കനത്ത കാറ്റിലും മഴയിലും ബോട്ട് ആടിയുലഞ്ഞ് മറിഞ്ഞതിനെ തുടര്‍ന്ന് ഒറ്റ മുളംതടിയില്‍ പിടിച്ച് രബീന്ദ്രനാഥ് ദാസ് ബംഗാള്‍ മഹാസമുദ്രത്തില്‍ കിടന്നത് 5 ദിവസം. ഭക്ഷണമോ വെള്ളമോ ലൈഫ് ജാക്കറ്റോ ഇല്ലാതെയാണ് അഞ്ചുദിവസം മുളംതടിയുടെ ബലത്തില്‍ കിടന്നത്. ചിറ്റഗോംഗ് തീരത്തു വച്ച് ബംഗ്ലാദേശി കപ്പല്‍ ഇദ്ദേഹത്തെ കണ്ടെത്തിയതോടെ രബീന്ദ്രനാഥ് ജീവിതത്തിലേക്ക് നീന്തി കയറുകയായിരുന്നു. ഒപ്പമുണ്ടായിരുന്നവരെല്ലാം മരണത്തിന്റെ ആഴങ്ങളിലേക്ക് വഴുതി.

ഏറ്റവും ഒടുവില്‍ രക്ഷയുടെ കൈ എത്തുന്നതിന് മണിക്കൂറുകള്‍ മുമ്പു വരെ ജീവനോടെ ഒപ്പം ശേഷിച്ച അനന്തരവനും പോയി. ഒറ്റയ്ക്ക് അവശേഷിച്ചത് രബീന്ദ്രനാഥ് ദാസ് മാത്രം. കൊല്‍ക്കത്തയിലെ കക്കദ്വീപ് സ്വദേശിയാണ് രബീന്ദ്രനാഥ്. ജൂലൈ നാലിനാണ് എഫ് ബി നയന്‍1 എന്ന മത്സ്യബന്ധനബോട്ടില്‍ രബീന്ദ്രനാഥും സംഘവും പുറംകടലിലേക്ക് തിരിച്ചത്. കനത്ത കാറ്റിലും മഴയിലും ബോട്ട് ആടിയുലഞ്ഞ് മറിയുകയായിരുന്നു. രബീന്ദ്രനാഥിനൊപ്പമുണ്ടായിരുന്ന 11 പേരും കടലിലേക്ക് എടുത്ത് ചാടി.

ഫ്യൂവല്‍ടാങ്കുകള്‍ കെട്ടിവെച്ചിരുന്ന മുളംതടി അഴിച്ചെടുത്ത് ഓരോരുത്തരും അതുമായി ബന്ധിച്ച് കടലില്‍ കിടന്നു. എന്നാല്‍ ഓരോരുത്തരായി അതിജീവിക്കാനാകാതെ കടലിന്റെ ആഴങ്ങളിലേക്ക് മുങ്ങിത്താഴുന്നതിന് രബീന്ദ്രനാഥ് ദൃക്‌സാക്ഷിയായി.

ആത്മധൈര്യം ഒന്നുകൊണ്ട് മാത്രമാണ് രബീന്ദ്രനാഥ് പിടിച്ചുനിന്നത്. അഞ്ചാംദിവസം കപ്പല്‍ രക്ഷപെടുത്തുന്നത് വരെ ഭക്ഷണമില്ലായിരുന്നു, ദാഹിക്കുമ്പോള്‍ ആശ്രയിച്ചത് മഴവെള്ളത്തെ മാത്രം. പലപ്പോഴും വലിയ തിരമാലകളില്‍ ദൂരേക്ക് എറിയപ്പെട്ടു. വമ്പന്‍ തിരമാലകളെ മറികടന്ന് നീന്തുകയല്ലാതെ മറ്റുമാര്‍ഗമില്ലായിരുന്നു. രബീന്ദ്രനാഥിനൊപ്പം അവസാനംവരെയും അനന്തരവന്‍ ഉണ്ടായിരുന്നു. എന്നാല്‍ കപ്പല്‍ വന്ന് രക്ഷപെടുത്തുന്നതിന് ഏതാനും മണിക്കൂറുകള്‍ മുന്‍പ് അനന്തരവനും കണ്‍മുന്‍പില്‍ മരണത്തിലേക്ക് മുങ്ങിപ്പോയി.
കപ്പല്‍ രബീന്ദ്രനാഥിനെ കണ്ടെങ്കിലും ഏകദേശം രണ്ടുമണിക്കൂറെടുത്താണ് രക്ഷിച്ചത്. തിരയില്‍ ഒഴുകി ഒഴുകി പൊയ്‌ക്കോണ്ടിരുന്ന രബീന്ദ്രനാഥ് ഇടയ്ക്ക് കപ്പലിലുള്ളവരുടെ ദൃഷ്ടിയില്‍ നിന്നും അകന്നുപോയിരുന്നു. എന്നാല്‍ അതെല്ലാം അതിജീവിച്ചാണ് ഇദ്ദേഹത്തെ വീണ്ടും ജീവിതത്തിലേക്ക് എത്തിച്ചത്. ബംഗ്ലാദേശി കപ്പലിലുള്ളവര്‍ രക്ഷപെടുത്തുമ്പോള്‍ തീയതി ജൂലായ് 10. ബംഗ്ലാദേശിലെ ആശുപത്രിയില്‍ പ്രവേശിപ്പിച്ച ഇയാളെ ഞായറാഴ്ച കൊല്‍ക്കത്തയിലെത്തിച്ചു. ഇടവിട്ട് പെയ്ത മഴയും കനത്ത തിരകളുമായിരുന്നു അഞ്ച് ദിവസവും അഭിമുഖീകരിച്ചത്. മഴ പെയ്തപ്പോഴൊക്കെ വെള്ളം കുടിച്ചു. അത്ഭുത രക്ഷപെടലിലൂടെ തിരിച്ച് നാട്ടിലെത്തിയ രബീന്ദ്രനാഥ് ദാസിന് അവസാനം വരെ ഒപ്പമുണ്ടായിരുന്ന അനന്തരവനെ രക്ഷപെടുത്താനായില്ല എന്നതാണ് ഏറ്റവും വലിയ പ്രയാസമായത്.