മദ്ധ്യപ്രദേശിലെ അനുപ്പൂര്‍ ജില്ലയിലെ കരോണ്ടി ഗ്രാമത്തില്‍, അഭിഭാഷകന്‍ ആയ ഭര്‍ത്താവിനെ ഭാര്യ കൊലപ്പെടുത്തി അടുക്കളയിലെ സ്ളാബിനു കീഴില്‍ കുഴിച്ചുമൂടി. തുടര്‍ന്ന്് ഒക്ടോബര്‍ 22 മുതല്‍ ഭര്‍ത്താവിനെ കാണ്മാനില്ലെന്ന് കാണിച്ച് ഇവര്‍ തന്നെ പോലീസിന് പരാതി നല്‍കുകയും ചെയ്തു.

സംഭവത്തില്‍ നിര്‍ണ്ണായകമായ ട്വിസ്റ്റ് ഉണ്ടായത് നവംബര്‍ 21-നായിരുന്നു. അനുജനെ കാണാത്തതിനെ തുടര്‍ന്ന് സംഭ്രമത്തിലായ മൂത്തസഹോദരന്‍ അര്‍ജുന്‍ ബനാവല്‍ സംശയം ഉന്നയിച്ച് പോലീസിനെ സമീപിച്ചതോടെയാണ് എല്ലാം പുറത്തുവന്നത്.

35-കാരനായ സഹോദരന്‍ മഹേഷ് ബനാവാലിനെ കാണാതായതിന് പിന്നാലെ വീട്ടിലെത്തുമ്പോഴെല്ലാം ഭാര്യ പ്രമീള തങ്ങള്‍ക്ക് നേരെ തിരിയുകയും വീട്ടില്‍ നിന്നും ഓടിക്കാന്‍ ശ്രമിക്കുകയും ചെയ്യുന്നു എന്നായിരുന്നു അര്‍ജുന്‍ പറഞ്ഞത്. കഴിഞ്ഞ ഒരു മാസമായി സഹോദരന്റെ വീട്ടില്‍ ചെല്ലുമ്പോഴെല്ലാം പ്രമീള തങ്ങളെ വീട്ടില്‍ കയറ്റുന്നു പോലുമില്ലെന്നും ചീത്ത പറഞ്ഞ് ഓടിക്കുകയാണെന്നും മഹേഷിനെ കാണാതായതിന് കാരണം തങ്ങളുടെ മേല്‍ കെട്ടിവെച്ചാണ് ആക്ഷേപം ചൊരിയുന്നതെന്നും അര്‍ജുന്‍ പറഞ്ഞു.

അര്‍ജുനന്‍ പരാതിപ്പെട്ടതിനു പിന്നാലെ വ്യാഴാഴ്ച ഗ്രാമത്തിലെത്തിയ പോലീസിനെ വരവേറ്റത് ചീഞ്ഞഴുകിയ മൃതദേഹത്തിന്റെ ഗന്ധമാണ്. വീട്ടിനുള്ളില്‍ നിന്നുമാണ് ഈ ഗന്ധം വരുന്നതെന്ന് തിരിച്ചറിഞ്ഞ പോലീസ് പ്രദേശം മുഴുവന്‍ അരിച്ചു പെറുക്കി. ഒടുവിലാണ് അടുക്കളയിലെ സ്ളാബിന് കീഴില്‍ നിന്നുമാണ് മണം വരുന്നതെന്ന് കണ്ടെത്തിയത്.

തുടര്‍ന്ന് കിച്ചന്‍ സ്ളാബ് എടുത്തുമാറ്റി കുഴിച്ചപ്പോള്‍ മഹേഷിന്റെ അഴുകിയ മൃതദേഹാവശിഷ്ടങ്ങള്‍ കണ്ടെത്തുകയും ചെയ്തു. ഇതിന് മുകളില്‍ വെച്ചായിരുന്നു ഒരു മാസമായി പ്രമീള ആഹാരം പാകം ചെയ്തിരുന്നത്.

പോലീസ് കുഴിയില്‍ നിന്നും മൃതദേഹം പുറത്തെടുത്തതോടെ തന്റെ പദ്ധതി പൊളിഞ്ഞെന്ന് മനസ്സിലായ 32-കാരി പ്രമീള, പോലീസ് തന്നെ കുടുക്കാന്‍ ശ്രമിക്കുന്നു എന്നാരോപിച്ച് ബഹളം കൂട്ടി. പിന്നീട് കുറ്റം സമ്മതിച്ച പ്രമീള ഭര്‍ത്താവിന്റെ ഇളയ സഹോദരന്‍ ഗംഗാറാം ബനവാലിന്റെ സഹായത്തോടെയാണ് കുറ്റകൃത്യം നടത്തിയതെന്നും ഗംഗാറാമിന്റെ ഭാര്യയുമായി മഹേഷിന് രഹസ്യബന്ധം ഉണ്ടായിരുന്നു അതിനാലാണ് തങ്ങള്‍ മഹേഷിനെ കൊല്ലാന്‍ തീരുമാനിച്ചതെന്നും ആരോപിച്ചു.

അതേസമയം ഗംഗാറാം ആരോപണം നിഷേധിച്ചിട്ടുണ്ട്. എന്നിരുന്നാലും കിച്ചണ്‍ സ്ളാബിന് കീഴില്‍ യുവതി എങ്ങിനെയാണ് തനിയെ കുഴിയെടുത്ത് ഭര്‍ത്താവിനെ മൂടിയതെന്ന സംശയത്തിലാണ് പോലീസ്. ആരുടെയെങ്കിലും സഹായം കിട്ടിയിരിക്കാം എന്നും അത് കണ്ടെത്താനുള്ള ശ്രമത്തിലാണെന്നും പോലീസ് പറഞ്ഞു.