തമിഴ്‌നാട് സ്‌പോര്‍ട്‌സ് മന്ത്രി ബാലകൃഷ്ണ റെഡ്ഡിക്ക് പൊതുമുതല്‍ നശിപ്പിച്ച കേസില്‍ മൂന്നുവര്‍ഷത്തെ തടവുശിക്ഷ. ചെന്നൈ പ്രത്യേക കോടതിയുടെ വിധിയെ തുടര്‍ന്ന് റെഡ്ഡി മന്ത്രിസ്ഥാനം രാജിവെച്ചു. കോടതിയില്‍ നിന്ന് ഔദ്യോഗിക വാഹനമൊഴിവാക്കി ചെന്നൈ ഗ്രീംസ് റോഡിലെ മുഖ്യമന്ത്രി എടപ്പാടി പളനിസാമിയുടെ വസതിയില്‍ചെന്നാണ് രാജിക്കത്ത് കൈമാറിയത്.
പിന്നീട് മുഖ്യമന്ത്രി നിയമവിദഗ്ധരുമായും മുതിര്‍ന്ന മന്ത്രിമാരുമായും കൂടിയാലോചന നടത്തിയതിനുശേഷം രാജി സ്വീകരിച്ചു. രാജിക്കത്ത് ഗവര്‍ണര്‍ക്ക് അയച്ചിട്ടുണ്ട്. '98ല്‍ ഡി.എം.കെ ഭരണകാലത്ത് വിഷമദ്യദുരന്തത്തില്‍ 33 പേര്‍ മരിച്ച സംഭവമായി ബന്ധപ്പെട്ട് ഹൊസൂരില്‍ നടന്ന പ്രതിഷേധ സമര പരിപാടിക്കിടെ കല്ലേറിലും മറ്റും ബസുകള്‍ ഉള്‍പ്പെടെ നിരവധി വാഹനങ്ങള്‍ തകര്‍ക്കപ്പെട്ടു. ഇതുമായി ബന്ധപ്പെട്ട് റെഡ്ഡിയടക്കം 108 പേര്‍ക്കെതിരെ കേസെടുത്തിരുന്നു. ഇതില്‍ 16 പേര്‍ കുറ്റവാളികളാണെന്ന് കോടതി കണ്ടെത്തി.
ബാലകൃഷ്ണ റെഡ്ഡിക്ക് മൂന്നുവര്‍ഷത്തെ തടവിന് പുറമെ 10,500 രൂപ പിഴശിക്ഷയും വിധിച്ചിട്ടുണ്ട്. മേല്‍ക്കോടതിയില്‍ അപ്പീല്‍ സമര്‍പ്പിക്കുന്നതുവരെ ശിക്ഷ നിര്‍ത്തിവെക്കണമെന്നാവശ്യപ്പെട്ടുള്ള റെഡ്ഡിയുടെ അപേക്ഷ സ്വീകരിച്ച കോടതി ശിക്ഷ താല്‍ക്കാലികമായി തടഞ്ഞ് ജാമ്യമനുവദിച്ചു. അതേസമയം, ജനപ്രാതിനിധ്യ നിയമപ്രകാരം ബാലകൃഷ്ണ റെഡ്ഡിയുടെ മന്ത്രിപദവിയും എം.എല്‍.എ സ്ഥാനവും നിയമപരമായി നിലനിര്‍ത്താനാവില്ലെന്ന് ഉപദേശം ലഭിച്ചതിനെ തുടര്‍ന്നാണ് രാജി വെക്കാന്‍ തീരുമാനിച്ചത്. ഇരുപതു വര്‍ഷം മുമ്പ് നടന്ന സംഭവവുമായി ബന്ധപ്പെട്ട കേസാണിതെന്നും ചൊവ്വാഴ്ച ഹൈകോടതിയില്‍ അപ്പീല്‍ നല്‍കുമെന്നും റെഡ്ഡി അറിയിച്ചു.