അയോധ്യ കേസിലെ സുപ്രധാനവിധി സുപ്രീംകോടതി ഇന്ന് പ്രഖ്യാപിക്കും. എഴ് പതിറ്റാണ്ട് നീണ്ട ബാബറി ഭൂമി കേസിലെ അന്തിമ വിധി ചീഫ് ജസ്റ്റീസ് രഞ്ജന്‍ ഗൊഗോയ് അധ്യക്ഷനായ അഞ്ചംഗ ഭരണഘടനാ ബെഞ്ച് ഇന്ന് രാവിലെ 10.30ന് വിധി പ്രസ്താവം നടത്തും. കേസില്‍ 40 ദിവസം നീണ്ട തുടര്‍ വാദത്തിന് ശേഷമാണ് വിധി പറയുന്നത്. ഇന്ന് അവധിദിനമായിട്ടും അയോധ്യ കേസില്‍ വിധി പറയാന്‍ ഭരണഘടനാ ബെഞ്ച് തീരുമാനിക്കുകയായിരുന്നു. അയോധ്യ കേസിന്റെ വിധി വരാനിരിക്കുന്ന പശ്ചാത്തലത്തില്‍ സുരക്ഷ വര്‍ധിപ്പിക്കാന്‍ സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും കേന്ദ്ര ആഭ്യന്തര മന്ത്രാലയം നിര്‍ദേശം നല്‍കിയിരുന്നു.
അയോധ്യക്കു പുറമേ യുപിയിലെ മറ്റു പ്രദേശങ്ങളിലും രാജ്യത്താകെയും അതീവസുരക്ഷ ഒരുക്കുന്നത്. ബിഹാര്‍, മധ്യപ്രദേശ്, ഡല്‍ഹി എന്നീ സംസ്ഥാനങ്ങളിലും അതീവജാഗ്രത ഏര്‍പ്പെടുത്തിയിട്ടുണ്ട്. അയോധ്യയിലെ തര്‍ക്കഭൂമി പ്രദേശത്ത് കേന്ദ്രസേനകളും ദ്രുതകര്‍മ സേനയും അടക്കം 12,000 സുരക്ഷാ സൈനികരെ നിയോഗിച്ചു നാലു തലങ്ങളിലാണു സുരക്ഷ ശക്തമാക്കിയത്. നാലായിരം കേന്ദ്രസേനാംഗങ്ങള്‍ അടക്കം 12,000 പോലീസുകാരെയാണ് അയോധ്യയില്‍ നിയോഗിച്ചിരിക്കുന്നത്.

അയോധ്യയില്‍ ഡിസംബര്‍ അവസാനം വരെ നിരോധനാജ്ഞയും ഏര്‍പ്പെടുത്തി. സംഘര്‍ഷങ്ങള്‍ ലഘൂകരിക്കാനും റിപ്പോര്‍ട്ട് ചെയ്യാനുമായി 1,600 ഗ്രാമങ്ങളില്‍ 16,000 സന്നദ്ധപ്രവര്‍ത്തകരെയും പോലീസ് മൈബൈല്‍ ആപ്ലിക്കേഷനിലൂടെ ബന്ധപ്പെടുത്തിയിട്ടുണ്ട്.