അയോധ്യാ കേസ് ഉള്പ്പെടെ ചരിത്രവിധികള്ക്കുശേഷം ചീഫ്ജസ്റ്റിസ് രഞ്ജന് ഗൊഗോയ് സുപ്രീംകോടതിയില്നിന്ന് പടിയിറങ്ങി... ഞായറാഴ്ചയാണ് ഔദ്യോഗിക വിരമിക്കലെങ്കിലും അവസാന പ്രവൃത്തി ദിവസം ഇന്നലെ പൂര്ത്തിയാക്കി, നിയുക്ത ചീഫ്ജസ്റ്റിസ് എസ് എ ബോബ്ഡെ തിങ്കളാഴ്ച ചുമതലയേല്ക്കും
അയോധ്യാ കേസ് ഉള്പ്പെടെ ചരിത്രവിധികള്ക്കുശേഷം ചീഫ്ജസ്റ്റിസ് രഞ്ജന് ഗൊഗോയ് സുപ്രീംകോടതിയില്നിന്ന് പടിയിറങ്ങി. 17നാണ് ഔദ്യോഗിക വിരമിക്കലെങ്കിലും അവസാന പ്രവൃത്തിദിവസം വെള്ളിയാഴ്ച പൂര്ത്തിയാക്കി. നിയുക്ത ചീഫ്ജസ്റ്റിസ് ജസ്റ്റിസ് എസ് എ ബോബ്ഡെ തിങ്കളാഴ്ച ചുമതലയേല്ക്കും. 2021 ഏപ്രില് 23വരെ ബോബ്ഡേയ്ക്ക് കാലാവധിയുണ്ട്. 2018 ഒക്ടോബര് മൂന്നിനാണ് 46-ാമത് ഗൊഗോയ് ചീഫ്ജസ്റ്റിസായി ചുമതലയേറ്റത്. വടക്കുകിഴക്കന് സംസ്ഥാനങ്ങളില്നിന്ന് ചീഫ് ജസ്റ്റിസായ ആദ്യ വ്യക്തിയാണ്. 1954 നവംബര് 18ന് അസമില് ജനിച്ച അദ്ദേഹം അസം മുന്മുഖ്യമന്ത്രി കേശബ് ചന്ദ്ര ഗോഗോയിയുടെ മകനാണ്. 1978ല് അഭിഭാഷകനായാണ് തുടക്കം.
2001ല് ഗോഹട്ടി ഹൈക്കോടതിയില് സ്ഥിരം ജഡ്ജിയായി. 2012ല് സുപ്രീംകോടതി ജഡ്ജിയായി. സുപ്രീംകോടതിയുടെ ദൈനംദിന പ്രവര്ത്തനങ്ങളില് മാറ്റങ്ങള്ക്ക് അദ്ദേഹം തുടക്കമിട്ടു. അസം പൗരത്വപട്ടിക വിഷയം കൈകാര്യംചെയ്ത ബെഞ്ചിന് നേതൃത്വം നല്കി. നൂറ്റാണ്ടിലേറെ നീണ്ട അയോധ്യാഭൂമിതര്ക്ക കേസിലും ശബരിമലയിലെ യുവതീപ്രവേശന വിധിക്കെതിരായ പുനഃപരിശോധനാ ഹര്ജികളിലും അവസാന ദിവസങ്ങളില് വിധിപറഞ്ഞു.
സുപ്രീംകോടതി ചീഫ്ജസ്റ്റിസും വിവരാവകാശ നിയമത്തിന്റെ പരിധിയില് വരുമെന്ന വിധിയും റഫേല് യുദ്ധവിമാന ഇടപാടില് അന്വേഷണം തള്ളുന്ന വിധിയും ചീഫ്ജസ്റ്റിസ് രഞ്ജന് ഗൊഗോയ് പുറപ്പെടുവിച്ചു. സുപ്രീംകോടതിയുടെ ചരിത്രത്തിലാദ്യമായി ചീഫ് ജസ്റ്റിസിനെതിരെ പരസ്യപ്രതികരണം നടത്തിയ നാലു ജഡ്ജിമാരിലൊരാളാണ് ഗൊഗോയ്.
https://www.facebook.com/Malayalivartha