ചാവേറുകള്‍ ഉള്‍പ്പെടെ 45-50 ഭീകരര്‍, പാകിസ്ഥാന്‍ പിന്തുണയോടെ ബലാകോട്ടില്‍ ജെയ്ഷേ ഭീകരര്‍ കഠിന പരിശീലനത്തിലെന്ന് ഇന്റലിജന്റ്സ്. പാകിസ്ഥാനിലെ ബലാകോട്ട് കേന്ദ്രത്തില്‍ ചാവേറുകള്‍ ഉള്‍പ്പെടെ 50-ഓളം ജയ്ഷെ-ഇ- മുഹമ്മദ് തീവ്രവാദികള്‍ കഠിന പരിശീലനത്തിലാണെന്ന് ഇന്റലിജന്‍സ് റിപ്പോര്‍ട്ട്. ഏകദേശം 45-50 പേരെങ്കിലും സംഘത്തില്‍ ഉണ്ടെന്നാണ് ഇന്റലിജന്റ്സ് നല്‍കുന്ന മുന്നറിയിപ്പ്.

ഇന്ത്യന്‍ വ്യോമസേന ആക്രമണം നടത്തിയിട്ട് എട്ടു മാസം പിന്നീടുമ്പോഴാണ് അതേ കേന്ദ്രത്തില്‍ തന്നെ പാകിസ്ഥാന്റെ പിന്തുണയോടെ തീവ്രവാദികള്‍ കഠിന പരിശീലനം നടത്തുന്നത്. ബലാകോട്ടിലെ ഭീകരരുടെ ഓരോ നീക്കങ്ങളും രഹസ്യമായി നിരീക്ഷിക്കുകയാണ് ഇന്റലിജന്റ്സ് എന്നാണ് വിവരം. അതേസമയം നേരത്തെ പരിശീലനം നേടിയവരില്‍ ചിലര്‍ ഇന്ത്യയിലേക്ക് കടന്നിട്ടുണ്ടെന്നും സ്ഥിരീകരിക്കാത്ത വിവരങ്ങള്‍ ഉണ്ട്. ഫെബ്രുവരിയിലെ ആക്രമണത്തിനു ശേഷം കഴിഞ്ഞ ആറുമാസത്തോളം ബലാകോട്ടെ കേന്ദ്രത്തില്‍ യാതൊരു വിധ നീക്കങ്ങളും ഉണ്ടായിരുന്നില്ല. എന്നാല്‍ നിലവില്‍ കേന്ദ്രം സജീവമായതായാണ് റിപ്പോര്‍ട്ട്. കഴിഞ്ഞാഴച കരസേന മേധാവി ബിപിന്‍ റാവത്തും ഇക്കാര്യം സ്ഥിരീകരിച്ചിരുന്നു. ഫെബ്രുവരി 26 നാണ് ഇന്ത്യന്‍ വ്യോമസേന പാകിസ്ഥാന്റെ ബലാക്കോട്ടിലെ ഭീകരരുടെ താവളം തകര്‍ത്തത്. പുല്‍വാമയില്‍ ഭീകരര്‍ നടത്തിയ ആക്രമണത്തിന് പിന്നാലെയാണ് വ്യോമസേനയുടെ നടപടി. പുല്‍വാമ ചാവേര്‍ ബോംബാക്രമണത്തില്‍ 40 സിആര്‍പിഎഫ് സൈനികരാണ് കൊല്ലപ്പെട്ടത്.

തീവ്രവാദ ഭീഷണിയുടെ പേരില്‍ ശബരിമലയെ പതിനൊന്നു പ്രത്യേക സുരക്ഷ മേഖലകളാക്കി തിരിച്ച് സര്‍ക്കാര്‍ വിജ്ഞാപനം. ശബരിമലയുടേയും, തീര്‍ഥാടകരുടേയും സുരക്ഷ മുന്‍ നിര്‍ത്തിയാണ് ഇത്തരം നടപടി സ്വീകരിച്ചതെന്നാണ് വിജ്ഞാപനത്തില്‍ പറയുന്നത്. ഡിജിപി ലോക്നാഥ് ബെഹ്റയുടെ നിര്‍ദ്ദേശ പ്രകാരമാണ് നടപടി. പോലീസ് ആക്ട് 83-ാം വകുപ്പ പ്രകാരമാണ് പ്രത്യേക സുരക്ഷാ മേഖല പ്രഖ്യാപനം. ഇതോടെ ഈ പാതകളിലെല്ലാം ഏതു തരത്തിലുള്ള നടപടിക്കും മജിസ്ട്രേറ്റിന്റെ അനുമതിയില്ലാതെ തന്നെ പോലീസിന് തീരുമാനമെടുക്കാം. നിരോധനാജ്ഞ പ്രഖ്യാപനം, കരുതല്‍ തടങ്കല്‍ എന്നിവ ഇതോടെ പോലീസിന് എളുപ്പമാകും. ഇലവുങ്കല്‍, നിലയ്ക്കല്‍ ബേസ് ക്യാമ്പ്, പമ്പ, വലിയാനവട്ടം, സന്നിധാനം, പാണ്ടിത്താവളം, സന്നിധാനം, പാണ്ടിത്താവളം, പുല്ലുമേട്, ഉപ്പുപ്പാറ, കോഴിക്കാനം, സത്രം എന്നിവയാണ് പ്രത്യേക സുരക്ഷ മേഖലകള്‍. കൂടാതെ പാതകളുടെ ഓരോ കിലോമീറ്റര്‍ സ്ഥലവും കൂടി ഇതില്‍ ഉള്‍പ്പെടുമെന്നും വിജ്ഞാപനത്തില്‍ പറയുന്നു. അതേസമയം, മണ്ഡലകാലത്ത് ശബരിമലയില്‍ യുവതികളെ പ്രവേശിപ്പിക്കാനുള്ള നീക്കത്തിന്റെ ഭാഗമായാണ് ഇത്തരമൊരു ഒരു നീക്കമെന്നും ആരോപണം ഉയരുന്നുണ്ട്. തീവ്രവാദ ഭീഷണിയുടെ മറവില്‍ ശബരിമലയില്‍ യുവതികളെ കയറ്റാനുളള സര്‍ക്കാരിന്റെ നീക്കം കൂടിയാണിതെന്ന് സംശയിക്കുന്നു. ഈ സാഹചര്യത്തില്‍ സ്ത്രീ പ്രവേശനം എതിര്‍ക്കുന്നവര്‍ക്കെതിരെ ശക്തമായ നടപടി സ്വീകരിക്കാന്‍ പോലീസിന് സാധിക്കും.