തങ്ങളുടെ കൂട്ടത്തില്‍ കൂടാത്ത സഖ്യകക്ഷികള്‍ ലോക്‌സഭാ തിരഞ്ഞെടുപ്പില്‍ തോല്‍ക്കുമെന്ന ബി.ജെ.പി അദ്ധ്യക്ഷന്‍ അമിത് ഷായുടെ പ്രസ്‌താവനയ്‌ക്ക് രൂക്ഷമായ ഭാഷയില്‍ മറുപടി നല്‍കി ശിവസേനാ പ്രസിഡന്റ് ഉദ്ദവ് താക്കറെ രംഗത്തെത്തി. ശിവസേനയെ തോല്‍പ്പിക്കാന്‍ കഴിവുള്ളവര്‍ ഇനി ജനിക്കണമെന്ന് പറഞ്ഞ താക്കറെ രാജ്യത്തെ ആദായ നികുതി പരിധി 2.5 ലക്ഷത്തില്‍ നിന്ന് 8 ലക്ഷമാക്കി ഉയര്‍ത്തണമെന്നും ആവശ്യപ്പെട്ടു. 8 ലക്ഷംരൂപ വരെ വരുമാനമുള്ള മുന്നാക്ക സമുദായ അംഗങ്ങള്‍ക്ക് സംവരണം ഏര്‍പ്പെടുത്തിയ തീരുമാനത്തെ കളിയാക്കി കൊണ്ടായിരുന്നു ഉദ്ദവിന്റെ പരാമര്‍ശം. മുംബയില്‍ ശിവസേനാ പ്രവര്‍ത്തകരെ അഭിസംബോധന ചെയ്‌ത് സംസാരിക്കുകയായിരുന്നു അദ്ദേഹം.

ശിവസേനയെ തോല്‍പ്പിക്കാന്‍ കഴിവുള്ളവര്‍ ഭൂമിയില്‍ ഇതുവരെ ജനിച്ചിട്ടില്ല. ശിവസേനയോട് കളിക്കാന്‍ ശ്രമിച്ചവര്‍ക്കെല്ലാം അതിന്റെ ഫലം ലഭിച്ചിട്ടുണ്ടെന്നും താക്കറെ പറഞ്ഞു. രാമക്ഷേത്ര നിര്‍മാണം ഉയര്‍ത്തി ബി.ജെ.പി വോട്ടുപിടിക്കുന്നതിനെയും താക്കറെ രൂക്ഷമായ ഭാഷയിലാണ് വിമര്‍ശിച്ചത്. അയോധ്യ വിഷയത്തില്‍ കോടതി വിധി കാത്തിരിക്കാനാണ് ബി.ജെ.പി തീരുമാനം. കോടതിയുടെ പരിഗണനയിലുള്ള കേസ് ഉയര്‍ത്തിക്കാട്ടി ഇനിയും ബി.ജെ.പി വോട്ടുപിടിക്കുന്നത് മാന്യതയല്ല. ബാബരി മസ്‌ജിദ് പൊളിച്ചപ്പോള്‍ കോടതിയുടെ മുന്നില്‍ കേസുണ്ടായിരുന്നില്ലേയെന്നും അദ്ദേഹം ചോദിച്ചു. രാമജന്മഭൂമി വിഷയം ഉയര്‍ത്തിക്കാട്ടി വരുന്ന തിരഞ്ഞെടുപ്പില്‍ ബി.ജെ.പിയുടെ തനിനിറം വെളിപ്പെടുത്തുമെന്നും ഉദ്ദവ് പറഞ്ഞു. രാമക്ഷേത്ര നിര്‍മാണത്തിന് കോണ്‍ഗ്രസാണ് തടസം നില്‍ക്കുന്നതെന്ന ബി.ജെ.പി വാദവും അദ്ദേഹം തള്ളിക്കളഞ്ഞു. ഇക്കാര്യത്തില്‍ കോണ്‍ഗ്രസിനെ മാത്രം കുറ്റപ്പെടുത്തിയിട്ട് കാര്യമില്ല. ബി.ജെ.പിയുടെ കൂടെയുള്ള നിതീഷ് കുമാറും രാം വിലാസ് പാസ്വാനും രാമക്ഷേത്രത്തെ എതിര്‍ക്കുന്നവരാണെന്നും അദ്ദേഹം കൂട്ടിച്ചേര്‍ത്തു.