കേന്ദ്രസര്ക്കാരിന്റെ തൊഴിലാളിവിരുദ്ധനയങ്ങളില് പ്രതിഷേധിച്ച് അഖിലേന്ത്യ ട്രേഡ് യൂണിയനുകള് ആഹ്വാനം ചെയ്ത 48 മണിക്കൂര് പണിമുടക്ക് ഇന്ന് അര്ധരാത്രി മുതല്
കേന്ദ്രസര്ക്കാരിന്റെ തൊഴിലാളി വിരുദ്ധനയങ്ങളില് പ്രതിഷേധിച്ച് അഖിലേന്ത്യ ട്രേഡ് യൂണിയനുകള് ആഹ്വാനം ചെയ്ത 48 മണിക്കൂര് പണിമുടക്ക് ഇന്ന് അര്ധരാത്രി മുതല് ആരംഭിക്കും. ജനജീവിതം നിര്ബന്ധപൂര്വം സ്തംഭിപ്പിക്കില്ലെന്ന് നേതാക്കള് വ്യക്തമാക്കിയിട്ടുണ്ടെങ്കിലും ബി.എം.എസ് ഒഴികെയുള്ള ട്രേഡ് യൂണിയനുകള് സംയുക്തമായി പ്രഖ്യാപിച്ചതിനാല് ജനജീവിതത്തെ നല്ലരീതിയില് ബാധിക്കാനിടയുണ്ട്. കടകള് നിര്ബന്ധിച്ച് അടപ്പിക്കില്ലെന്നും ട്രെയിന് തടയില്ലെന്നും സി.ഐ.ടി.യു വ്യക്തമാക്കിയിട്ടുണ്ട്. കടകള് തുറക്കുമെന്നാണ് കേരള വ്യാപാരി വ്യവസായി ഏകോപനസമിതിയുടെയും നിലപാട്. തുറക്കേണ്ടവര്ക്ക് തുറക്കാമെന്നും തൊഴിലാളികള് പണിമുടക്കിയാല് എതിര്ക്കില്ലെന്നും വ്യാപാരിവ്യവസായി സമിതിയും വ്യക്തമാക്കി.
ഓള് ഇന്ത്യ ബാങ്ക് എംപ്ലോയീസ് അസോസിയേഷനും ബെഫിയും പണിമുടക്കുന്നതിനാല് ബാങ്കുകളുടെ പ്രവര്ത്തനം സ്തംഭിക്കും. ഓള് ഇന്ത്യ റിസര്വ് ബാങ്ക് എംപ്ലോയീസ് അസോസിയേഷനും ഓള് ഇന്ത്യ റിസര്വ് ബാങ്ക് വര്ക്കേഴ്സ് ഫെഡറേഷനും ചൊവ്വാഴ്ച പണിമുടക്കില് പങ്കെടുക്കും.
കെ.എസ്.ആര്.ടി.സിയില് ബി.എം.എസ് ഒഴികെ യൂണിയനുകള് പണിമുടക്കുന്നതിനാല് ബസുകള് നിരത്തിലിറങ്ങാന് സാധ്യതയില്ല. സ്വകാര്യ ബസ് തൊഴിലാളികളും ഓട്ടോടാക്സി തൊഴിലാളികളും പണിമുടക്കും. ലോറികള് ഓടാത്തതിനാല് ചരക്ക് നീക്കം നിശ്ചലമാകും. അധ്യാപക സംഘടനകളും സര്വിസ് സംഘടനകളും പിന്തുണ പ്രഖ്യാപിച്ചിട്ടുള്ളതിനാല് വിദ്യാലയങ്ങളുടെയും സര്ക്കാര് ഓഫിസുകളുടെയും പ്രവര്ത്തനത്തെയും ബാധിക്കും.
https://www.facebook.com/Malayalivartha
