സ്ത്രീകളുടെ അന്തസ്സിനും സ്വാതന്ത്ര്യത്തിനും മുകളിലല്ല ഒരു മതവിശ്വാസവുമെന്ന് ജസ്റ്റിസ് ഡി.വൈ ചന്ദ്രചൂഡ്. ശബരിമല യുവതീപ്രവേശനം അനുവദിച്ച സുപ്രീംകോടതി വിധി പുറപ്പെടുവിച്ച ഭരണഘടനാ ബെഞ്ചിലെ അംഗവും റിവ്യൂഹര്‍ജി പരിഗണിക്കണോ എന്നുള്ള അപേക്ഷ കേള്‍ക്കുന്ന ബെഞ്ചിലെ അംഗവുമാണ് ജസ്റ്റിസ് ഡി.വൈ ചന്ദ്രചൂഡ്. മുംബയ് ബാര്‍ അസോസിയേഷന്‍ സംഘടിപ്പിച്ച ജസ്റ്റിസ് ദേശായി അനുസമരണ പ്രഭാഷണത്തില്‍ സംസാരിക്കുകയായിരുന്നു അദ്ദേഹം. ഭരണഘടനയുടെ വിവേചന സ്വഭാവമാണ് ശബരിമല യുവതീപ്രവേശനക്കേസില്‍ പ്രതിഫലിച്ചതെന്നും ജ. ഡി.വൈ ചന്ദ്രചൂഡ് വ്യക്തമാക്കി.

ഭരണഘടനയുടെ 25ാം അനുച്ഛേദം അനുസരിച്ച് എല്ലാ പൗരന്‍മാര്‍ക്കും ഇഷ്ടമുള്ള മതത്തില്‍ വിശ്വസിക്കാനും ആ മതത്തിലെ ആചാര അനുഷ്ഠാനങ്ങള്‍ പിന്തുടരാനും പ്രചരിപ്പിക്കാനുമുള്ള അവകാശവും നല്‍കുന്നു. എന്നാല്‍ ഈ അവകാശത്തിന് 25(1) ചില നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. എന്നാല്‍ മതവിഷയങ്ങള്‍ കൈകാര്യം ചെയ്യാനുള്ള അവകാശം അനുവദിക്കുന്ന 26ാം അനുച്ഛേദത്തില്‍ യാതൊരുതരത്തിലുമുള്ള നിയന്ത്രണങ്ങളും ഏര്‍പ്പെടുത്തിയിട്ടില്ല. അതുകൊണ്ട് ഏതെങ്കിലും മതവിഭാഗങ്ങള്‍ക്ക് സ്ത്രീ നിയന്ത്രണം അടക്കമുള്ള വിഷയങ്ങള്‍ കൈകാര്യം ചെയ്യാന്‍ അവര്‍ക്ക് പരിധികളില്ലാത്ത അധികാരമുണ്ടോ എന്നാണ് കോടതി പരിശോധിച്ചതെന്നും ജ. ഡി.വൈ ചന്ദ്രചൂഡ് പറഞ്ഞു.

ഭരണഘടനയിലെ മറ്റ് മൗലിക അവകാശങ്ങള്‍ ബാധിക്കാത്ത തരത്തില്‍ മതങ്ങളുടെ അവകാശത്തിന് ഒറ്റയ്ക്ക് നില്‍ക്കാനുള്ള കരുത്തുണ്ടോയെന്നും കോടതി പരിശോധിച്ചു. പൗരന്‍മാരുടെ സ്വാതന്ത്ര്യവും അന്തസ്സും ഉറപ്പാക്കുന്ന നിരവധി അവകാശങ്ങളുമായി ബന്ധപ്പെട്ടാണ് മതവിഷയങ്ങള്‍ കൈകാര്യം ചെയ്യാനുള്ള അവകാശം നിലനില്‍ക്കുന്നതെന്ന നിഗമനത്തിലാണ് ഇക്കാലത്തെ നീതിന്യായബോധം എത്തിച്ചേര്‍ന്നതെന്നും അദ്ദേഹം വ്യക്തമാക്കി. ശബരിമല റിവ്യൂ ഹര്‍ജിയില്‍ വിധി പറയാന്‍ മറ്റിവച്ചിരിക്കുന്ന സാഹചര്യത്തിലാണ് ജ. ഡി.വൈ ചന്ദ്രചൂണ്ട് നിലപാട് വ്യക്തമാക്കിയത്. കഴിഞ്ഞയാഴ്ച റിവ്യൂഹര്‍ജികളില്‍ പത്തോളം കേട്ടപ്പോഴും കോടതി എന്താണ് ഇതേ നിലപാടാണ് സ്വീകരിച്ചത്. കോടതിയില്‍ നിന്ന് പോസിറ്റീവായ ഒരു സൂചനകളും ഉണ്ടായിട്ടില്ലെന്ന് ഹര്‍ജിക്കാരുടെ അഭിഭാഷകരില്‍ ഒരാളായ എം.ആര്‍ അഭിലാഷ് വ്യക്തമാക്കിയിരുന്നു.

യുവതീപ്രവേശന വിധിയില്‍ തെറ്റുകളുണ്ടെന്നും മൗലികാവകാശങ്ങള്‍ക്ക് എതിരാണെന്നും എന്‍. എസ്. എസിന്റെ അഭിഭാഷകനായ അഡ്വ. പരാശരന്‍ സുപ്രീം കോടതിയില്‍ പറഞ്ഞപ്പോള്‍ 1955ലെ പൗരത്വ നിയമം ഓര്‍മിപ്പിക്കുകയാണ് ജ. ഡി.വൈ ചന്ദ്രചൂഡ് ചെയ്തത്. സ്ത്രീകളുടെ ആരാധനാ അവകാശത്തെ ഇല്ലാതാക്കാന്‍ മതങ്ങള്‍ക്ക് കഴിയില്ലെന്ന് 2018 സെപതംബര്‍ 28ലെ വിധിയില്‍ അദ്ദേഹം വ്യക്തമാക്കിയായിരുന്നു ഭരണഘടനയുടെ 25ാം വകുപ്പ് പറയുന്ന അവകാശങ്ങള്‍ സ്ത്രീകള്‍ക്കും ഉള്ളതാണ്. സ്ത്രീകളെ കുറഞ്ഞവരായി കാണുന്നത് ഭരണഘടനാപരമായി തെറ്റാണെന്നും ഭരണഘടനയുടെ പതിനേഴാം വകുപ്പ് അയിത്തം ഇല്ലാതാക്കുന്നതില്‍ മാത്രം ഒതുങ്ങുന്നില്ലെന്നും അദ്ദേഹം വിധിയില്‍ എഴുതിയിരുന്നു.