ജമ്മു കശ്മീരില്‍ ജനജീവിതം നിലവില്‍ സാധാരണ നിലയിലേക്ക് നീങ്ങുന്നു.. ജമ്മു കശ്മീരില്‍ നാഷണല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി ചൊവ്വാഴ്ച തുറന്നു. ജമ്മു കശ്മീരിന്റെ പ്രത്യേക പദവി റദ്ദാക്കിയതിന് ശേഷം കഴിഞ്ഞ രണ്ട് മാസമായി എന്‍ഐടി അടച്ചിട്ടിരിക്കുകയായിരുന്നു. കശ്മീരിലെ സ്ഥിതിഗതികള്‍ സാധാരണ നിലയിലായതിനെ തുടര്‍ന്നാണ് എന്‍ ഐ ടി തുറക്കാന്‍ അധികൃതര്‍ തീരുമാനിച്ചത്.

തിങ്കളാഴ്ച ഉച്ചയ്ക്ക് 12 മണിയോടെ താഴ്വരയിലെ 40 ലക്ഷം പോസ്റ്റ്‌പെയ്ഡ് മൊബൈൽ ഫോണുകൾ പ്രവർത്തിച്ചു തുടങ്ങിയിരുന്നു..ആര്‍ട്ടിക്കിള്‍ 370 റദ്ദാക്കുന്നതിന് മുന്നോടിയായി ആഗസ്റ്റ് അഞ്ചിനാണ് കശ്മീരില്‍ നിയന്ത്രണങ്ങള്‍ ഏര്‍പ്പെടുത്തിയത്

ജമ്മു കശ്മീരിലെ മുഴുവന്‍ സ്‌കൂളുകളും കോളേജുകളുമുള്‍പ്പെടെയുള്ള എല്ലാ വിദ്യാഭ്യാസ സ്ഥാപനങ്ങളും നേരത്തെ തന്നെ തുറന്ന് പ്രവര്‍ത്തിക്കാന്‍ തുടങ്ങിയിരുന്നു. ഇതിന് പിന്നാലെയായാണ് എന്‍ഐടിയും തുറക്കാന്‍ തീരുമാനിച്ചത്. ആര്‍ട്ടിക്കിള്‍ 370 റദ്ദാക്കിയ ശേഷം സുരക്ഷാ കാരണങ്ങള്‍ മുന്‍ നിര്‍ത്തിയായിരുന്നു എന്‍ഐടി അടച്ചത്. കൂടാതെ വിദ്യാര്‍ത്ഥികളോട് വീടുകളിലേക്ക് മടങ്ങിപ്പോകാനും അധികൃതര്‍ നിര്‍ദ്ദേശിച്ചിരുന്നു.

കൂടാതെ പ്രദേശത്ത് വിനോദ സഞ്ചാരത്തിന് ഏര്‍പ്പെടുത്തിയിരുന്ന നിയന്ത്രണങ്ങളും പിന്‍വലിച്ചിട്ടുണ്ട്. വ്യാഴാഴ്ച മുതൽ കശ്മീരിലേക്ക് വിനോദ സഞ്ചാരികൾക്ക് പ്രവേശനം അനുവദിച്ചതിന് പിന്നാലെയാണ് പോസ്റ്റ് പെയ്ഡ് സേവനങ്ങൾ പുനഃസ്ഥാപിച്ചത്. ഏകദേശം മുപ്പത് ലക്ഷത്തോളം പ്രീ പെയ്ഡ് മൊബൈൽ കണക്ഷനുകൾ ഇനിയും പുനഃസ്ഥാപിക്കാനുണ്ട്.