തെന്നിന്ത്യൻ നടിയായ നമിത ബിജെപിയിൽ ചേർന്നതിനു പിന്നാലെ നയൻതാരയും ബിജെപിയിൽ ചേരുന്നു എന്ന അഭ്യൂഹം ശക്തമാകുന്നു.

തമിഴകത്തെ അഭ്യൂഹങ്ങളെ അടിസ്ഥാനമാക്കി മലയാളത്തിലെ പ്രമുഖ സിനിമാ വാരികയാണ് ഈ വിവരം പുറത്തുവിട്ടിരിക്കുന്നത്.
ജയലളിതക്ക് ശേഷം തമിഴകത്ത് മറ്റൊരു നടിയും രാഷ്ട്രീയത്തില്‍ ശോഭിച്ചിട്ടില്ല എന്നതിനാല്‍ ഇറങ്ങാന്‍ നയന്‍സിന് മടിയുണ്ടെങ്കിലും ചില കേന്ദ്രങ്ങള്‍ ഇതിനായി തീവ്രശ്രമം നടത്തിവരികയാണെന്നാണ് റിപ്പോര്‍ട്ട്.

മലയാളിയും തെന്നിന്ത്യന്‍ ലേഡി സൂപ്പര്‍സ്റ്റാറുമായ നയന്‍താര ബിജെപിയില്‍ ചേര്‍ന്നേക്കുമെന്ന റിപ്പോര്‍ട്ടാണ് സോഷ്യല്‍മീഡിയയില്‍ അടക്കം വ്യാപകമായി പ്രചരിക്കുന്നത്.. നയന്‍താരയുടെ രാഷ്ട്രീയ പ്രവേശനത്തിന് ആക്കം കൂട്ടുന്ന തരത്തില്‍ കഴിഞ്ഞ ദിവസം ചില സംഭവവികാസങ്ങള്‍ ഉണ്ടായിരുന്നു.

ഇതാണ് നയന്‍താരയുടെ ബിജെപി പ്രവേശനത്തിന് കാരണമായി തെന്നിന്ത്യന്‍ മാധ്യമങ്ങള്‍ എടുത്തുകാട്ടുന്നത്.
വിജയ് ചിത്രം ബിഗിലിന്റെ വിജയത്തിനു ശേഷം ചിത്രത്തിലെ നായിക കൂടിയായ നയന്‍താര സംവിധായകനായ വിഗ്‌നേഷ് ശിവനൊപ്പം കന്യാകുമാരി അമ്മന്‍ ക്ഷേത്രത്തിലും തൃച്ചെന്തൂര്‍ മുരുകന്‍ ക്ഷേത്രത്തിലും ദര്‍ശനം നടത്തിയിരുന്നു.

ഈ യാത്രയ്ക്കിടെയാണു ബിജെപി നേതാവും മുന്‍ എംപിയുമായ നരസിംഹനുമായി നയന്‍താര കൂടിക്കാഴ്ച നടത്തിയത്. കൂടിക്കാഴ്ചയെ സംബന്ധിച്ച നരംസിംഹനോട് ചോദിച്ചപ്പോള്‍ രാഷ്ട്രീയം ഉള്‍പ്പെടെ വിഷയങ്ങള്‍ സംസാരിച്ചെന്നും മുന്‍കൂട്ടി നിശ്ചയിച്ച കൂടിക്കാഴ്ച ആയിരുന്നില്ലെങ്കിലും നയന്‍താരയെ ബിജെപിയില്‍ ചേരാന്‍ ക്ഷണിച്ചുവെന്നും അദ്ദേഹം വ്യക്തമാക്കി.

ഹൈദരാബാദില്‍ വെറ്റിനറി ഡോക്റ്ററെ ബലാത്സംഗം ചെയ്തു ചുട്ടുകൊന്ന കേസിലെ പ്രതികളെ പോലീസ് വെടിവച്ചു കൊന്നതില്‍ സന്തോഷം പ്രകടിപ്പിച്ച് നയന്‍താര രംഗത്തെത്തിയിരുന്നു. നരേന്ദ്ര മോദി സര്‍ക്കാരിന്റെ കാലത്ത് ശക്തമായ നിയമങ്ങള്‍ നിര്‍മിച്ചുവെന്നും കൂടിക്കാഴ്ചയ്ക്കിടെ നയന്‍താര നരസിംഹനോട് വ്യക്തമാക്കി.
ഇതേത്തുടര്‍ന്നാണ് സ്ത്രീ ുസുരക്ഷ അടക്കം വിഷയങ്ങള്‍ ശക്തമായ നിലപാടുകള്‍ സ്വീകരിക്കുന്ന നയന്‍താര ബിജെപിയില്‍ ചേരണമെന്നും സൂപ്പര്‍സ്റ്റാര്‍ ആയ താരം നല്ല കാര്യങ്ങള്‍ പറയുമ്പോള്‍ ജനങ്ങള്‍ അതു കേള്‍ക്കാനുള്ള മനസ് കാട്ടുമെന്നും അദ്ദേഹം വ്യക്തമാക്കിയത്. എന്നാല്‍, നരസിംഹന്റെ ക്ഷണം തള്ളുകയോ കൊള്ളുകയോ ചെയ്യാതെ പുഞ്ചിരി മാത്രമായിരുന്നു നയന്‍താരയുടെ മറുപടി എന്നാണ് ദൃക്‌സാക്ഷികള്‍ വ്യക്തമാക്കുന്നത്.
ബിജെപി- ആര്‍ എസ് എസ് നേതൃത്ത്വത്തിന്റെ ആശിര്‍വാദത്തോടെ സൂപ്പര്‍ സ്റ്റാര്‍ രജനികാന്ത് പുതിയ രാഷ്ട്രീയ പാര്‍ട്ടി രൂപീകരിക്കാനിരിക്കെയാണ് ലേഡിസൂപ്പര്‍ സ്റ്റാറുമായി ബന്ധപ്പെട്ട വാര്‍ത്തയും ഇപ്പോള്‍ പുറത്തു വന്നിരിക്കുന്നത്.