മാനവകുലം വലിയ അപകടത്തിലേക്കോ ? ഒടുവിൽ ‘ഓക്സിജനും വില കൊടുത്ത് വാങ്ങിക്കണം; ഡൽഹിക്കാർക്ക് ഇത് താൽകാലിക ആശ്വാസം
മൂന്നാം ലോക മഹായുദ്ധം ഉണ്ടാകുന്നത് വെള്ളത്തിന് വേണ്ടിയായിരിക്കും എന്ന നിഗമനം തെറ്റിക്കുകയാണ് ഡൽഹിയിലെ സംഭവം. ഡൽഹിയിൽ കനത്ത വായു മലീനീകരണം നേരിടുന്നുവെന്ന വാർത്ത നാം എല്ലാവരും അറിഞ്ഞതായിരുന്നു. ഇപ്പോഴിതാ മറ്റൊരു വിവരം കൂടി പുറത്ത് വരുന്നു. ശുദ്ധവായു വിൽക്കുന്ന ‘ഓക്സിജൻ ബാർ’ തുടങ്ങിയിരിക്കുകയാണ് . വില 15 മിനിറ്റിനു 299 രൂപ. സ്പോഞ്ച് പോലെയുള്ള ശ്വാസകോശത്തിനു വേണ്ടിയാണു ഓക്സി പ്യൂവർ. എങ്ങും വിഷപ്പുക നിറഞ്ഞു നിൽക്കുന്ന ഡൽഹി നഗരത്തിന്റെ ഭാവി എന്താകുമെന്ന ഭയത്തിനും കൂടി വഴി മാറുകയാണ് ഈ ‘ഓക്സിജൻ ബാർ’. ശ്വാസകോശത്തെക്കുറിച്ചും ആരോഗ്യത്തെക്കുറിച്ചും ചിന്തിക്കുമ്പോൾ ഭയം മാത്രമുള്ള ഡൽഹി ജനതയ്ക്ക് അല്പം ആശ്വസിക്കാൻ വേണ്ടിയാണ് സാകേത് സെലക്ട് സിറ്റി മാളിലെ ഓക്സി പ്യൂവർ 4 മാസം മുൻപു തുറന്നത്. ആദ്യം സൗജന്യമായിരുന്നെങ്കിലും ഇപ്പോൾ ഓക്സിജന് പണം നൽകണം. സുഗന്ധം നിറഞ്ഞ ഓക്സിജനാണു വേണ്ടതെങ്കിൽ 15 മിനിറ്റിനു 499 രൂപയാണ്.
യുഎസിലെ ലാസ് വെഗസിലെ വെനീഷ്യൻ റിസോർട്ടിൽ ഓക്സിജൻ ബാർ കണ്ടതിന്റെ അനുഭവവുമായാണു ആര്യവീർ കുമാറും സുഹൃത്തു മാർഗരിറ്റ കുറിസ്റ്റിനയും സംരംഭത്തിനു തുടക്കമിട്ടത്. ലെമൺഗ്രാസ്, ഓറഞ്ച്, കറുവപ്പട്ട, പെപ്പർമിന്റ്, ലാവൻഡർ തുടങ്ങി ഏഴു സുഗന്ധത്തിലുണ്ട് ഓക്സിജൻ. ഒരു ഫ്ലേവറിലുള്ള ഓക്സിജൻ ശ്വസിച്ചു കൊണ്ടിരിക്കെ മണം പിടിച്ചില്ലെങ്കിൽ ഒരു സ്വിച്ചിൽ അടുത്ത ഫ്ലേവറിലേക്കു മാറ്റുകയും ചെയ്യാവുന്നതാണ്. യൂക്കാലിപ്റ്റസ് ശ്വാസനാളത്തിന്റെ അസ്വസ്ഥത നീക്കുകയും തൊണ്ടയ്ക്കു കുളിർമ നൽകുകയും ചെയ്യുമെന്നാണ് ഇവർ നൽകുന്ന വിവരം. വാനില മനസിനെ ശാന്തമാക്കുമെന്നും പെപ്പർമിന്റ് ഛർദ്ദി അകറ്റുമെന്നും ഇവർ പറയുന്നു. ആശുപത്രികളിൽ നൽകുന്നതു പോലുള്ള മരുന്നുകൾ ചേർത്ത ഓക്സിജനല്ല മറിച്ച് വായുവിൽ നിന്നും വേർതിരിച്ചു ശുദ്ധീകരിച്ച ഈ ഓക്സിജൻ 90 ശതമാനവും ശുദ്ധമാണെന്ന് ഇവർ വിശദീകരിക്കുന്നു. ശ്വാസകോശ രോഗങ്ങളുള്ളവർക്കു ഡോക്ടറുടെ നിർദേശം അനുസരിച്ചു മാത്രമേ ഈ ഓക്സിജൻ ഉപയോഗിക്കാൻ കൊടുക്കുകയുള്ളൂ. ദിനം 20–25 പേർ ശുദ്ധവായു തേടിയെത്തുന്നുണ്ട്. സ്റ്റോറിന്റെ ചുമതല വഹിക്കുന്ന അജയ് ജോൺസൺ പറഞ്ഞു. അടുത്ത മാസം ഇന്ദിരാഗാന്ധി രാജ്യാന്തര വിമാനത്താവളത്തിന്റെ ടെർമിനൽ ത്രിയിൽ ഓക്സി പ്യുവർ രണ്ടാമത്തെ സ്റ്റോറും ആരംഭിക്കുവാനുള്ള പദ്ധതിയിലാണ് ഇവർ.
https://www.facebook.com/Malayalivartha