കര്‍ണാടകയിലെ ശിവമോഗയില്‍ കുരുങ്ങുപനി പിടിച്ചതിനെ തുടര്‍ന്ന് അഞ്ച് പേര്‍ മരിച്ചു. സാഗര്‍ താലൂക്കില്‍ നിന്നുള്ളവരാണ് മരിച്ചത്. കുരങ്ങുപനി ഭീഷണിയെ തുടര്‍ന്ന് രണ്ടായിരത്തിലധികം പേര്‍ക്ക് ഇതിനോടകം പ്രതിരോധ വാക്‌സിന്‍ നല്‍കിയെന്ന് ആരോഗ്യവകുപ്പ് അധികൃതര്‍ . ശിവമോഗയില്‍ മാത്രം 15 പേരില്‍ കുരങ്ങുപനി സ്ഥിരീകരിച്ചിട്ടുണ്ട്. പനി വ്യാപിക്കുന്നുവെന്ന റിപ്പോര്‍ട്ട് പുറത്തുവന്നതിനു പിന്നാലെ ആരോഗ്യവകുപ്പ് അധികൃതര്‍ക്കെതിരെ പ്രതിഷേധവുമായി ഗ്രാമവാസികളും രംഗത്തെത്തിയിരിക്കുകയാണ്.

ആരോഗ്യപ്രവര്‍ത്തകരുടെ അനാസ്ഥയാണ് രോഗം വ്യാപിക്കാന്‍ കാരണമെന്നാണ് പ്രദേശവാസികള്‍ ആരോപിക്കുന്നത്. എന്നാല്‍ ആവശ്യമായ എല്ലാ പ്രതിരോധ പ്രവര്‍ത്തനങ്ങളും നടത്തുന്നുണ്ടെന്നാണ് ആരോഗ്യവകുപ്പ് അധികൃതരുടെ വിശദീകരണം.