രാജ്യത്തെ നടുക്കിയ 'നിര്‍ഭയ' കേസില്‍ വധശിക്ഷ വിധിക്കപ്പെട്ട് ജയിലില്‍ കഴിയുന്ന പ്രതികള്‍ ദയാഹര്‍ജിയുമായി സുപ്രീംകോടതിയെ സമീപിക്കും. രാഷ്ട്രപതിക്ക് ദയാഹരജി സമര്‍പ്പിക്കുന്നതിന് മുമ്പേ സുപ്രീംകോടതിയെ സമീപിക്കാനാണ് തീരുമാനമെന്ന് പ്രതികളുടെ അഭിഭാഷകര്‍ പറഞ്ഞു. നിര്‍ഭയ കേസിലെ നാല് പ്രതികളില്‍ മൂന്ന് പേര്‍ തിഹാര്‍ ജയിലിലും ഒരാള്‍ മണ്ടോളി ജയിലിലുമാണ് കഴിയുന്നത്.

രാഷ്ട്രപതിക്ക് ദയാഹരജി നല്‍കുന്ന കാര്യത്തില്‍ ഒരാഴ്ചക്കകം തീരുമാനമെടുക്കണമെന്നും അല്ലാത്തപക്ഷം വധശിക്ഷാ വാറന്റ് പുറപ്പെടുവിക്കാന്‍ കോടതിയോട് ആവശ്യപ്പെടുമെന്നും കാണിച്ച് ഒക്ടോബര്‍ 28ന് ജയില്‍ അധികൃതര്‍ പ്രതികള്‍ക്ക് നോട്ടീസ് നല്‍കിയിരുന്നു. തുടര്‍ന്ന് അഭിഭാഷകര്‍ വെള്ളിയാഴ്ച ജയിലിലെത്തി പ്രതികളെ കണ്ടു. രാഷ്ട്രപതിക്ക് ദയാഹര്‍ജി സമര്‍പ്പിക്കും മുമ്പ് സുപ്രീംകോടതിക്ക് സമര്‍പ്പിക്കാന്‍ അവസരമുണ്ടെന്ന് പ്രതികളുടെ അഭിഭാഷകര്‍ പറഞ്ഞു.
2012 ഡിസംബര്‍ 16നാണ് രാജ്യത്തെ നടുക്കിയ നിര്‍ഭയ കൂട്ടബലാത്സംഗം നടക്കുന്നത്. ഡല്‍ഹി നഗരത്തില്‍ ഓടിക്കൊണ്ടിരിക്കുന്ന ബസില്‍ പെണ്‍കുട്ടി ക്രൂരമായി ബലാത്സംഗം ചെയ്യപ്പെടുകയായിരുന്നു. ഗുരുതര പരിക്കേറ്റ പെണ്‍കുട്ടി ഡിസംബര്‍ 29ന് മരിച്ചു. രാംസിങ്, മുകേഷ് സിങ്, വിനയ് ശര്‍മ, പവന്‍ ഗുപ്ത, അക്ഷയ് താക്കൂര്‍, പ്രായപൂര്‍ത്തിയാകാത്ത ഒരാള്‍ എന്നിവരാണ് കേസിലെ പ്രതികള്‍. പ്രായപൂര്‍ത്തിയാവാത്ത പ്രതി 2015ല്‍ ജയില്‍മോചിതനാവുകയും ചെയ്തു. വിചാരണക്കാലയളവില്‍ രാംസിങ് ആത്മഹത്യ ചെയ്തിരുന്നു.