ആന്ധ്രാസ്വദേശിയായ മങ്കയമ്മ അമ്മയാകുക എന്ന വലിയ സ്വപ്നത്തിലേക്ക് എത്തുന്നത് 74-ാം വയസിലാണ്. ഐവിഎഫ് ചികിത്സയിലൂടെ മങ്കയമ്മയ്ക്കും രാജ റാവുവിനും ഇരട്ട പെണ്‍കുട്ടികള്‍ ജനിച്ച വാര്‍ത്ത മാധ്യമങ്ങളില്‍ തലക്കെട്ടുകള്‍ തീര്‍ത്തു. ലോകത്തിലെ ഏറ്റവും പ്രായം കൂടിയ അമ്മയെന്ന റെക്കോര്‍ഡും മങ്കയമ്മയ്ക്കായി.

കുടുംബത്തിലെയോ ഗ്രാമത്തിലെയോ ഒരു ആഘോഷങ്ങള്‍ക്കും ഇവരെ പങ്കെടുപ്പിച്ചിരുന്നില്ല. കുട്ടികളില്ലാത്തതിന്റെ പേരില്‍ കടുത്ത അവഗണനയാണ് ഈ ദമ്പതികള്‍ അനുഭവിച്ചിരുന്നത്. മച്ചിപ്പശുവെന്നാണ് മങ്കയമ്മയെ പരിഹസിച്ച് വിളിച്ചിരുന്നത്. കുഞ്ഞുങ്ങള്‍ ഇല്ലാത്തതിന്റെ പേരിലുള്ള പരിഹാസം ഇരട്ടക്കുഞ്ഞുങ്ങളുടെ വരവോടെ അവസാനിക്കുമെന്നാണ് അവര്‍ കരുതിയത്. എന്നാല്‍ കുട്ടികളായപ്പോള്‍ അതിന്റെ പേരിലുള്ള പരിഹാസം ആയി. ഇത്്്്്് താങ്ങാനാകാതെ ദമ്പതികള്‍ ഗ്രാമം വിട്ടു എന്നാണ് അറിയുന്നത്.

ഐവിഎഫ് ചികിത്സയ്ക്ക് മുന്‍പ് രാജ റാവു കൃഷി ഭൂമി വിറ്റിരുന്നു. ആരേയും അറിയിക്കാതെ ചികില്‍സ തേടിയ രാജ റാവു, സ്വകാര്യ ആശുപത്രിക്ക് സമീപത്തുള്ള ഒരു ബന്ധുവിന്റെ വീട്ടിലാണ് താമസിച്ചത്. കുഞ്ഞുങ്ങള്‍ ജനിച്ച വിവരം ടിവിയിലൂടെയാണ് ഗ്രാമവാസികള്‍ അറിഞ്ഞത്. അതേ തുടര്‍ന്ന് ഈ പ്രായത്തില്‍ കുഞ്ഞ് ജനിച്ചാല്‍ എങ്ങനെ നോക്കും? നിങ്ങള്‍ക്ക് അതിനുള്ള ആയുസും ആരോഗ്യവുമുണ്ടാകുമോ? തുടങ്ങിയ ചോദ്യങ്ങളും കുത്തുവാക്കുകളും ദമ്പതികളെ തേടിയെത്തി. ഇതോടെ ഇവര്‍ തിരികെ ഗ്രാമത്തിലേക്ക് വരാനുള്ള തീരുമാനം ഉപേക്ഷിക്കുകയായിരുന്നു.

കുഞ്ഞുങ്ങള്‍ പിറന്ന ശേഷം ഒരു തവണ ഗ്രാമവാസികളില്‍ ഒരാള്‍ രാജ റാവുവിനെ കൃഷിയിടത്തില്‍ കണ്ടിരുന്നു. കുഞ്ഞുങ്ങള്‍ക്ക് സുഖമാണോയെന്ന് ചോദിച്ചപ്പോള്‍ ഒറ്റവാക്കില്‍ ഉത്തരം നല്‍കി രാജ റാവു അവിടെ നിന്നും പോയി. തുടര്‍ന്ന് ആര്‍ക്കും ഇവരെക്കുറിച്ച് യാതൊരു വിവരവുമില്ല.

പ്രായാധിക്യമുള്ള സ്ത്രീയ്ക്ക് ഐവിഎഫ് നടത്തിയതിനെത്തുടര്‍ന്ന് ആശുപത്രിക്ക് ഇന്ത്യന്‍ മെഡിക്കല്‍ അസോസിയേഷന്റെ ശാസന ലഭിച്ചിരുന്നു. അതുകൊണ്ട് തന്നെ ആശുപത്രി അധികൃതരും ഇവരെക്കുറിച്ചുള്ള വിവരങ്ങള്‍ പുറത്തുപറയാന്‍ കൂട്ടാക്കുന്നില്ല. ആരുടെയും ഇടപെടലില്ലാതെ കുഞ്ഞുങ്ങളെ വളര്‍ത്താനായിരിക്കും അവര്‍ നാടുവിട്ടതെന്നാണ് ആശുപത്രി അധികൃതര്‍ പറയുന്നത്.