തെലങ്കാന സംഭവം: മരിച്ചു കിടക്കുന്ന പ്രതികളുടെ കൈകളില് തോക്കുകള്
ഹൈദരാബാദ് പൊലീസ് കമ്മിഷണര് വി.സി. സജ്ജനാര് തെലങ്കാനയില് വനിതാ ഡോക്ടറെ ബലാത്സംഗം ചെയ്ത ശേഷം തീകൊളുത്തി കൊന്ന കേസിലെ പ്രതികള് വെടിയേറ്റു മരിച്ച സംഭവത്തില് വിശദീകരണവുമായി രംഗത്തെത്തി. പെണ്കുട്ടിയെ അക്രമിച്ച സ്ഥലത്തു പ്രതികളെ എത്തിച്ചപ്പോള് അവര് പൊലീസിനു നേരെ തിരിയുകയായിരുന്നെന്ന് സജ്ജനാര് പ്രതികരിച്ചു. പ്രതികള് വടികളും കല്ലുകളും ഉപയോഗിച്ചു പൊലീസിനെ ആക്രമിച്ചു. ഉദ്യോഗസ്ഥരുടെ ആയുധങ്ങള് തട്ടിയെടുത്തശേഷം പൊലീസിനു നേരെ വെടിയുതിര്ക്കുകയായിരുന്നുവത്രേ.
കീഴടങ്ങാന് പ്രതികളോടു നിര്ദേശിച്ചെങ്കിലും അവര് അനുസരിക്കാന് കൂട്ടാക്കിയില്ല. പൊലീസിനു നേരെ വെടിയുതിര്ക്കുന്നതു തുടര്ന്നപ്പോഴാണ് പ്രതികളെ എന്കൗണ്ടറില് വെടിവച്ചു കൊന്നത്. നിയമം അതിന്റെ കടമയാണു നിര്വഹിച്ചത്. പരുക്കേറ്റ 2 പൊലീസ് ഉദ്യോഗസ്ഥരെ ആശുപത്രിയില് പ്രവേശിപ്പിച്ചതായും സജ്ജനാര് അറിയിച്ചു. പ്രതികളുടെ കൈയില്നിന്നു 2 തോക്കുകള് പൊലീസ് പിടിച്ചെടുത്തു. സമാനമായ നിരവധി കേസുകളില് പ്രതികള് കര്ണാടകയിലും ഉള്പ്പെട്ടിട്ടുള്ളതായി സംശയമുണ്ട്. ഇക്കാര്യത്തില് അന്വേഷണം പുരോഗമിക്കുകയാണെന്നും പൊലീസ് അറിയിച്ചു.
അതേസമയം പൊലീസ് ഓപറേഷന്റെ കൂടുതല് ചിത്രങ്ങള് പുറത്തുവന്നു. പുറത്തുവന്ന ചിത്രങ്ങളില് പൊലീസുമായുള്ള ഏറ്റുമുട്ടലില് കൊല്ലപ്പെട്ട പ്രതികളുടെ കൈകളില് തോക്കുകളുണ്ടെന്ന് വ്യക്തമാണ്.
വെള്ളിയാഴ്ച പുലര്ച്ചെ 3.30-നാണ് ബലാത്സംഗക്കേസ് പ്രതികളെ പൊലീസ് വെടിവച്ചുകൊന്നത്. കസ്റ്റഡിയില്നിന്നു രക്ഷപ്പെടാന് ശ്രമിച്ചപ്പോള് വെടിവച്ചുവെന്നാണ് പൊലീസിന്റെ ഭാഗത്തുനിന്നുള്ള പ്രതികരണം.
ഷാഡ്നഗര് സര്ക്കാര് ആശുപത്രിയിലാണ് കൊല്ലപ്പെട്ടവരുടെ മൃതദേഹങ്ങള് സൂക്ഷിച്ചിരിക്കുന്നത്. അതേസമയം പൊലീസ് വെടിവയ്പില് സമ്മിശ്ര പ്രതികരണമാണ് ജനപ്രതിനിധികളില്നിന്നും സമൂഹത്തില്നിന്നും ഉയരുന്നത്.
https://www.facebook.com/Malayalivartha