ഡ്രൈവിംഗ് ടെസ്റ്റില്‍ പങ്കെടുക്കണോ? മോഡേണാവരുത്. ചെന്നൈയിലെ മോട്ടോര്‍ വെഹിക്കിള്‍ ഉദ്യോഗസ്ഥരുടേതാണ് ഈ അലിഖിത നിയമം. ജീന്‍സും സ്ലീവ്‌ലെസ് ടോപ്പും ധരിച്ച് ഡ്രൈവിംഗ് ടെസ്റ്റിനെത്തിയ ഐ.ടി ജീവനക്കാരിയായ യുവതിയെ ഉദ്യോഗസ്ഥര്‍ പറഞ്ഞയച്ചു. മാന്യമായി വസ്ത്രം ധരിച്ചെത്തിയാല്‍ ടെസ്റ്റില്‍ പങ്കെടുക്കാമെന്ന് പറഞ്ഞാണ് തിരിച്ചയച്ചത്. എന്താണ് മാന്യമായ വസ്ത്രമെന്ന് യുവതി ചോദിച്ചെങ്കിലും ഉദ്യോഗസ്ഥന്‍ മറുപടി നല്‍കിയില്ല. ജോലി സ്ഥലത്ത് നിന്നാണ് യുവതി ടെസ്റ്റിനെത്തിയത്. ഇനി 15 ദിവസം കഴിഞ്ഞേ യുവതിക്ക് ടെസ്റ്റ് എഴുതാനാകൂ. ഉദ്യോഗസ്ഥനെതിരെ നടപടി വേണമെന്ന് ആവശ്യപ്പെട്ട് സമൂഹമാധ്യമങ്ങളില്‍ ചര്‍ച്ച നടക്കുന്നുണ്ട്. ചെന്നൈ പോലെ ദക്ഷിണേന്ത്യയിലെ ഏറ്റവും മോഡേണായ നഗരത്തില്‍ ഇത്തരത്തിലൊരു സംഭവം ഉണ്ടായത് നീതികരിക്കാനാവില്ലെന്ന് യുവാക്കള്‍ പ്രതികരിക്കുന്നു.

ത്രി ഫോര്‍ത്ത് ധരിച്ചെത്തിയ വേറൊരു സ്ത്രീയേയും ഇതേ രീതിയില്‍ പറഞ്ഞയചെന്ന റിപ്പോര്‍ട്ടും പുറത്ത് വന്നു. മുമ്പ് ഷോര്‍ട്‌സും മുണ്ടും ബര്‍മുഡയും ധരിച്ചെത്തിയ പുരുഷന്മാരെയും ഡ്രൈവിങ് ടെസ്റ്റ് എഴുതാന്‍ അനുവദിച്ചിട്ടില്ല. ഡ്രൈവിങ് ടെസ്റ്റിന് പ്രത്യേക ഡ്രസ്‌കോഡില്ല. എന്നാല്‍ സ്ത്രീകളും പുരുഷന്‍മാരും മാന്യമായി വസ്ത്രം ധരിക്കണമെന്ന് റീജിണല്‍ ട്രാന്‍സ്‌പോര്‍ട്ട് ഓഫീസ് അറിയിച്ചു. നടപടി സദാചാര പൊലീസിങ്ങിന്റെ ഭാഗമല്ലെന്നും അനിഷ്ട സംഭവങ്ങള്‍ ഉണ്ടാവാതിരിക്കാനുള്ള മുന്‍കരുതലാണെന്നും അദ്ദേഹം പറഞ്ഞു.

സര്‍ക്കാര്‍ ഓഫീസിലെത്തുന്നവരോട് മാന്യമായി വസ്ത്രം ധരിച്ചെത്താന്‍ പറഞ്ഞതില്‍ എന്താണ് തെറ്റെന്നാണ് ആര്‍ടിഒ ഓഫീസിലെ ഉദ്യോഗസ്ഥര്‍ ചോദിക്കുന്നത്. പലതരത്തിലുള്ള ആളുകളാണ് ഈ ഓഫീസില്‍ പതിവായി എത്തുന്നത്. ഓരോരുത്തരും ഓരോ തരക്കാനാണ്. അത് എല്ലാവരും മനസിലാക്കണമെന്നും ഉദ്യോഗസ്ഥര്‍ വ്യക്തമാക്കി. അനാവശ്യമായ പ്രശ്ങ്ങള്‍ ഉണ്ടാകാതിരിക്കാനാണ് നല്ല രീതിയില്‍ വസ്ത്രം ധരിച്ചെത്തണമെന്ന് നിര്‍ദ്ദേശിച്ചതെന്നും അധികൃതര്‍ പറയുന്നു.