1966-ല്‍ ആത്മീയാചാര്യന്‍ ദലൈലാമ ഇംഗ്ലണ്ടിലെ ലാന്‍ഡ് റോവര്‍ കമ്പനിയില്‍ നേരിട്ടെത്തി ഒരു ലാന്‍ഡ് റോവര്‍ എസ്‌യുവി സ്വന്തമാക്കിയിരുന്നു. ഫാക്ടറിയിലെ അസംബ്ലി ലൈനില്‍ നിന്നുള്ള അദ്ദേഹത്തിന്റെ അന്നത്തെ ചിത്രങ്ങള്‍ ഇന്നും ആര്‍ക്കൈവുകളിലുണ്ട്. 1966 മുതല്‍ 1976 വരെയുള്ള കാലഘട്ടത്തില്‍ ദലൈ ലാമ ഉപയോഗിച്ചിരുന്ന ലാന്‍ഡ് റോവര്‍, സീരീസ് 2 എ എന്ന വാഹനം ഇപ്പോള്‍ ലേലത്തിനെത്തിയിരിക്കയാണ്. 10 വര്‍ഷക്കാലം അദ്ദേഹം ഈ വാഹനമാണ് ഉപയോഗിച്ചത്. 1976-ല്‍ കൈമാറ്റം ചെയ്യപ്പെട്ട ഈ വാഹനത്തെക്കുറിച്ച് പിന്നീട് വളരെക്കാലം വിവരമൊന്നുമില്ലായിരുന്നു.

2005-ല്‍ ലോസ് ആഞ്ചലസിലെ വെസ്റ്റ് കോസ്റ്റ് ബ്രിട്ടീഷ് എന്ന സ്ഥാപനത്തില്‍ റെസ്റ്റോറേഷന് എത്തിയതോടെയാണ് ഈ എസ്യുവി വീണ്ടും വാര്‍ത്തകളില്‍ നിറഞ്ഞത്. ഏകദേശം 1.10 ലക്ഷം കിലോമീറ്റര്‍ ഓടിയെന്നാണ് അപ്പോള്‍ വാഹനത്തിന്റെ മീറ്ററിലുണ്ടായിരുന്നത്. അപ്പോഴും കരുത്തുചോരാത്ത ഷാസി വാഹനത്തെ ശ്രദ്ധേയമാക്കി. ഒരുവര്‍ഷമെടുത്ത് അറ്റകുറ്റപ്പണികള്‍ പൂര്‍ത്തിയാക്കിയ വാഹനം 2007-ല്‍ ഏകദേശം 56 ലക്ഷം രൂപയ്ക്ക് തുല്യമായ 82100 ഡോളറിന് ലേലത്തില്‍ വിറ്റുപോയിരുന്നു.

ലോകത്തിലെ ക്ലാസിക് വാഹനങ്ങളിലൊന്നായാണ് ലാന്‍ഡ് റോവര്‍ 2 എ കണക്കാക്കപ്പെടുന്നത്. 2.25 ലിറ്റര്‍ ഫോര്‍ സിലിണ്ടര്‍ എന്‍ജിനിലായിരുന്നു ഈ വാഹനം പുറത്തിറങ്ങിയിരുന്നത്. 67 ബിഎച്ച്പി കരുത്തും 157 എന്‍എം ടോര്‍ക്കും ഈ എഞ്ചിന്‍ സൃഷ്ടിക്കും. ഏതു ദുര്‍ഘട പാതകളിലൂടെയും ദീര്‍ഘദൂരം കേടുപാടുകളും പ്രശ്നങ്ങളുമൊന്നുമില്ലാതെ അനായാസം സഞ്ചരിക്കാനാവും എന്നതാണ് ഈ ഓഫ് റോഡറിന്റെ ഏറ്റവും വലിയ പ്രത്യേകത. ഫോര്‍ വീല്‍ ഡ്രൈവ് മോഡല്‍ ആയിരുന്നതിനാല്‍ ഏത് മലനിരകളും അനായാസം കീഴടക്കാനും ഈ വാഹനത്തിനു കഴിഞ്ഞിരുന്നു. 1961-ല്‍ സീരീസ് II -ന്റെ ഉത്പാദനം നിര്‍മ്മാതാക്കള്‍ നിര്‍ത്തിയതോടെ പുറത്തിറങ്ങിയതായിരുന്നു സീരീസ് IIA.   

ഇന്ത്യയിലെ നിരത്തുകളില്‍ മാത്രമല്ല, അതിര്‍ത്തി രാജ്യമായ നേപ്പാളിലേക്കുള്ള ദലൈ ലാമയുടെ യാത്രകളും ഈ ലാന്‍ഡ് റോവറിലായിരുന്നു. ഹിമാലയന്‍ മലനിരകള്‍ അനായാസം കീഴടക്കിയ ഈ വാഹനം ഒരിക്കല്‍ പോലും അദ്ദേഹം സ്വയം ഓടിച്ചിട്ടില്ല. പക്ഷേ യാത്രകള്‍ മുഴുവന്‍ ഈ വാഹനത്തില്‍ തന്നെ ആയിരുന്നു.

ഓഗസ്റ്റ് 29-നാണ് ഈ വാഹനത്തിന്റെ ലേലം നടക്കുന്നതെന്നാണ് റിപ്പോര്‍ട്ടുകള്‍. 100000 ഡോളര്‍ മുതല്‍ 1,50,000 ഡോളര്‍ വരെ അതായത് ഏകദേശം 70 ലക്ഷം രൂപ മുതല്‍ 1.2 കോടി രൂപ വരെയാണ് ഈ വാഹനത്തിന് വില പ്രതീക്ഷിക്കുന്നതെന്നാണ് റിപ്പോര്‍ട്ടുകള്‍.