എൻപിആർ വിവരങ്ങൾ ഉപയോഗിച്ചു ദേശീയ പൗര റജിസ്റ്റർ (എൻആർസി) നടപ്പാക്കുകയാണു കേന്ദ്ര സർക്കാരിന്റെ ലക്ഷ്യം. ഇതിനെതിരെ ജനങ്ങൾ പോരാടണം. എൻപിആറിനായി പേരും ഫോൺ നമ്പരും ആധാർ കാർഡും ഡ്രൈവിങ് ലൈസൻസുമെല്ലാം ചോദിച്ച് ഉദ്യോഗസ്ഥർ വീടുകൾ സന്ദർശിക്കുമ്പോൾ തെറ്റായ വിവരങ്ങൾ നൽകുക. വിലാസം 7 ആർസിആർ (പ്രധാനമന്ത്രിയുടെ വസതി) ആണെന്നു പറയുക. ലാത്തികളും ബുള്ളറ്റുകളും നേരിടാൻ ജനിച്ചവരല്ല നമ്മൾ.

രാംലീലാ മൈതാനത്തു നടത്തിയ പ്രസംഗത്തിൽ എൻആർസിയെക്കുറിച്ചു പ്രധാനമന്ത്രി നരേന്ദ്ര മോദി കള്ളം പറഞ്ഞു. എൻആർസി നടപ്പാക്കില്ലെന്ന ഉറപ്പ് സംസ്ഥാന സർക്കാരുകളിൽ നിന്ന് നേടിയെടുക്കാൻ സമരക്കാർ പൊരുതണം ’– പൗരത്വ നിയമത്തിനെതിരെ ഡിസംബർ 25നു ഡൽഹി സർവകലാശാലയിൽ നടന്ന പ്രതിഷേധയോഗത്തിൽ അരുന്ധതി പറഞ്ഞു.

എന്‍ ആര്‍ സി സര്‍ക്കാര്‍ ആലോചിച്ചിട്ടില്ലെന്നും ഡിറ്റന്‍ഷന്‍ ക്യാമ്പുകളുടെ നിര്‍മാണം തുടങ്ങിയിട്ടില്ലെന്നും പ്രധാനമന്ത്രി പറഞ്ഞത് നുണയാണ്.  നുണയാണെന്ന ബോധ്യത്തോടെയാണ് പ്രധാനമന്ത്രി അത് പറഞ്ഞത്. മാധ്യമങ്ങള്‍ അവരുടെ കൈയിലാണെന്നും അവരെ ചോദ്യം ചെയ്യില്ലെന്നും അറിയുന്നതുകൊണ്ടാണ് കള്ളം പറയുന്നതെന്നും അരുന്ധതി റോയ് പറഞ്ഞു. പൗരത്വ നിയമ ഭേദഗതിക്കെതിരെയും പൗരത്വ പട്ടികക്കെതിരെയും ജനം തെരുവിലിറങ്ങിയപ്പോഴാണ് എന്‍ പി ആറുമായി രംഗത്തുവന്നത്.

അതിനിടെ പൗരത്വ ഭേദഗതി നിയമത്തിനെതിരെ സ്ഥാപക ദിനത്തിൽ വൻ പ്രതിഷേധവുമായി കോൺഗ്രസ്എത്തിയിരിക്കുകയാണ്‌ .   എ.ഐ.സി.സി ആസ്ഥാനത്ത് നടക്കുന്ന പരിപാടിക്ക് അധ്യക്ഷ സോണിയ ഗാന്ധി നേതൃത്വം നൽകും.അസമിലെ ഗുവാഹത്തിയിൽ രാഹുൽ ഗാന്ധിയും ഉത്തർപ്രദേശിലെ ലഖ്നൗവിൽ പ്രിയങ്ക ഗാന്ധിയും പ്രതിഷേധറാലിയെ അഭിസംബോധന ചെയ്യും.

ഭരണഘടനയും രാജ്യത്തെയും സംരക്ഷിക്കുക എന്ന മുദ്രാവാക്യമുയർത്തിയാണ് പൗരത്വ ഭേദഗതി നിയമത്തിനെതിരായ കോൺഗ്രസിന്റെ രാജ്യവ്യാപക പ്രതിഷേധം. 9.30ന് കോൺഗ്രസ് ആസ്ഥാനത്ത് സോണിയ ഗാന്ധി പതാക ഉയർത്തിയ ശേഷം ആയിരിക്കും ഡൽഹിയിലെ പ്രതിഷേധ പരിപാടികൾ ആരംഭിക്കുക. നേതാക്കൾ ഭരണഘടനയുടെ ആമുഖം വായിക്കും. എല്ലാ പി.സി.സികളും അധ്യക്ഷൻമാരുടെ നേതൃത്വത്തിൽ പ്രതിഷേധ പരിപാടി നടത്തും. അസമിലെ ഗുവാഹത്തിയിൽ നടക്കുന്ന പരിപാടിയിൽ രാഹുൽ ഗാന്ധി പങ്കെടുക്കും. പ്രതിഷേധ റാലിയെ ഒരു മണിക്ക് രാഹുൽ ഗാന്ധി അഭിസംബോധന ചെയ്യും.