ബാബരി മസ്ജിദ്- രാമജന്മഭൂമി തര്‍ക്ക കേസില്‍ സുപ്രീംകോടതി ഇന്ന് വിധി പറയാനിരിക്കെ, അയോധ്യയില്‍ സുരക്ഷ ശക്തമാക്കി. സ്ഥിതിഗതികള്‍ നിരീക്ഷിക്കാന്‍ ഡ്രോണ്‍ (ആളില്ലാപ്പേടകം) കാമറകളും ഉപയോഗിക്കുന്നുണ്ട്. കഴിഞ്ഞദിവസം കേന്ദ്രം 4,000 അര്‍ധസൈനികരെ അയോധ്യയില്‍ വിന്യസിച്ചിരുന്നു. നഗരത്തില്‍ ഇരുചക്ര വാഹനങ്ങള്‍ ഉള്‍പ്പെടെ പൊലീസ് പരിശോധിച്ചാണ് കടത്തിവിടുന്നത്. അയോധ്യയിലും പ്രശ്‌നമുണ്ടാവാന്‍ സാധ്യതയുള്ള വിവിധ ജില്ലകളിലും ആവശ്യത്തിന് സുരക്ഷ ഉദ്യോഗസ്ഥരെ വിന്യസിച്ചിട്ടുണ്ടെന്ന് എ.ഡി.ജി.പി രാമശാസ്ത്രി പറഞ്ഞു.

തീവ്രവാദ വിരുദ്ധ സ്‌ക്വാഡിനെയും ബോംബ് നിര്‍വീര്യമാക്കുന്ന വിഭാഗത്തെയും നിയോഗിച്ചു. രണ്ടു മാസമായി ഇവര്‍ക്ക് മികച്ച പരിശീലനം നല്‍കിയിരുന്നുവെന്നും അദ്ദേഹം കൂട്ടിച്ചേര്‍ത്തു. അയോധ്യയില്‍ വരുന്ന വിശ്വാസികളെ തടയുന്നില്ലെന്നും അടിയന്തര സാഹചര്യമുണ്ടായാല്‍ ഹെലികോപ്ടറുകള്‍ ഉപയോഗിക്കുമെന്നും പൊലീസ് ഉദ്യോഗസ്ഥര്‍ പറഞ്ഞു.