ബാഹുബലി താരം പ്രഭാസുമായി അവിഹിത ബന്ധമുണ്ടെന്ന തരത്തില്‍ പ്രചരിക്കുന്ന വാര്‍ത്തകള്‍ക്കെതിരെ വൈഎസ് ശര്‍മ്മിള രംഗത്ത്. ആന്ധ്രാ മുന്‍മുഖ്യമന്ത്രി വൈഎസ്ആര്‍ റെഡ്ഡിയുടെ മകളും, വെഎസ്ആര്‍ പാര്‍ട്ടി പ്രസിഡന്റ് ജഗന്‍മോഹന്‍ റെഡ്ഡിയുടെ സഹോദരിയുമാണ് ശര്‍മ്മിള. തന്നെ അപകീര്‍ത്തിപ്പെടുത്തുന്നവര്‍ക്കെതിരേ നടപടിയെടുക്കണം എന്ന ആവശ്യവുമായി അവര്‍ ഹൈദരാബാദ് പൊലീസ് കമ്മീഷണറെ കണ്ട് പരാതി നല്‍കി. ഭര്‍ത്താവ് അനില്‍കുമാറിനൊപ്പം എത്തിയാണ് അവര്‍ പരാതി നല്‍കിയത്.

പ്രഭാസുമായി ബന്ധപ്പെടുത്തി നടക്കുന്ന പ്രചാരണങ്ങള്‍ അസംബന്ധമാണെന്നാണ് ശര്‍മിള പറയുന്നത്. താരവുമായി തനിക്ക് യാതൊരു തരത്തിലുളള ബന്ധവുമില്ല. ഇതുവരെ പ്രഭാസിനോട് നേരിട്ട് സംസാരിച്ചിട്ടില്ലെന്നും അവര്‍ വ്യക്തമാക്കി. ലോക്‌സഭാ തെരഞ്ഞെടുപ്പ് മുന്നില്‍ കണ്ട് തന്റെ പ്രതിച്ഛായ തകര്‍ക്കാന്‍ നടക്കുന്ന ശ്രമങ്ങളുടെ ഭാഗമാണിതെന്നും അവര്‍ കുറ്റപ്പെടുത്തി. തലുങ്ക് ദേശം പാര്‍ട്ടി പ്രവര്‍ത്തകരാണ് ഇതിന് പിന്നിലെന്നും ശര്‍മിള പരാതിയില്‍ പറയുന്നു.

മുന്‍ ആന്ധ്രപ്രദേശ് മുഖ്യമന്ത്രി വൈ.എസ് രാജശേഖര റെഡ്ഡിയുടെ മകളാണ് ശര്‍മിള. 2014 ലെ ഇലക്ഷന് മുന്‍പ് തനിക്കെതിരേ വ്യാജപ്രചരണം ആരംഭിച്ചതാണെന്നാണ് ശര്‍മിള പറയുന്നത്. ഭാര്യ, അമ്മ എന്നീ നിലയിലും രാഷ്ട്രീയ പ്രവര്‍ത്തനം നടത്തുന്ന വ്യക്തിയെന്ന നിലയിലും ഇത്തരം മോശമായ പ്രചരണങ്ങള്‍ നടത്തുന്നത് വളരെ അധികം വേദനിപ്പിച്ചു. ഇതിന് നിശബ്ദയായി ഇരുന്നാല്‍ സുഖകരമല്ലാത്ത കാര്യങ്ങളില്‍ ചെന്ന് അവസാനിക്കും. അതിനാലാണ് പരാതി നല്‍കിയതെന്നും അവര്‍ വ്യക്തമാക്കി.