സൂററ്റില്‍നിന്നു മുംബൈയിലേക്കുള്ള സ്പൈസ് ജെറ്റിന്റെ എസ്ജി 2763 വിമാനത്തില്‍ വച്ച് നാലു മാസം പ്രായമായ കുഞ്ഞ് മരിച്ചു.

വിമാനം ലാന്‍ഡ് ചെയ്യുന്നതിനിടെയാണ് കുഞ്ഞിനു അനക്കമില്ലെന്ന വിവരം അമ്മ പ്രീതി ജിന്‍ഡല്‍ വിമാന ജീവനക്കാരെ അറിയിച്ചത്. പ്രീതിയുടെ മാതാപിതാക്കളും വിമാനത്തില്‍ ഉണ്ടായിരുന്നു.

പുലര്‍ച്ചെ 5.30ന് കുഞ്ഞിന് ഭക്ഷണം നല്‍കിയിരുന്നുവെന്നും ശേഷം കുഞ്ഞ് ഉറങ്ങിയതായും അമ്മ പറയുന്നു. കുഞ്ഞ് ഉറങ്ങുകയാണെന്ന് തെറ്റിദ്ധരിച്ചതാണ് കുഞ്ഞിന് അനക്കമില്ലെന്നുള്ളത് ശ്രദ്ധിക്കാന്‍ വൈകിയത്.

പാര്‍ക്കിങ് ബേയിലേക്കു കടക്കുന്നതിനിടയിലാണ് വിമാനത്തില്‍ നിന്നും കണ്‍ട്രോള്‍ റൂമിലേക്ക് വൈദ്യസഹായം ആവശ്യപ്പെട്ടത്. വിമാനം ലാന്‍ഡ് ചെയ്തതിനു തൊട്ടുപിന്നാലെ കുഞ്ഞിനെ സ്വകാര്യ ആശുപത്രിയിലേക്കു മാറ്റിയെങ്കിലും മരിച്ചിരുന്നു.

അപകടമരണത്തിനു സഹര്‍ പൊലീസ് കേസ് റജിസ്റ്റര്‍ ചെയ്തു. പോസ്റ്റ്‌മോര്‍ട്ടം റിപ്പോര്‍ട്ടിനു ശേഷം പ്രതികരിക്കാമെന്ന് പൊലീസ് അറിയിച്ചു.