പാവപ്പെട്ടവരുടെ ജീവിതം കൈപിടിച്ചുയര്‍ത്തുന്നതിനും പൊതുജനങ്ങളെ സേവിക്കുന്നതിനുമായി ജീവിതം ഉഴിഞ്ഞുവെച്ച ഉന്നതയായ നേതാവായിരുന്നു സുഷമ സ്വരാജ്. മുന്‍ വിദേശകാര്യ മന്ത്രി സുഷമാ സ്വരാജിന്റെ നിര്യാണത്തില്‍ ഇന്ത്യ കടുത്ത വേദന അനുഭവിക്കുന്നതായി പ്രധാനമന്ത്രി നരേന്ദ്ര മോദി. ഇന്ത്യന്‍ രാഷ്ട്രീയത്തിലെ തിളക്കമാര്‍ന്ന അധ്യായം അവസാനിച്ചതായി അദ്ദേഹം ട്വീറ്റ് ചെയ്തു.
ജമ്മു കശ്മീര്‍ നിയമഭേദഗതിയുമായി ബന്ധപ്പെട്ട് പ്രധാനമന്ത്രിയെ അനുമോദിച്ചുകൊണ്ടുള്ള അവരുടെ അവസാന ട്വീറ്റിനെക്കുറിച്ചും മോദി അനുസ്മരിച്ചു. കോടിക്കണക്കിനായ ജനങ്ങള്‍ക്ക് പ്രചോദനമായിരുന്നു സുഷമാ സ്വരാജ് മോദി ട്വീറ്റ് ചെയ്തു.മന്ത്രി എന്ന നിലയില്‍ എല്ലാ വകുപ്പുകളും ഉന്നത നിലവാരത്തോടെ കൈകാര്യം ചെയ്യാന്‍ സുഷമാ സ്വരാജിന് സാധിച്ചു. വിവിധ രാജ്യങ്ങളുമായി ഇന്ത്യയുടെ ബന്ധം മെച്ചപ്പെടുത്തുന്നതില്‍ സുപ്രധാന പങ്കാണ് അവര്‍ വഹിച്ചത്.
ലോകത്തിന്റെ ഏതു ഭാഗത്തുമുള്ള, പ്രയാസങ്ങള്‍ അനുഭവിക്കുന്ന ഇന്ത്യക്കാര്‍ക്കുവേണ്ടി അവര്‍ നടത്തിയ അനുകമ്ബ നിറഞ്ഞ പ്രവര്‍ത്തനങ്ങള്‍ നാം കണ്ടിട്ടുണ്ട് മോദി ട്വീറ്റില്‍ അനുസ്മരിച്ചു. രാഷ്ട്രീയ വ്യത്യാസമില്ലാതെ അവര്‍ അംഗീകരിക്കപ്പെടുകയും ആദരിക്കപ്പെടുകയും ചെയ്തു. ബിജെപിയുടെ ആശയങ്ങളിലും താല്‍പര്യങ്ങളിലും ഒരിക്കലും അവര്‍ വിട്ടുവീഴ്ച ചെയ്യാന്‍ അവര്‍ തയ്യാറായില്ല. മാത്രമല്ല, അതിന്റെ അവളര്‍ച്ചയില്‍ വലിയ സംഭാവന നല്‍കുകയും ചെയ്തു. ഒരേസമയം മികച്ച പ്രഭാഷകയും കഴിവുറ്റ പാര്‍ലമെന്റേറിയനുമായിരുന്നു അവരെന്നും പ്രധാനമന്ത്രി പറഞ്ഞു.