പൗരത്വ ഭേദഗതി നിയമത്തിനെതിരെ പ്രക്ഷോഭം ശക്തമാക്കുന്നതിന് ഒരുമിച്ച്‌ നില്‍ക്കണമെന്ന ആഹ്വാനം ചെയ്ത് മമതാ ബാനര്‍ജി. പ്രതിപക്ഷ നേതാക്കള്‍ക്കും ബിജെപി ഇതര മുഖ്യമന്ത്രിമാര്‍ക്കും മമതാ ബാനര്‍ജിയുടെ കത്ത് നൽകി. ബിജെപിയുടെ നേതൃത്വത്തില്‍ ജനാധിപത്യത്തിന്റെ ആത്മാവ് ഇല്ലാതാക്കുന്ന പ്രവര്‍ത്തനങ്ങളാണ് നടക്കുന്നതെന്നും ഇതിനെതിരെ ഒറ്റക്കെട്ടായി നില്‍ക്കേണ്ട സമയമാണിതെന്നും മമത കത്തില്‍ പറയുന്നു.

രാജ്യം ഭരിക്കുന്ന ബിജെപി സര്‍ക്കാര്‍ ജനാധിപത്യത്തെ ഭീഷണിയിലാക്കുകയാണ്. രാജ്യത്തെ രക്ഷിക്കാന്‍ എല്ലാവരും ഒറ്റക്കെട്ടായി പോരാടണം. സ്ത്രീകളും കുട്ടികളും കര്‍ഷകരും തൊഴിലാളികളും ന്യൂനപക്ഷങ്ങളും എല്ലാം കടുത്ത പരിഭ്രാന്തിയിലാണെന്നും മമത ബാനര്‍ജി പറയുന്നു. സോണിയാ ഗന്ധി അടക്കം പ്രതിപക്ഷ നേതാക്കള്‍ക്കും, മുഖ്യമന്ത്രി പിണറായി വിജയന്‍ അടക്കം ബിജെപി ഇതര മുഖ്യമന്ത്രിമാര്‍ക്കുമാണ് മമത കത്ത് അയച്ചത്.

കടുത്ത വേവലാതികളോടെയാണ് ഞാൻ ഈ കത്ത് നിങ്ങൾക്ക് എഴുതുന്നത്. ജാതി മത ഭേദമില്ലാതെ രാജ്യത്തെ പൗരന്മാർ പൗരത്വ നിയമത്തെയും എൻആർസിയെയും ഭയന്ന് പരിഭ്രാന്തിയുടെ പിടിയിലാണ്. നിലവിലെ സാഹചര്യം വളരെ ഗുരുതരമാണ്. ക്രൂരമായ ഈ ഭരണകൂടത്തിനെതിരെ നാം ഐക്യത്തോടെ ഉയർന്നു വരേണ്ടതുണ്ട്. ഇതിനെതിരെ ഐക്യത്തോടെ നിലകൊള്ളണമെന്ന് എല്ലാ മുതിർന്ന നേതാക്കളോടും രാഷ്ട്രീയ സംഘടനകളോടും ഞാൻ ആത്മാർഥമായി അഭ്യർഥിക്കുന്നു. ഇന്ത്യയുടെ ജനാധിപത്യ ആത്മാവിനെ രക്ഷിക്കാൻ നമുക്ക് സമാധാനപരമായി പോരാടാം’– കത്തിൽ പറയുന്നു.

‘പൗരത്വ നിയമത്തോടുള്ള രാജ്യവ്യാപകമായ എതിർപ്പിനെ ഭരണസംവിധാനങ്ങളും വക്രബുദ്ധിയും ഉപയോഗിച്ച് ഭരണകൂടം അടിച്ചമർത്തുന്നു. യുവാക്കളും വിദ്യാർഥികളും ക്രൂരമായ അടിച്ചമർത്തലുകള്‍ നേരിടുന്നു. ലോകം മുഴുവൻ നമ്മളെ നിരീക്ഷിക്കുന്നു. ‌പൂർവികരുടെ ഇന്ത്യയെ രക്ഷിക്കാൻ നമുക്ക് എഴുന്നേൽക്കാം’– മമത അഭ്യർഥിക്കുന്നു.