കേന്ദ്രസര്ക്കാരിന് വഴങ്ങി റിസര്വ് ബാങ്ക്; തെരഞ്ഞെടുപ്പിന് മുന്നോടിയായി റിസര്വ് ബാങ്കിന്റെ 28,000 കോടി ലാഭവിഹിതം കേന്ദ്രത്തിന് നല്കും; രാജ്യത്തെ 12 കോടി കര്ഷകര്ക്ക് മാര്ച്ച് 31നകം 2000 രൂപ വീതം നൽകും
വരാനിരിക്കുന്ന പൊതു തെരഞ്ഞെടുപ്പിന് മുന്നോടിയായി ജനപ്രിയ പദ്ധതികള്ക്ക് പണം കണ്ടെത്താനായി കേന്ദ്ര സർക്കാരിന്റെ സമ്മർദ്ധത്തിന് വഴങ്ങി റിസർവ് ബാങ്ക്.തെരഞ്ഞെടുപ്പു പ്രഖ്യാപനത്തിനുമുമ്പ് റിസര്വ് ബാങ്കിന്റെ മിച്ച ധനത്തില്നിന്ന് 28000 കോടിരൂപയുടെ ലാഭവിഹിതം നല്കാന് റിസര്വ് ബാങ്ക് തീരുമാനിച്ചു.
തുടര്ച്ചയായി രണ്ടാംതവണയാണ് നരേന്ദ്ര മോദി സര്ക്കാരിന് കേന്ദ്ര ബാങ്ക് ലാഭവിഹിതം നല്കുന്നത്. സാമ്പത്തിക പ്രതിസന്ധി നിലനില്ക്കുമ്പോള് തെരഞ്ഞെടുപ്പിന് മുന്നോടിയായി കഴിഞ്ഞ ബജറ്റില് പ്രഖ്യാപിച്ചതുള്പ്പടെയുള്ള മോദി സര്ക്കാര് പ്രഖ്യാപിച്ച പദ്ധതികള് നടപ്പാക്കാന് ഇത് കേന്ദ്ര സര്ക്കാരിനെ സഹായിക്കും.
മാര്ച്ച് 31 നു മുമ്പായി കര്ഷകര്ക്ക് ആദ്യഗഡുവായ 2000 രൂപ വീതം നല്കണമെങ്കില് 20,000 കോടി രൂപ അത്യാവശ്യമായി വേണം.രാജ്യത്തെ പന്ത്രണ്ട് കോടി കര്ഷകരുടെ അക്കൗണ്ടില് തെരഞ്ഞെടുപ്പിനു മുമ്പായി പണമെത്തിക്കാനാണ് കേന്ദ്ര സര്ക്കാരിന്റെ നീക്കം.
കഴിഞ്ഞ ദിവസം കേന്ദ്രധനമന്ത്രി അരുണ് ജെയ്റ്റ്ലി റിസര്വ് ബാങ്ക് അധികൃതരുമായി ചര്ച്ച നടത്തിയിരുന്നു. സര്ക്കാരിന്റെ ധനസ്ഥിതിയും പദ്ധതികളും ധനമന്ത്രിധരിപ്പിച്ചു.
നേരത്തെ 50,000 കോടി രൂപ കഴിഞ്ഞ സാമ്പത്തിക വര്ഷത്തെ ലാഭത്തില് നിന്ന് റിസര്വ് ബാങ്ക് കേന്ദ്രസര്ക്കാരിന് നല്കിയിരുന്നു. ഇത് കൂടാതെ കരുതല് ധനത്തില് നിന്ന് കൂടുതല് പണം സര്ക്കാര് ആവശ്യപ്പെട്ടിരുന്നെങ്കിലും മുന് ആര്ബിഐ ഗവര്ണര് ഊര്ജിത് പട്ടേല് അതിന് വഴങ്ങിയിരുന്നില്ല. ഇതാണ് മോദിയുടെ അടുത്ത ആളായിരുന്ന ഉര്ജിത് പട്ടേലിനെ ബിജെപിക്ക് അനഭിമതനാക്കിയത്. ഈ അകല്ച്ച വളര്ന്നാണ് ഉര്ജിത് പട്ടേലിന്റെ രാജിയില് കലാശിച്ചത്.
തുടര്ന്ന് സ്ഥാനമേറ്റെടുത്ത മോദി സര്ക്കാരിന്റെ വിശ്വസ്തനായ ശക്തികാന്ത ദാസ് വഴിയാണ് ആവശ്യം വീണ്ടുമറിയിച്ചത്. നോട്ടുനിരോധനം കാരണമുള്ള അധികച്ചെലവുകാരണം ലാഭം കുറഞ്ഞതു കൊണ്ട് 2016-17 സാമ്പത്തികവര്ഷത്തെ ലാഭവിഹിതമായി 30,659 കോടി രൂപയേ നല്കിയിട്ടുള്ളൂ. 2018-19 സാമ്പത്തികവര്ഷത്തെ ലാഭവിഹിതമായാണ് 50,000 രൂപ നല്കിയത്.
റിസര്വ് ബാങ്ക് നിയമത്തിന്റെ 47-ാം വകുപ്പില് ലാഭത്തിന്റെ ഒരു വിഹിതമാണ് ഓരോ വര്ഷവും കേന്ദ്രസര്ക്കാരിന് കൈമാറാന് നിഷ്കര്ഷിക്കുന്നത്. എന്നാല്, ചെലവുകഴിച്ചുള്ള മുഴുവന് മിച്ചവും കേന്ദ്രത്തിന് നല്കുകയാണ് പൊതുവേ ആര്ബിഐ ചെയ്യുന്നത്.
https://www.facebook.com/Malayalivartha