കൊല ചെയ്യപ്പെട്ടതാരെന്ന് കണ്ടെത്തിയിട്ടു വേണം കൊല ചെയ്തതാരെന്ന് കണ്ടുപിടിക്കാന്... മുംബൈ പോലീസിനു മുന്നിലുണ്ടായിരുന്ന ഈ വെല്ലുവിളിയില് ടെയ്ലര് ടാഗും ഫെയ്സ്ബുക്ക് പ്രൊഫൈലും തുണയായി!
ഇക്കഴിഞ്ഞ ഡിസംബര് രണ്ടിനാണ് മുബൈയുടെ തീരക്കടലില് ഒരു സ്യൂട്ട്്കേസ് ഒഴുകിനടക്കുന്നത് കണ്ടത്. അത് കരയിലെത്തിച്ച് തുറന്നുനോക്കിയ പോലീസ് കണ്ടത് ഒരു പുരുഷന്റെ വെട്ടിമുറിക്കപ്പെട്ട ശരീരഭാഗങ്ങളായിരുന്നു!
മൃതദേഹത്തിലെ വസ്ത്രത്തില് നിന്ന് കണ്ടെത്തിയ ടെയ്ലര് ടാഗായിരുന്നു അന്വേഷണ ഉദ്യോഗസ്ഥരുടെ ആദ്യ പിടിവള്ളി. അതില് നിന്നും തയ്യല്ക്കട കണ്ടുപിടിച്ച പൊലീസ് കടഉടമയായ അന്സാരിയുടെ സഹായം തേടി. നൂറോളം ബില്ബുക്കുകള് പരിശോധിച്ചതോടെ മൃതദേഹത്തില് നിന്ന് കിട്ടിയ ഷര്ട്ടിന്റെ അതേ തുണിക്കഷ്ണം കിട്ടി. പക്ഷേ ഷര്ട്ട് അയാളുടേതാവണമെന്നില്ലെന്ന സാധ്യതയും പൊലീസിന് മുന്നിലുണ്ടായിരുന്നു.
മാത്രമല്ല, ബില്ബുക്കില് ഉപഭോക്താവിന്റെ പേരിന്റെ ആദ്യഭാഗം മാത്രമേ ഉണ്ടായിരുന്നുള്ളൂ. ഇതോടെ ബാഗില് നിന്ന് കണ്ടെത്തിയ ചുവപ്പ് സ്വെറ്ററിനെ ബന്ധപ്പെടുത്തിയായി പൊലീസിന്റെ അന്വേഷണം. ബില്ബുക്കില് നിന്ന് ലഭിച്ച പേര് ഫെയ്സ്ബുക്കില് പൊലീസ് തിരഞ്ഞു. നിരവധി പ്രൊഫൈലുകള് തിരഞ്ഞതോടെ ഇതേ പേര് കണ്ടെത്തി.
ഫേസ്ബുക്ക് ഫോട്ടോയില് നിന്നും സ്യൂട്ട്കെയ്സിലേതിന് സമാനമായ ഒരു സ്വെറ്റര് കണ്ടു. ഫെയ്സ്ബുക്കില് അപ്ലോഡ് ചെയ്ത പാട്ടിന്റെ ഈരടികള്ക്കൊടുവില് പ്രൊഫൈല് ഉടമ ഒപ്പിട്ടിരിക്കുന്നതും കണ്ടു. ഈ ഒപ്പും തയ്യല്ക്കാരന്റെ ബില്ബുക്കിലേതുമായി സാമ്യമുണ്ടെന്ന് കണ്ടതോടെ രണ്ടും ഒരാളാണെന്ന് പൊലീസ് ഉറപ്പിക്കുകയായിരുന്നു.
ഈ പ്രൊഫൈലില് നിന്നും നവംബര് 25 -നാണ് അവസാനമായി അപ്ഡേഷന് ഉണ്ടായത്. ഫെയ്സ്ബുക്കില് നല്കിയിരുന്ന ഫോണ്നമ്പര് നവംബര് 25-ന് ശേഷം പ്രവര്ത്തന രഹിതമാണെന്നും പൊലീസ് കണ്ടെത്തി. ഫെയ്സ്ബുക്കിലെ അടിസ്ഥാന വിവരങ്ങളില് നിന്ന് മേല്വിലാസവും കിട്ടിയതോടെ കൊല്ലപ്പെട്ടയാള് ബെന്നറ്റ് റെബെല്ലോ ആണെന്ന് പൊലീസ് ഉറപ്പിച്ചു. കുറച്ച് ദിവസങ്ങളായി സംഗീതജ്ഞനായ ബെന്നറ്റിനെ കണ്ടിട്ടില്ലെന്ന് അയല്ക്കാരും മൊഴി നല്കി.
വീട്ടിലെത്തി പരിശോധിക്കുമ്പോള് ഭിത്തിയില് പൊലീസ് രക്തക്കറ കണ്ടെത്തി. ചോദ്യം ചെയ്യലില് ബെന്നറ്റ് കാനഡയിലേക്ക് പോയെന്ന് പെണ്കുട്ടി നുണ പറഞ്ഞെങ്കിലും പിന്നീട് കുറ്റം സമ്മതിക്കുകയായിരുന്നു.
വളര്ത്തച്ഛന് തന്നെ ലൈംഗികമായി പീഡിപ്പിച്ചിരുന്നുവെന്നും പ്രണയബന്ധത്തെ എതിര്ത്തുവെന്നുമാണ് കൊല്ലാനുള്ള കാരണമായി പെണ്കുട്ടി പറഞ്ഞത്. സംഭവത്തില് കൂടുതല് അന്വേഷണം നടക്കുകയാണെന്ന് പൊലീസ് വ്യക്തമാക്കി. ബെന്നറ്റ് കൊലചെയ്യപ്പെട്ടിട്ട് അഞ്ചാം ദിവസമാണ് നിര്ണായക തെളിവുകളോടെ പ്രതികളെ പൊലീസ് കണ്ടെത്തിയത്. കേസില് ബെന്നറ്റിന്റെ 19-കാരിയായ ദത്തുപുത്രിയെയും 16-കാരനായ കാമുകനെയും പൊലീസ് അറസ്റ്റ് ചെയ്തു.
https://www.facebook.com/Malayalivartha