ഇതരമതത്തില്പെട്ട യുവാവിനെ പ്രണയിച്ചതിന് മകളെ കൊന്ന് സ്യൂട്ട്കേസിലാക്കി ഉപേക്ഷിച്ച അച്ഛന് അറസ്റ്റില്
താനെ കല്യാണ് സ്റ്റേഷനില് ട്രെയിനില് നിന്നിറങ്ങിയ ഒരാള് പുലര്ച്ചെ അഞ്ചരയോടെ വലിയ സ്യൂട്ട് കേസുമായി ഓട്ടോറിക്ഷയില് കയറി. റിക്ഷയില് സ്യൂട്ട്കേസ് വച്ച ഉടന് ദുര്ഗന്ധം അനുഭവപ്പെട്ടതിനെ തുടര്ന്ന് ഡ്രൈവര് കാരണം തിരക്കി. മറുപടി പറയാതെ യാത്രക്കാരന് ഇറങ്ങിയോടി. മുഖം തൂവാല കൊണ്ടു മറച്ചിരുന്നതിനാല് ആളെ പെട്ടെന്ന് തിരിച്ചറിയാനായില്ല. പൊലീസെത്തി പരിശോധിച്ചപ്പോഴാണ് മൃതദേഹമാണെന്ന് കണ്ടെത്തിയത്. മൃതദേഹം അടുത്തുള്ള രുഗ്മിണിബായ് മുനിസിപ്പല് ആശുപത്രിയിലേയ്ക്കു മാറ്റി.
ടിറ്റ്വാല സ്റ്റേഷനില് നിന്നാണ് ഇയാള് ട്രെയിനില് കയറിയതെന്ന് മഹാത്മാ ഫുലെ പൊലീസ് സ്റ്റേഷനിലെ സീനിയര് പൊലീസ് ഇന്സ്പെക്ടര് പ്രകാശ് ലാണ്ടെ പറഞ്ഞു. ചുവന്ന ഷര്ട്ട് ധരിച്ച ഒരാള് മുഖം തൂവാല കൊണ്ട് മറച്ച നിലയില് സ്യൂട്ട് കേസുമായി നീങ്ങുന്നത് സ്റ്റേഷനിലെ സിസിടിവിയില് കണ്ടു.
മൃതശരീരത്തിന്റെ കീഴ് ഭാഗം മാത്രമാണ് കണ്ടെത്തിയത്. തലയും മേല് ഭാഗവും കണ്ടെത്താന് സമീപ മേഖലയിലെ പൊലീസ് സ്റ്റേഷനുകളിലേയ്ക്ക് സന്ദേശം അയച്ചിട്ടുണ്ടെന്നും അദ്ദേഹം അറിയിച്ചു.
അന്ധേരി ലോജിസ്റ്റിക് സ്ഥാപനത്തിലെ ഉദ്യോഗസ്ഥനായ തിവാരിയെ പൊലീസ് ഓഫിസിലെത്തിയാണ് അറസ്റ്റ് ചെയ്തത്. ഇതരമതത്തില്പെട്ട യുവാവിനെ പ്രണയിച്ച മകള് പ്രിന്സി (22) യുടെ പ്രണയ ബന്ധത്തോടുള്ള എതിര്പ്പിനെ തുടര്ന്നാണ് കൊലപാതകമെന്ന് പ്രതി ടിറ്റ്വാല നിവാസി അരവിന്ദ് തിവാരി (47) പൊലീസിന് മൊഴി നല്കി. 30 മണിക്കൂറിനുള്ളില് കേസ് തെളിയിച്ച ക്രൈം ബ്രാഞ്ച് സംഘത്തിനു താനെ ഡിസിപി (ക്രൈം) പ്രത്യേക സമ്മാനം പ്രഖ്യാപിച്ചിട്ടുണ്ട്.
ഭന്ദൂപില് ജോലി ചെയ്തിരുന്ന പ്രിന്സി ഇതരമതത്തില്പെട്ട യുവാവിനെ പ്രണയിച്ചതുമായി ബന്ധപ്പെട്ട് വീട്ടില് കലഹം പതിവായിരുന്നു. ടിറ്റ്വാലയില് പ്രിന്സിക്കൊപ്പമായിരുന്നു അരവിന്ദ് തിവാരി താമസിച്ചിരുന്നത്. പ്രിന്സിയുടെ അമ്മയും മറ്റ് മൂന്ന് സഹോദരിമാരും ഉത്തര്പ്രദേശിലെ ജാന്പൂരിലാണ് താമസം. തന്റെ വികാരം ഉള്ക്കൊള്ളാന് മകള് തയാറാകാതിരുന്നതിനാലാണ് കൊലപ്പെടുത്തിയതെന്ന് അരവിന്ദ് തിവാരി പൊലീസിനോട് പറഞ്ഞു.
https://www.facebook.com/Malayalivartha