മതത്തിന്‍റെ പേരില്‍ കലാപമുണ്ടാക്കാന്‍ ശ്രമിക്കുന്ന രാഷ്ട്രീയക്കാരെ വേണം ആദ്യം കത്തിക്കേണ്ടതെന്ന്  ഉത്തര്‍പ്രദേശ് മന്ത്രിയും സുഹെല്‍ദേവ് ഭാരതീയ സമാജ് വാദി പാര്‍ട്ടി (എസ് ബി എസ് പി) നേതാവുമായ ഒ പി രാജ്ഭര്‍ . അലിഗഡില്‍ നടന്ന റാലിയില്‍ പങ്കെടുക്കവെയാണ് അദ്ദേഹം ഇപ്രകാരം പറഞ്ഞത്.

'ഹിന്ദു-മുസ്ലിം കലാപങ്ങളില്‍ വലിയ രാഷ്ട്രീയക്കാര്‍ കൊല്ലപ്പെട്ടിട്ടുണ്ടോ? എന്തുകൊണ്ട് രാഷ്ട്രീയക്കാരന്‍ കൊല്ലപ്പെടുന്നില്ല? മതത്തിന്‍റെ പേരില്‍ സംഘര്‍ഷം ഉണ്ടാക്കാന്‍ ശ്രമിക്കുന്ന രാഷ്ട്രീയക്കാരെ തീയിലിടണം. അപ്പോള്‍ അവര്‍ക്ക് മനസ്സിലാവും, മറ്റുള്ളവരെ കരിക്കുന്നത് നിര്‍ത്തുകയും ചെയ്യും'- മന്ത്രി പറഞ്ഞു.
വര്‍ഗ്ഗീയകലാപങ്ങളില്‍ എന്നും സാധാരണക്കാര്‍ മാത്രമാണ് കൊല്ലപ്പെടുന്നത്.എന്തുകൊണ്ട് രാഷ്ട്രീയ നേതാക്കള്‍ കൊല്ലപ്പെടുന്നില്ല എന്നായിരുന്നു രാജ്ഭറിന്‍റെ പരാമര്‍ശം. മതത്തിന്‍റെ പേരില്‍ കലാപങ്ങള്‍ അഴിച്ചുവിടാന്‍ ശ്രമിക്കുന്ന രാഷ്ട്രീയക്കാരെ ആദ്യം കത്തിക്കണം. എങ്കില്‍ മാത്രമേ അതിന്‍റെ ഭവിഷ്യത്ത് എത്രത്തോളമാണെന്ന് രാഷ്ട്രീയക്കാര്‍ മനസ്സിലാക്കുകയും മറ്റുള്ളവരെ ഇങ്ങനെ കത്തിക്കുന്നത് നിര്‍ത്തുകയുമുള്ളു എന്നും രാജ്ഭര്‍ പറഞ്ഞു.

ഹിന്ദുക്കള്‍ക്കും മുസ്ലീമുകള്‍ക്കുമിടയില്‍ ഭിന്നത ഉണ്ടാക്കാനാണ് നേതാക്കള്‍ ശ്രമിക്കുന്നത്. എന്നാല്‍ ഇന്ത്യന്‍ ഭരണഘടന പ്രകാരം വോട്ടവകാശമുള്ള ഏതൊരു വ്യക്തിയും ഇന്ത്യന്‍ പൗരനാണ്. അവരെ പുറത്തേക്കെറിയാന്‍ സാധിക്കില്ലെന്നും രാജ്ഭര്‍ കൂട്ടിച്ചേര്‍ത്തു.

അതേസമയം, എന്‍ഡിഎയില്‍ നിന്നും പുറത്ത്പോകുമെന്ന് കഴിഞ്ഞ ദിവസം രാജ്ഭര്‍ പ്രസ്താവിച്ചിരുന്നു. പൊതുതിരഞ്ഞെടുപ്പില്‍ സഖ്യത്തിലേര്‍പ്പെടുന്ന കാര്യത്തില്‍ ഒരു തീരുമാനത്തിലെത്താന്‍ ബിജെപിക്ക് നൂറ് ദിവസം നല്‍കുന്നുവെന്നും അതിനുള്ളില്‍ വ്യക്തമായ മറുപടി ലഭിച്ചില്ലെങ്കില്‍ തന്‍റെ പാര്‍ട്ടി 80 സീറ്റുകളിലും ഒറ്റയ്ക്ക് മത്സരിക്കുമെന്നും അദ്ദേഹം പ്രഖ്യാപിച്ചു.

ബി.ജെ.പി സര്‍ക്കാരിനെതിരെ നിരന്തരം വിമര്‍ശനം ഉന്നയിക്കുന്ന മന്ത്രിയാണ് പുതിയ പരാമര്‍ശം നടത്തിയത്.മുഖ്യമന്ത്രി യോഗി ആദിത്യനാഥിനെതിരെയും രൂക്ഷവിമര്‍ശനങ്ങള്‍ അദ്ദേഹം ഉന്നയിച്ചിരുന്നു. സ്ഥലപ്പേരുകള്‍ മാറ്റുന്നതിന് മുന്‍പ് ചെയ്യേണ്ടിയിരുന്നത് നിങ്ങളുടെ മുസ്ലീം നേതാക്കളുടെ പേരുകള്‍ മാറ്റുകയായിരുന്നുവെന്നും രാജ്ഭര്‍ തുറന്നടിച്ചു.