ഇന്ത്യന്‍ വ്യോമസേനയിലെ ആദ്യ വനിത ഫ്‌ലൈറ്റ് എന്‍ജിനീയര്‍ ആരായിരുന്നു എന്ന് ഇനി എപ്പോള്‍ ചോദിച്ചാലും പറഞ്ഞോളൂ, ഹിന ജയ്‌സ്വാള്‍, ഫ്‌ലൈറ്റ് ലഫ്റ്റനന്റ് ഹിന ജയ്‌സ്വാള്‍ ചരിത്രത്തിലേക്ക്
ഇന്ത്യന്‍ വ്യോമസേനയിലെ ഫ്‌ലൈറ്റ് എന്‍ജിനീയറിങ് വിഭാഗം പുരുഷന്മാര്‍ കുത്തകയാക്കിവെച്ചിരിക്കയായിരുന്നു. ഇനി ഹിന ജയ്‌സ്വാള്‍ എന്ന വനിതയുമുണ്ടാകും. ബംഗളൂരുവിലെ യെലഹങ്ക വ്യോമസേനാ ആസ്ഥാനത്തെ 112 ഹെലികോപ്ടര്‍ യൂനിറ്റില്‍നിന്ന് ആറുമാസത്തെ ഫ്‌ലൈറ്റ് എന്‍ജിനീയറിങ് കോഴ്‌സ് പൂര്‍ത്തിയാക്കിയാണ് ചണ്ഡിഗഢ് സ്വദേശിനിയായ ഫ്‌ലൈറ്റ് ലഫ്റ്റനന്റ് ഹിന ജയ്‌സ്വാള്‍ ചരിത്രത്തിലേക്ക് പറന്നു കയറിയത്. വ്യോമസേനയുടെ ഹെലികോപ്ടര്‍ യൂനിറ്റ് ഓപറേഷന്‍ വിഭാഗത്തിലാണ് നിയമനം.
ആവശ്യഘട്ടത്തില്‍ ഏറെ വെല്ലുവിളി നിറഞ്ഞ സിയാച്ചിന്‍ മലനിരകളിലും ആന്‍ഡമാന്‍ ദ്വീപുകളിലും വ്യോമസേനക്കൊപ്പം ഇനി ഹിനയും ഉണ്ടാകും. വ്യോമസേന ഹെലികോപ്ടറുകളുടെ ഓപറേഷനിലും സാങ്കേതിക കാര്യങ്ങളിലും മേല്‍നോട്ടം വഹിക്കുകയെന്ന സുപ്രധാന ദൗത്യമാണ് ഹീനയെ തേടി എത്തിയത്.
2015 ജനുവരി അഞ്ചിനാണ് ഇന്ത്യന്‍ വ്യോമസേനയുടെ എന്‍ജിനീയറിങ് വിഭാഗത്തില്‍ ഹിന ജോലിയില്‍ പ്രവേശിക്കുന്നത്. എയര്‍ മിസൈല്‍ വിഭാഗത്തില്‍ ഫയറിങ് ടീം ചീഫായും ബാറ്ററി കമാന്‍ഡറായും പ്രവര്‍ത്തിക്കുന്നതിനിടെയാണ് ചരിത്രമുഹൂര്‍ത്തത്തിന്റെ ഭാഗമായത്. 2018ലാണ് വ്യോമസേനയുടെ ഫ്‌ലൈറ്റ് എന്‍ജീനിയറിങ് വിഭാഗത്തിലേക്ക് വനിതകളെ പ്രവേശിപ്പിക്കാന്‍ തീരുമാനിച്ചത്. അങ്ങനെ ആ വിഭാഗത്തില്‍ പരിശീലനത്തിന് തെരഞ്ഞെടുക്കപ്പെടുന്ന ആദ്യ വനിതയായി.
കഠിന പരിശീലനങ്ങളെ അതിജീവിച്ചാണ് ഹിന പുതിയ ദൗത്യം ഏറ്റെടുത്തത്. ഡി.കെ. ജയ്‌സ്വാള്‍, അനിത ജയ്‌സ്വാള്‍ ദമ്പതികളുടെ ഏകമകളാണ് ഹിന.
https://www.facebook.com/Malayalivartha
