തോരാതെ പെയ്യുന്ന മഴയില്‍ ബിഹാറും ആസാമും വെള്ളത്തിനടിയിലായി. ശക്തമായ മഴയെ തുടര്‍ന്നുണ്ടായ വെള്ളപ്പൊക്കത്തില്‍ ബിഹാറിലും ആസാമിലും മരിച്ചവരുടെ എണ്ണം 166 ആയി. ഇരു സംസ്ഥാനങ്ങളിലുമായി 1.11 കോടി ജനങ്ങളെ പ്രളയം ബാധിച്ചു. ബിഹാറില്‍ മാത്രം 102 പേരാണ് ഇതുവരെ മരണപ്പെട്ടത്. മധുബനി ജില്ലയില്‍ ഇന്നലെ അഞ്ചു പേര്‍ മരിച്ചതോടെയാണു ബിഹാറില്‍ മരണം നൂറു കടന്നത്.
പ്രളയം ഏറ്റവും നാശം വിതച്ച സീതാമര്‍ഹിയില്‍ 27 പേരും മധുബനിയില്‍ 23 പേരും മരിച്ചു. സീതാമര്‍ഹിയിലെയും ദര്‍ഭംഗയിലെയും ദുരിതാശ്വാസ ക്യാമ്പുകളില്‍ മുഖ്യമന്ത്രി നിതീഷ്‌കു മാര്‍ സന്ദര്‍ശനം നടത്തി. കനത്ത മഴയും വെള്ളപ്പൊക്കവും മൂലം ആസാമില്‍ മരിച്ചവരുടെ എണ്ണം 64 ആയി. 33 ജില്ലകളില്‍ 18ഉം പ്രളയദുരന്തം നേരിടുകയാണ്. 38.37 ലക്ഷം പേരെയാണ് മാറ്റിപ്പാര്‍പ്പിച്ചത്.
അഞ്ചു ജില്ലകളില്‍ വെള്ളമിറങ്ങിത്തുടങ്ങിയത് ആശ്വാസമായി. ഇവിടങ്ങളില്‍ ദുരിതാശ്വാസ ക്യാമ്പുകളില്‍നിന്നു ജനം തിരികെ വീടുകളിലെത്തിത്തുടങ്ങിയിട്ടുണ്ട്. അതേസമയം, ജോര്‍ഹട്ട്, ധുബ്രി ജില്ലകളില്‍ ബ്രഹ്മപുത്ര നദിയിലെ വെള്ളം അപകടരമാംവിധം ഉയര്‍ന്നിട്ടുണ്ട്.