ഗുജറാത്തിലെ ഗീര്‍ വനത്തിനുള്ളിലെ ബനേജ് എന്ന സ്ഥലത്തേക്ക് ഓരോ തെരഞ്ഞെടുപ്പിനും ഉദ്യോഗസ്ഥരുടെ പ്രത്യേക സംഘം എത്തും. വനത്തില്‍ ഏതാണ്ട് 35 കിലോമീറ്റര്‍ ഉള്ളിലാണ് ഈ സ്ഥലം. അപൂര്‍വയിനം മൃഗങ്ങളും പക്ഷികളുമൊക്കെയുള്ള ഇടം. അവിടെ ഒരു വോട്ടര്‍ക്കുവേണ്ടിയാണ് ഉദ്യോഗസ്ഥസംഘത്തിന്റെ യാത്ര. ആ വോട്ടറാണ് മഹന്ദ് ഭാരത്ദാസ് ദര്‍ശന്‍ദാസ്.

കാട്ടിലെ ഒരമ്പലത്തില്‍ പൂജാരിയാണ് അദ്ദേഹം. താമസം ഒറ്റയ്ക്ക്. അതുകൊണ്ടുതന്നെ കാട്ടിനുള്ളില്‍ ഒരു പോളിംഗ് ബൂത്ത് ഒരുക്കുകയല്ലാതെ അധികൃതര്‍ക്കു വേറെ വഴിയില്ല.

ഒരു പൗരനെയും വോട്ടുചെയ്യാനായി രണ്ടു കിലോമീറ്ററിലധികം ദൂരം യാത്രചെയ്യിക്കരുതെന്നാണ് തെരഞ്ഞെടുപ്പു കമ്മീഷന്റെ ചട്ടം. നിയമം പാലിക്കുന്നതിനുള്ള പരിശ്രമങ്ങള്‍ ഇന്ത്യന്‍ ജനാധിപത്യത്തിന്റെ മഹത്വത്തെ കുറിക്കുകയും ചെയ്യുന്നു.

അറുപത്തഞ്ചിലേറെ വയസുള്ള ദര്‍ശന്‍ദാസിനെ കണ്ടാല്‍ സാധാരണ പൂജാരിയുടെ രീതിയല്ല. കിടിലന്‍ കൂളിംഗ് ഗ്ലാസ്, അറ്റംകെട്ടിയൊതുക്കിയ നീണ്ട വെള്ളത്താടി, കഴുത്തിലൊരു മാല എന്നിവ നിര്‍ബന്ധം. വേഷം കാവിതന്നെ. കാട്ടില്‍ വൈദ്യുതിയോ ഫോണോ വിനോദോപാധികളോ ഒന്നുമില്ലെങ്കിലും അദ്ദേഹം സന്തോഷവാനാണ്. ചെറുപ്പത്തിലേ പഠിപ്പുനിര്‍ത്തി കാടുകയറിയശേഷം മറ്റൊന്നും ചിന്തിച്ചിട്ടില്ല.

തനിക്കുവേണ്ടി അധികൃതര്‍ നടത്തുന്ന പരിശ്രമങ്ങളെ അദ്ദേഹം ബഹുമാനത്തോടെയാണ് കാണുന്നത്. തന്നെ പ്രത്യേകം പരിഗണിക്കുന്നു എന്നതില്‍ സന്തോഷവുമുണ്ട്. എന്റെ വോട്ട് പ്രധാനമാണ്. അവിശ്വാസ പ്രമേയം വോട്ടിനിട്ടപ്പോള്‍ ഒരൊറ്റ വോട്ടിന് ഗവണ്‍മെന്റ് താഴെവീണ സംഭവം ഓര്‍മയില്ലേ. അതുകൊണ്ട് ഒരു വോട്ടിനും കാര്യങ്ങള്‍ മാറ്റാനാവുമെന്നുറപ്പ്- അദ്ദേഹം ഒരിക്കല്‍ പറഞ്ഞതിങ്ങനെയാണ്.