ലോകത്തെ ഏറ്റവും ഉയരത്തിലുള്ള യുദ്ധഭൂമിയായ സിയാച്ചിനിലുണ്ടായ ഹിമപാതത്തില്‍ നാലു സൈനികരും രണ്ടു ഗ്രാമീണ ചുമട്ടുകാരും അടക്കം ആറു പേര്‍ മരിച്ചു.  സിയാച്ചിന്‍ മഞ്ഞുമലയുടെ വടക്കുഭാഗത്താണ് ദുരന്തം. തിങ്കളാഴ്ച ഉച്ചകഴിഞ്ഞ് മൂന്നു മണിയോടെയുണ്ടായ മഞ്ഞുവീഴ്ചയില്‍ എട്ടംഗ സൈനിക പട്രോള്‍ സംഘവും രണ്ടു ചുമട്ടുകാരും കുടുങ്ങിപ്പോവുകയായിരുന്നുവെന്ന് സൈനികവൃത്തങ്ങള്‍ പറഞ്ഞു. സമീപത്തെ സൈനിക പോസ്റ്റുകളില്‍നിന്ന് രക്ഷാപ്രവര്‍ത്തന സംഘങ്ങള്‍ പാഞ്ഞെത്തിയാണ് മഞ്ഞില്‍പുതഞ്ഞവരെ പുറത്തെടുത്തത്. ആശുപത്രിയില്‍ എത്തിച്ചപ്പോഴേക്കും നാലു സൈനികരടക്കം ആറു പേര്‍ മരിച്ചിരുന്നു.

സിയാച്ചിനില്‍ മഞ്ഞുമല ഇടിഞ്ഞ് നാലു സൈനികരടക്കം ആറുപേര്‍ മരിച്ചു. സൈന്യത്തിനുവേണ്ടി ചുമടെടുക്കുന്ന രണ്ടുപേരാണ് മരിച്ച മറ്റു രണ്ടുപേര്‍. ഇവര്‍ക്കൊപ്പമുണ്ടായിരുന്ന രണ്ടുപേരെ കാണാതായിട്ടുണ്ട്. ഹിമാലയന്‍ പര്‍വതനിരയില്‍ പാക് അതിര്‍ത്തിയോട് ചേര്‍ന്ന വടക്കന്‍ സിയാച്ചിനില്‍ പട്രോളിങ്ങില്‍ ഏര്‍പ്പെട്ട കരസേനാ ജവാന്മാരും സംഘവുമാണ് അപകടത്തില്‍പ്പെട്ടത്. ഇന്നലെ വൈകീട്ട് മൂന്നരയോടെയാണ് അപകടമുണ്ടായത്.
മഞ്ഞിടിച്ചില്‍ ആരംഭിച്ചപ്പോള്‍ അവിടെ ഉണ്ടായിരുന്നവരെ സുരക്ഷിതകേന്ദ്രങ്ങളിലേക്ക് മാറ്റാനുള്ള ശ്രമത്തില്‍ ഏര്‍പ്പെട്ടവരാണ് മഞ്ഞിനടിയില്‍പ്പെട്ടത്.ഹിമാലയന്‍ മലനിരകളില്‍ ചെങ്കുത്തായുള്ള ഈ പ്രദേശത്ത് പൂജ്യത്തിനുതാഴെ 21 ഡിഗ്രിയായിരുന്നു ഇന്നലത്തെ തണുപ്പ്.

കാണാതായവര്‍ക്കായി കരസേന തിരച്ചില്‍ തുടങ്ങി. മഞ്ഞുപാളികള്‍ക്കിടയില്‍നിന്ന് രക്ഷിച്ച സൈനികരെ ഹെലികോപ്റ്ററില്‍ സമീപത്തെ സൈനികാശുപത്രിയിലേക്കു മാറ്റി. 1984-ല്‍ ഇന്ത്യ-പാക് യുദ്ധത്തെത്തുടര്‍ന്നാണ് സിയാച്ചിനില്‍ സേനയെ വിന്യസിച്ചത്. ശൈത്യകാലത്ത് പൂജ്യത്തിനുതാഴെ 60 ഡിഗ്രിവരെ തണുപ്പ് ഇവിടെ അനുഭവപ്പെടാറുണ്ട്. ഈ സമയങ്ങളില്‍ പ്രദേശത്ത് മഞ്ഞുമലയിടിച്ചില്‍ പതിവാണ്. ഈയിടെ ഇവിടേക്ക് ടൂറിസ്റ്റുകളെ അനുവദിക്കാമെന്നും കേന്ദ്രസര്‍ക്കാര്‍ തീരുമാനിച്ചിരുന്നു. 2016ല്‍ സിയാച്ചിനിലുണ്ടായ ഹിമപാതത്തില്‍ 10 പേര്‍ കൊല്ലപ്പെട്ടിരുന്നു.