സി.ബി.ഐ. ഡയറക്ടര്‍ സ്ഥാനത്തുനിന്നു നീക്കിയ അലോക് വര്‍മക്കെതിരേ സി.ബി.ഐ. അന്വേഷണത്തിനു കേന്ദ്ര വിജിലന്‍സ് കമ്മിഷ(സി.വി.സി)ന്റെ ശിപാര്‍ശയെന്നു സൂചന. ഇറച്ചി വ്യവസായി മൊയിന്‍ ഖുറേഷി മുഖ്യപ്രതിയായ, ഹവാല ഇടപാടു കേസാണു സി.വി.സി. പ്രധാനമായും ചൂണ്ടിക്കാട്ടുക എന്നറിയുന്നു. രഹസ്യാന്വേഷണ ഏജന്‍സിയായ റോ കൈമാറിയ നാലു ടെലിഫോണ്‍ സംഭാഷണ തെളിവുകളുടെ അടിസ്ഥാനത്തിലായിരിക്കും അന്വേഷണം.

അതിനിടെ, അലോക് വര്‍മയ്‌ക്കെതിരേ ആറു പരാതികള്‍ കൂടി സി.വി.സിക്കു ലഭിച്ചതായി സൂചനയുണ്ട്. ഇവയിലും അന്വേഷണം ആരംഭിച്ചു. ബാങ്ക് തട്ടിപ്പ് നടത്തിയ വജ്ര വ്യാപാരി നീരവ് മോഡിക്കും മദ്യവ്യവസായി വിജയ് മല്യക്കുമെതിരായ അന്വേഷണത്തില്‍ ഇടപെട്ടെന്ന ആരോപണങ്ങളാണ് ഇവയില്‍ പ്രധാനം. ലുക്കൗട്ട് നോട്ടീസില്‍ വരുത്തിയ ഇളവുകളാണു രാജ്യം വിടാന്‍ മല്യക്കും എയര്‍സെല്‍ പ്രമോട്ടര്‍ സി. ശിവശങ്കരനും രാജ്യം വിടാന്‍ സഹായകമായതെന്ന് ആരോപണമുയര്‍ന്നിരുന്നു.

യു.പി. തീവ്രവാദവിരുദ്ധ സ്‌ക്വാഡ് (എ.ടി.എസ്) അഡീഷണല്‍ എസ്.പിയായിരുന്ന രാജേഷ് സാഹ്‌നി ജീവനൊടുക്കിയ കേസ് സി.ബി.ഐ. അന്വേഷണത്തിനു വിടാന്‍ സംസ്ഥാന സര്‍ക്കാര്‍ ശിപാര്‍ശ ചെയ്തിട്ടും അന്വേഷണം ഏറ്റെടുക്കാതിരുന്നതു യു.പി. പോലീസിലെ ചിലരെ രക്ഷിക്കാനായുള്ള വര്‍മയുടെ ഇടപെടല്‍ മൂലമാണെന്ന് ആരോപണമുണ്ട്.

ദേശീയ ഗ്രാമീണ ആരോഗ്യ ദൗത്യം (എന്‍.ആര്‍.എച്ച്.എം) കുംഭകോണക്കേസില്‍ ചിലരെ സംരക്ഷിച്ചെന്നും പറയപ്പെടുന്നു. ഇവ സംബന്ധിച്ച ഫയലുകള്‍ സമര്‍പ്പിക്കാന്‍ സി.വി.സി., സി.ബി.ഐയോടു ആവശ്യപ്പെട്ടിരുന്നു.അലോക് വര്‍മ കൈക്കൂലി വാങ്ങിയതിനു തെളിവില്ലെന്ന് സി.വി.സി. അന്വേഷണത്തിനു മേല്‍നോട്ടം വഹിച്ച ജസ്റ്റിസ് എ.കെ. പട്‌നായിക് വെളിപ്പെടുത്തിയതിനു പിന്നാലെയാണ് വര്‍മയ്‌ക്കെതിരായ നീക്കം

മോയിന്‍ ഖുറേഷിയുമായി ബന്ധപ്പെട്ട കേസില്‍ ഹൈദരാബാദ് വ്യവസായി സതീഷ് സനയെ രക്ഷപ്പെടുത്താന്‍ അലോക് വര്‍മ രണ്ട് കോടി രൂപ കൈക്കൂലി വാങ്ങിയെന്നാണു സി.ബി.ഐ സ്‌പെഷല്‍ ഡയറക്ടര്‍ രാകേഷ് അസ്താന ആരോപിച്ചിരുന്നത്. ഇതിന്റെ അടിസ്ഥാനത്തിലാണ് സി.വി.സി. അന്വേഷണം നടത്തിയത്.

വര്‍മയ്‌ക്കെതിരേ ക്രിമിനല്‍ക്കേസില്‍ അന്വേഷണം നടത്താന്‍ തക്ക ഗൗരവമുള്ള ആരോപണങ്ങളുണ്ടെന്ന റിപ്പോര്‍ട്ടാണ് പ്രധാനമന്ത്രി അധ്യക്ഷനായ ഉന്നതാധികാര സമിതിക്കു മുന്നിലെത്തിയതെന്നാണു സൂചന. അതേസമയം, സി.വി.സി. പക്ഷംപിടിക്കുന്നതായി അലോവര്‍ക് വര്‍മ ആരോപിച്ചു. അസ്താനയെ സംരക്ഷിക്കാന്‍ സി.വി.സി. ശ്രമിക്കുന്നതായും അദ്ദേഹം കുറ്റപ്പെടുത്തി.