സംഘര്‍ഷത്തില്‍ നിന്നു രക്ഷപ്പെട്ട് ഓടിയ യുവാവ് ബൈക്ക് ഇടിച്ചു മരിച്ചു. ഡല്‍ഹിയിലെ ഷാഹ്ദര ജില്ലയിലാണു സംഭവം നടന്നത്. അനന്ത്വിഹാര്‍ സ്വദേശിയായ മനീഷാണു മരിച്ചത്. വ്യാഴാഴ്ച രാത്രി മനീഷും സുഹൃത്തുക്കളും മറ്റൊരു സംഘവുമായി വാക്കുതര്‍ക്കത്തില്‍ ഏര്‍പ്പെട്ടിരുന്നു. ഇത് ഏറ്റുമുട്ടലിലേക്കു നീങ്ങിയതോടെ മനീഷ് സംഭവസ്ഥലത്തുനിന്നു രക്ഷപ്പെടാന്‍ ശ്രമിച്ചു. ഇതിനിടെ അമിതവേഗതയില്‍ എത്തിയ ബൈക്ക് മനീഷിനെ ഇടിച്ചുവീഴ്ത്തുകയായിരുന്നു.

ഉടന്‍തന്നെ യുവാവിനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. സംഘര്‍ഷവുമായി ബന്ധപ്പെട്ട് പോലീസ് അഞ്ചുപേരെ അറസ്റ്റ് ചെയ്തു. നിസാരകാര്യത്തിന്റെ പേരില്‍ മദ്യലഹരിയിലാണ് ഇരു സംഘങ്ങളും വാക്കുതര്‍ക്കം തുടങ്ങിയതെന്നു പോലീസ് അറിയിച്ചു.