ബാങ്കോക്കില്‍ നിന്നെത്തിയ വിലെ പാര്‍ലെ സ്വദേശി മുംബൈയില്‍ പിടിയില്‍. കോടികള്‍ മൂല്യമുള്ള അത്യപൂര്‍വ ആഡംബര വാച്ച് ഒളിപ്പിച്ചനിലയില്‍ കണ്ടെത്തിയതിനെ തുടര്‍ന്നാണ് കവിന്‍കുമാര്‍ മേത്തയെ (24) കസ്റ്റംസിന്റെ എയര്‍ ഇന്റലിജന്‍സ് യൂണിറ്റ് അറസ്റ്റ് ചെയ്തത്. സംശയം തോന്നി ഇയാളുടെ ബാഗ് പരിശോധിച്ചപ്പോഴാണ് വാച്ച് ഒളിപ്പിച്ചനിലയില്‍ കണ്ടെത്തിയത്. മറ്റാര്‍ക്കോ വേണ്ടി കൊണ്ടുവന്ന വാച്ച് നികുതിയൊടുക്കാതെ വിമാനത്താവളത്തിനു പുറത്തെത്തിക്കാനാണു കവിന്‍ ശ്രമിച്ചതെന്നാണു കരുതുന്നത്.

അമേരിക്കന്‍ ആഡംബര ബ്രാന്‍ഡ് ജേക്കബ് ആന്‍ഡ് കോ നിര്‍മിക്കുന്ന അസ്‌ട്രോണോമിയ സോളാര്‍ സോഡിയാക് എന്ന ലിമിറ്റഡ് എഡിഷന്‍ വാച്ചാണു കവിന്റെ കയ്യിലുണ്ടായിരുന്നത്. പ്രാഥമിക നിഗമനത്തില്‍ 1.8 കോടി രൂപയാണു കസ്റ്റംസ് കണക്കാക്കിയത്. കള്ളക്കടത്തിന് അറസ്റ്റിലായ കവിനെ കോടതിയില്‍ ഹാജരാക്കി ജുഡീഷ്യല്‍ കസ്റ്റഡിയില്‍ റിമാന്‍ഡ് ചെയ്തു.

വിലയേറിയ രത്‌നക്കല്ലുകളാല്‍ സൗരയൂഥത്തിന്റെ മാതൃകയിലാണു വാച്ചിന്റെ ഡയല്‍ നിര്‍മിച്ചിട്ടുള്ളത്. പച്ചകലര്‍ന്ന മഞ്ഞനിറമുള്ള ക്വാര്‍ട്‌സ് ആണു സൂര്യന്റേത്. ബുധനു വൈറ്റ് ഗ്രാനൈറ്റ്, ശുക്രനു റോഡോനൈറ്റ്, ചൊവ്വയ്ക്കു ചുവന്ന സൂര്യകാന്തക്കല്ല്, വ്യാഴത്തിനു പിയറ്റര്‍സൈറ്റ്, ശനിക്കു ടൈഗര്‍ ഐ, യുറാനസിനു ബ്ലൂ കാല്‍സൈറ്റ് തുടങ്ങിയവ ഉപയോഗിച്ചിരിക്കുന്നു. വാച്ചുമായി ഡീലര്‍മാരെ സമീപിച്ചപ്പോഴാണു യഥാര്‍ഥ വില അറിയുന്നത്.

ഡോളര്‍ രൂപയാക്കി മാറ്റുമ്പോഴുള്ളതും 18 ശതമാനം ജിഎസ്ടിയും ചേരുമ്പോള്‍ ഇന്ത്യയില്‍ ഈ വാച്ചിന്റെ മൂല്യം 2.7 കോടിയാകുമെന്ന് അധികൃതര്‍ അറിയിച്ചു.