവി നേഹ ജെയിന്റെ നേതൃത്വത്തിലായിരുന്നു പരിശോധന. ആഷിഷ് വ്യാജ മാര്‍ക്ക്ഷീറ്റ് ആണ് സമര്‍പ്പിച്ചതെന്ന് കണ്ടെത്തിയിരുന്നു. ആഷിഷ് കോളജില്‍ പഠിച്ചിട്ടില്ലെന്നും അന്വേഷണ സംഘം കണ്ടെത്തി.

ബാച്‌ലര്‍ ഓഫ് ഫിസിക്കല്‍ എഡ്യുക്കേഷന്‍ (ബിപെഡ്), ബേസിക് ട്രെയിനിംഗ് സര്‍ട്ടിഫിക്കറ്റ് (ബിടിസി) എന്നിവ ആഷിഷ് വിദ്യാഭ്യാസ വകുപ്പിന് നല്‍കിയിരുന്നു. ആഗ്രയിലെ കോളജില്‍ പഠിച്ചുവെന്നാണ് സര്‍ട്ടിഫിക്കറ്റില്‍ പറഞ്ഞിരുന്നത്. എന്നാല്‍ കോളജില്‍ ഒരിടത്തും ആഷിഷ് കുമാര്‍ പഠിച്ചതിന്റെ ഒരു രേഖയുമുണ്ടായിരുന്നില്ല. ഇതേതുടര്‍ന്ന് അന്വേഷണ സംഘത്തിനു മുമ്പാകെ ഹാജരാകണമെന്ന് കാണിച്ച് അഞ്ചു തവണ നോട്ടീസ് നല്‍കി. ഹാജരാകാതെ വന്നതോടെയാണ് ഇയാളെ കസ്റ്റഡിയിലെടുത്തത്.

തുടര്‍ന്ന് അന്വേഷണ സംഘം ഇയാളുടെ വിജ്ഞാനം പരിശോധിക്കാന്‍ കുറച്ച് ചോദ്യങ്ങള്‍ ചോദിച്ചു. ഉത്തരംകേട്ട് അന്വേഷണ സമിതി ഞെട്ടിപ്പോയി. നാലാം ക്ലാസ് നിലവാരത്തിലുള്ള ഗണിത സമവാക്യങ്ങള്‍ പോലും 'ബിരുദധാരിക്ക്' അറിയില്ല. ഇയാള്‍ക്കെതിരെ തട്ടിപ്പും വഞ്ചനയും വ്യാജരേഖ ചമച്ചതും അടക്കം വിവിധ വകുപ്പുകള്‍ പ്രകാരം കേസെടുത്തതായി അധികൃതര്‍ വ്യക്തമാക്കി.